Ripotia e Sarafina Sanerivi

Fa’aliliu e Maiava

Ua iai nei le sui-faipule fou a le Itumalo o Aiga i le Tai mo le Palemene o Samoa. 

O le Afioga lea a Mulipola Le’ataua Laki, le pule o le Kamupani o le Advance Cargo Agency.

O le ulua’i tauva lea o Mulipola i faiga-palota tele a le atunu’u ma ua manumalo ai ia Ifopo Matia Filisi i palota e 1,346 i le 790.

Na fa’aali  e Mulipola i le Samoa Observer, ua fa’agae’etia lava ma fa’afiafiaina, ina ua filifili e avea ma sui fou o le Palemene mo lona itumalo. 

Ae na saunoa lana afioga, e le’i iai lava i le lisi o galuega na mana’o e fa’atino i lona soifuaga, le avea o se faipule o le palemene.

“Leai ma so’u manatu o le a avea a’u ma Faipule  o le Palemene,” o lana saunoaga lea.

Sa manana’o le matou Aiga Sa-Mulipola ia ‘ou tauva i faiga-palota talu ai, ona ‘ou malie lea iai. 

“Na ‘ou ioe aua ‘ou te talitonu i le fa’ai’uga ua faia e lo’u aiga ma ‘ou fa’atuatuaina fo’i lo latou lagolagoina o a’u fa’atasi ma le latou fesoasoani. Ae na sa’o lelei lava a’u.  ‘Ou te le i’inei i le aso pe ana leai le lagolago a lo’u aiga, lo’u nu’u ma le itumalo atoa.   

 “Leai so’u manatu ‘ou te malo, ae ‘ou te matea, o fuafuaga ia a Le Atua mo a’u nei, ma ‘ou te iloa, a ‘Au ma Ia, e  leai se mea e le mafaia.”

Ona tapena loa lea o Mulipola i le sefululua masina mo faiga-palota. Sa toe taga’i fa’ale-mafaufau i taimi o ana tapenaga ae maise le tele o lu’itau sa la feagai. 

“E tatau lava ona matua sauna lelei aua o le alu i le palota, e le se mea faigofie. E le fa’apena e na o le ‘ave o lou igoa i le palota, ona o sou mana’o. E tatau ona e matua tapena lelei iai, ma ‘ave iai lau fa’amuamua i taimi uma.

 “E le o se mea faigofie ia te a’u lava ia, ae ‘ou te iloa, a iai le finagalo o Le Atua e pei ona ta’uta’u-so’o, e fua mai fua lelei sa e lulu...ma ou te fa’afetaia ai pea le Atua ma Ana fa’amanuiaga.

 “O se fa’aeaea maualuga ua maua ai le avanoa e fai ai ma sui o o’u tagata i le Palemene o Samoa. Ua ‘ou sau o a’u o le sui o lo’u itumalo ma o le a tu’u iai lo’u malosi e tautua ai ma le agaga fiafia.” 

Mo le aga’i i luma, na saunoa Mulipola, e matua tele lana lisi o vaega e mo’omia ona fa’aleleia i lona itumalo. O a’oa’oga le isi ana fa’amuamua. O le isi fa’afitauli o lo’o feagai ma a’oga i le itumalo, o le le iai lea o nisi o totoga mo’omia ma vaega talafeagai e fesoasoani i a’oga a fanau.

 “Ae maise lava i le mata’upu o le fa’aSaienisi,” o lana saunoaga lea. “Matou te mo’omia ni faia’oga-saienisi se to’atele,  o se potu fa’apitoa mo lea lava mata’upu, o totoga ma mea-fa’apitoa uma mo nai a matou tamaiti-a’oga. 

“’Ou te matua lagolagoina le una’i a le malo, ia fa’aa’o’oga fanau-laiti i Samoa aua ‘ou te talitonu, a amata lelei mai vasega amata i lalo, o le a manuia fo’i le lumana’i.” 

O suiga o le tau ma fa’afitauli e tutupu mai ai – e aofia ai le ono si’itia-‘ese mai motu o iai nei – o se tasi o vaega o lo’o silasila iai. 

“E tatau lava ona iai se nofoaga mautu mo o matou tagata e aga’i iai pe a iai ni a’afiaga fa’aNatura. E tatau ona iai ni nofoaga saogalemu mo latou i taimi faigata fa’apena.” 

E le gata i lea, o lo’o silasila fo’i le faipule fou, i le fa’aleleia o uafu mo Apolima ma Manono. 

 “E matua le-saogalemu lava i le taimi nei ma e mo’omia tele le faia o se galuega e fa’amautuina ai le lelei pea o uafu o iai nei mo o matou tagata. E tatau ona iai ni moli  lelei i uafu uma nei aua e le saogalemu i le taimi o le po.” 

O isi vaega e aofia ai le fa’ao’oina atu o le suavai taumafa mama, le fa’alelei o vaega e pei o ‘auala ma falea’oga mo le itumalo, o lo’o fuafua uma e Mulipola mo le isi lima tausaga.

O le vaega mulimuli o lo’o taula’i iai lana silasila, o le tulaga i le fa’ato’ateleina o le ‘au-palota a le itumalo o Aiga i le Tai, lea e talitonu ai Mulipola, ua tatau ona iai se isi faipule fa’aopopo mo le itumalo. 

 “’Ou te manatu, e lelei le lua o faipule mo le matou itumalo talu ai, ua matua fa’ato’ateleina lava tagata ma le tele o galuega e tatau ona fai.” 

O se tama-fanau a le afio’aga o Salua, i Manono. O Mulipola ua 46 tausaga o le soifua, ua fa’aipoipo ia Alaisa Ah Leong-Mulipola, ma e to’avalu o la alo. 

O se tasi o tama-tuai a le A’oga Tulagalua a Salua Malono, le A’oga Fa’aItumalo a A’ana ma le Kolisi o Samoa i Vaivase. 

Na fa’au’u mai le Iunivesete Aoao o Samoa ma avea o se tagata-faigaluega a le Vaega o Tiute mo le 9 tausaga a’o le’i amata galue i le Kamupani a le Seair Trans Forwarding & Custons mo le lua tausaga. 

Na amata lana lava pisinisi, le Advance Cargo Agency lea e i le Maota a le Metotisi i Mulivai ma ua 13 nei tausaga o lo’o fa’aauau pea.

Na momoli lana fa’afetai ona o le lagolago a lona itumalo ma tagata uma na palota mo ia. 

 “Fa’afetai tele lava mo le fa’atuatuaga ua outou ‘aumai ia a’u ae maise fo’i le talitonu i lo’u tagata,” o lana saunoaga fa’afetai lea. “Ae maise lava o fa’afeagai uma na tatalo mo a’u, lo’u aiga, o a’u uo ma e uma na lagolago mai. Fa’afetai tele agalelei.”

Na momoli fo’i lana fa’afetai ma le fa’amalo i le sa tauavea talu ai le tofi o le Itumalo, o Ifopo Matia Filisi.

“’Ou te fia fa’afetai fa’apitoa atu ia Ifopo, i ana galuega lelei sa faia i le lima tausaga ua mavae, ma  lou sao taua mo le itumalo.”