Ua fa’alauiloa mai nei e le malo le taua fa’asaga i tupe tau-fa’asese, i se taumafaiga e pu’e-vae ai le ‘au-solitulafono o lo’o faia lea tulaga-sese.

O le Afioga a Gafatasi Patu, le Pule o le Vaega mo Tulafono ma Tupe a le Faletupe Tutotonu a Samoa, o lo’o ta’ita’ia lea fuafuaga.

O le tala fiafia e pei ona ta’ua e Gafatasi, talu ona fa’asalalauina fa’alaua’itele taumafaiga a le Faletupe i nai masina ua mavae, ua latou matauina lava le fa’aitiitia pea o le aofa’i o tupe tau-fa’asese o lo’o fe’avea’i solo.

“E iai nisi ua molia ona o le solitulafono lea, o le gaosia o tupe tau-fa’asese,” o lana fa’aaliga lea.   

 “Leva ona galulue so’o-so’o-tau’au le Faletupe Tutotonu ma le Matagaluega o Leoleo e fa’atino polokalame fa’alauiloa i luga o leitio e pei o le 2AP, le Talofa FM fa’apea nusipepa, e momoli atu ai la matou fe’au ina ia taofia ai tagata mai lea solitulafono, o le faia o tupe tau-fa’asese.     

“Ua faia fo’i e le Faletupe Tutotonu se fa’asalalauga i luga o le televise, i ‘auala e iloa-gofie ai tupe tau-fa’asese nei.” 

Na fa’aopoopo mai fo’i, ua tele su’esu’ega ua fa’atino e le Faletupe Tutotonu o Samoa, sa fesoasoani iai le Matagaluega o Leoleo fa’apea le Ofisa Aoao mo Moliaga, lea na maua ai nisi o faia lea solitulafono.

 “O le fa’asalaga mo le faia o tupe tau-fa’asese, e o’o atu i le 14 tausaga i le falepuipui. Ma o le a fa’aauau pea a matou taumafaiga ina ia maua tonu i latou o faia pea ia fa’atinoga solitulafono.” 

E le fou lea fa’afitauli i Samoa nei, o le fa’aaliga lea a Gafatasi. 

“E ripoti mai pea lava pea lea fa’aletonu i taimi uma,” o lana saunoaga lea.

Lea fo’i na toe aliali mai le fa’ateteleina o tupe tau-fa’asese i le amataga o Mati ma sa galulue fa’atasi ai le Faletupe ma le Matagaluega o Leoleo ina ia taofia lea fa’atinoga solitulafono. 

E fai lava si faigata ona iloa lenei solitulafono pe a fua i le tuliloaina o le tagata po’o nisi fo’i o faia pea lea amio, o le fa’aopoopo mai lea a Gafatasi.

Peita’i, e talitonu lava, o le latou maua o se ‘auala e taofia moni ai.

“Atonu pe selau ‘auala ‘ese’ese e faia ai tupe tau-fa’asese ae ‘ou te fai atu, e selau ma le tasi ‘auala e mafai ona maua ai tagata nei ma ‘ave sa’o loa i le tulafono.” 

Na fa’amanatu mai fo’i  o tupe tau-fa’asese nei o lo’o gaosia ma tu’uina atu i le atunu’u lautele, e matua solitulafono lava. 

“O le sala pe a fa’amaonia, e le sili atu i le afe iunite tau-fa’asalaga pe o le o’o atu I le 14 tausaga i le falepuipui, po’o fa’asalaga uma e lua. E tasi le iunite tau-fa’asalaga, pe tus o le $100.00.

 “Mo se fa’amalamalamaga, afai sa e fesoasoani i so’o se ‘auala lava i le faia o tupe tau-fa’asese nei ma tu’uina atu i le atunu’u lautele ma faia ai ni fa’atauga, e ono molia ai lava ‘Oe ma fa’asalaina i le 14 tausaga i le falepuipui. Afai fo’i ae maua ane e iai sou so’otaga (po’o le a lava) ma le tagata ua solia le tulafono, e maua ‘Oe i lalo o le vaega lea o le tulafono.” 

E fa’apefea ona iloa e le atunu’u lautele se tupe tau-fa’asese, e le o se tupe mo’i? 

O le saunoaga lenei a Gafatasi: 

1. O le Ituaiga Pepa – e matua ‘ese mamao le fa’alogona (pa’i atu) i se tupe moni ma se tupe tau-fa’asese. O tupe moni, o lo’o fa’aaogaina ai le pepa moni e gaosia ai tupe ma e fa’apitoa lava le lagona pe a pa’i iai. O tupe tau-fa’asese, o lo’o fa’aaogaina ai pepa masani (A4 paper) e fai si matuatua teisi ma e le lamolemole.  E mafai lava e le na o le tagotago iai ma lotelote, ona iloa o le tupe tau-fa’asese;

2. Fa’amalama i’ila i le $100 tala ma le $50 tala pepa – e iai se fa’amalama i’ila i le itu o tupe-pepa uma ia, e mafai ona ati ai le va’ai ma iloa atu le isi itu.  E le maua i tupe tau-fa’asese le vaega lea talu ai, e na o le pepa A4 o lo’o fa’aaogaina ai. Ia mautinoa, siaki lelei ma va’ai lelei o iai le fa’amalama i’ila lea. 

3. E iai le laina (alu i luga ma lalo) i itu o le $20 pepa, le $10 pepa ma le $5.00 pepa – e iai se laina fa’apitoa e foliga o se “pepa-i’ila e fa’alava aga’i i luga ma lalo o tupe pepa uma ia. I totonu o le laina i’ila lea, o lo’o iai mata’itusi o le “CBS”. 

E faigofie lava ona iloa se tupe tau-fa’asese pe a leai se laina i’ila lea. Afai o iai le laina i’ila, o le tupe mo’i.

“E tele lava ‘auala ma mea ‘ese’ese e tilotilo iai, ae o vaega ‘autu lava ia e mafai ona iloa vave ai ma e tatau ona vave siaki iai au tupe.” 

E fautuaina fo’i le mamalu o le atunu’u, ina ia fa’ailoa mai i le Faletupe Tutotonu o Samoa pe afai e maua se tupe tau-fa’asese mo ana su’esu’ega.

“Fa’amolemoe, ia nofo-silafia lelei, o tupe tau-fa’asese, e leai sona aoga ma e le tatau lava ona fa’aaogaina mo fa’atauga pe talia fo’i so’o se fefa’ataua’iga lava. A maua loa se tupe-sese, fa’amolemole, fa’afeso’ota’i mai le Faletupe Tutotonu o Samoa.