Na maua le faatalatalanoaga a le Fofoga o Samoa ma Kelekolio Ropati mai Safata ma Lotofaga ma sa ia taua ai le mana’omia o le tele o tagata e faaaoga avanoa faigaluega i nuu i tua.

“O le aoga o atina’e ia i nuu i tua, ia e fesoasoani mai i aiga aemaise o matou ia e le o atu i Apia i le taulaga, e aoga aua e tausi ai foi aiga.

“E aoga e maua ai galuega a tagata, o le lelei o nei atinae tau pisinisi i totonu o nuu i le tele o taimi e omai ai le au turisi aemaise tagata mai atunuu i fafo e tafafao mai ai.

“Ma e tatau lava i le malo ona faaauau ai pea le tulaga; i le itu la lea a iai a i ni atinae foi lea e lelei mo turisi, aumai e fa’atu i tua nei.

Sa taua e Kelekoli Ropati o le to’atele o lana aufaigaluega ua iai nei i le resort o lo’o ia faigaluega ai nei.

“O le aufaigaluega loua iai, pe to’a selau ma le valu. 

“O a’u ia ou te nofo i Safata ae a na ou nofo iinei ona o lea ou te faigaluega ai; o au o le kuka.

“Ou te leiloa i isi tagata pe aisea e sue galuega ai Apia  ae manaia a iinei lea e latalata.

“E toatele a tagata e tafafao mai lea aso ma lea aso, tele a o aso e tutumu ai potu.

“Tele o taimi a ou faigaluega i Apia na o tupe alu ae leai ni tupe e sefe.

“O se fautuaga, a maua a le failoga ma omai i tua nei e faaaoga ai, lea e tele avanoa faigaluega iinei.

“Aemaise foi e o loo lelei a latou galulue i ituaiga galuega ia faletalimalo.”