O le fa’amuamua o lou aiga o se tulaga pito sili lea ona taua i le olaga o le tagata.

Faapei o le taule’ale’a ia Tikele Fa’atiga  mai le afioaga o Faleasi’u, ua tuua lava le olaga aoga ona o le le lava o le fa’asoa a le aiga, o lana lea fa’amuamua.

Na a’e le taule’ale’a ia Tikele Fa’atiga i le Iunivesete Aoao o Samoa i le tausaga nei ma ua le toe aoga o ia ona ua le lava le fa’asoa tau seleni a lona aiga.

Na ia saunoa o lana filifiliga sa fua lava i le tulaga ua iai lona aiga i lenei foi vaitau o le soifuaga.

“Na ou tuua le aoga mai le Iunivesete i Papa i Galagala ina ua mae’a le kuata muamua ona ua le lava le fa’asoa o le matou aiga talu ai na’o lo’u tuafafine matua lava o lo’o faapena ona tausia le matou aiga ma ou te le’o mana’o lava e fa’aalu ni tupe se tele mo a’u ae o lo’o iai foi nai o’u tei laity.”

“Na faigata lava ona fai sa’u fa’aiuga ona e talitonu foi le loto o lata lava lea lumana’i ae peita’i e talitonu lava le agaga e pito sili lava ona mana’omia e lata aiga lena seleni nai lo a’u nei.”

Na feiloa’i atu le Fofoga o Samoa ma le taule’ale’a ia Tikele Fa’atiga a’o ia alu ane au sana galuega o le aso i totonu o lana afioaga.

O lo’o sailia foi se galuega a lenei taule’ale’a ia Tikele Fa’atiga ae o lo’o ia fesoasoani nei i lona tuafafine matua i lana tama’i fale fa’atau meataumafa i totonu o le aoga tulaga lua o le latou afioaga.

“Pau lava le mea o lo’o iai le mafaufau i lenei vaitau o le sailia lea o se galuega e fesoasoani ai i le matou aiga ia ma faapena ona faatau ai foi ma mea ta te mana’o ai.”

Na fa’aalia foi e le taule’ale’a ia Tikele Fa’atiga mafua’aga o lona fa’aiuga e fa’amuta loa lana aoga.

“Na ou fa’apea matua ou fa’amaualuga lava pe a totogi lata pili aoga ae o lo’o fia aai si o matou aiga.”

“O le isi mafau’aga ona o nai o’u tei laiti o lo’o matou nonofo nei, ia lagona lava le fa’anoanoa pe a ou alu ma tupe ae leai se latou meaai e aia.”

Na ia toe fa’ailoa foi e le’i iai se fa’anoanoaga ia te ia i lana fa’aiuga.

“Ia o le sue loa o se galuega e tautua ai i le aiga ona toe vaai lea i le aoga pe a maua se isi tupe.”