Toatele i latou ua foi mai ma faailoga maualuluga ma faauuina mai ma iu ma ii Iunivesite ma tusipasi lelei, ao le mea ua tupu ua le fia-faigaluega e fesoasoani ai i aiga.

Ua pule lava o ia ma eva i le laufau malu.

Ae mo le ali’i ia Tasi Maofilo, 23-tausaga le matua mai Magiagia o lo’o saili sana galuega i le taimi nei.

“O lo’o tau saili lava se galuega ua le gata mo se lumanai manuia o lo’u ia olaga ae o se fesoasoani mo lo’u aiga lava ia” o lana tala lea i le Fofoga o Samoa.

“O lo’u manaoga po o le a lava le galuega e maua o lena lava e tuu atoa iai le loto aua o le nei vaitau ma le sailiiga o galuega e le’o se mea faigofie.

O lana mau, e le maua se galuega ma se filemu a’e le faamaoni ma sulu lou ulu e su’e e le maua se galuega lelei.

“Faigata lava lenei vaitau aua o le tele o tagata e saili galuega ua le faamaoni ma ua vaai faatauvaa i le galuega ua tuuina mai.

“Ae mo a’u lava ia o le galuega o le galuega lava lena e le tio ai foi seisi aua ua le faigofie nei aso ma lona soifuaga.

I le naunau ai o lea taule’ale’a i sana galuega, na ia tau’a ai o lona mana’o lava ia maua aua sona ia lava lumanai manuia.

“E le’o na’o taimi nei e faigofie ai galuega e alu lava se taimi o e galue ona maua lea o se mea lelei.

‘Ua le gata mo lo’u aiga, ae o lo’u foi ia lumanai ina ia lelei ma ia maua mea uma ae le’o le ola faalagolago aua ua le tutusa uma tagata.

O lana mau, o le galuega lava ua iai o lena lava.

“E taua ai lo’u galue faamaoni, ma ia onosai foi aua ua eseese lava lenei vaitau ma lona soifuaga ua le toe taugofie foi.