Faamuamua le fanau ma le aiga
O le fita ma le faigata o le galuega a matua o lo’o faia i aso uma o le galue punoua’i lea mo manuia o aiga aemaise ai le faamuamua ai lea o fanau
E mo le tina ia Moe Tiafau, 22-tausaga le matua mai le afioaga o Faleula ma Samalaeulu,Savai’i o lo’o tausaili sana galuega aua le tausiaina lea o si ana tama teine, 8-masina le matua ma lona ia lava aiga.O i latou foi ia o lo’o ave ai la latou faamuamua ma le faamamafa.
Mo le tina ia Moe na iai lava le mafuaaga ua ala ai ona o ese mai ai mai Savaii e omai ai iinei i Upolu.
“O le saili lava o se lumanai manuia o fanau ma aiga” o lana tala lea i le Fofoga o Samoa
“O le faamoemoega ina ia maua se leleiga mo fanau o le mea lena o lo’o ave iai le faamamafa.“E ui lava ina taugata le tau o le soifuaga ua iai nei, ae o lo’o taumafai lava i le mea e gata ai le taumafai aua fanau.
“O le tupe o lo’o maua ma ii totogi i galuega e lelava ma le gafatia ai le tausiga o le aiga nei.
O le tina ia Moe e faigaluega i le Supamaketi a Farmer Joe ma o loana filifiliga ua faia nei o lea saili seisi ana galuega.
“O le tupe maua e lelava pe a faatusatusa iai i le mamafa o galuega o lo’o faia nei.“O leisi tulaga o le taimi o galuega ua le maua ai lava ma se taimi lelei mo a’u ma le toalua ma le aiga, o le alapo i le taeao manava mai ua aoauli lei leva foi ae toe amata.
“I lo’u ia lava ia iloa iai e le taitai ona fetaui ma paleni lea tulaga mo a’u ma lo’u aiga.
O le faamuamua a le tina e mo lona ia lava aiga.
“O tupe uma e maua ma ii galuega a a’u ma le tama o le aiga, e tausi ai lava le ma tama teine uau iai nei ma nisi fanau o lea foai e le Atua i lo ma aiga.
‘E mo’i lava ua taugata le tau o le soifuaga ae o lo’o taumafai lava i aua la e gata ai le malosi aua le tausiga o fanau mo le lumanai.
O le manaoga o le tina ia Moe ina ia vave maua seisi ana galuega mo lona aiga.
“Po o le a lava le galuega e maua o lena lava.“O le mea taulia ina ia maua se seleni aua le fanau ma mea fai a le aiga.
“Aua o le faamuamua lava lea a so’o se matua i lenei vaitau e mo fanau ina ia manuia.
O lona talitonuga a faamuamua lava e matua le mea e tatau ona faamuamua e le taumate le manuia o fanau mo0 le lumanai.