E o’o lava i le elegi ua taugata
E o’o lava i le elegi ua le toe maua i se tau taugofie.
O le manatu fa’aali lea a Silupe Mataafa mai Fusi Saoluafata i le Fofoga o Samoa.
O ia o se tama o lo’o fesoasoani nei i lona tuafafine i le tausiga o le aiga.
E 53 tausaga o lenei tama ma sa ia ta’ua o lona fiafiaga tele o le mafai lea ona fesoasoani atu i tagata e taua i lona olaga.
“O le matua taugata a ole tau o le soifuaga loua iai,” sa ia fa’apea mai.
“E o’o a i le elegi ua taugata fo’i.”
Sa fa’apea mai Silupe e fa’afetai a o ia e fa’ataua e tagata Samoa le ola ma le malosi i mea ua mafai ona maua.
“E taua a ia a’u le olaga tausi aiga, le ola fesoasoani atu i uso ma tuafafine ma fa’asoa atu fo’i ni mea ua e maua mo isi,” sa ia fa’apea mai.
“Aua a le lelei fa’apena mafutaga a tagata, e maua fo’i le tatou atunu’u i se itu leaga ma e leai ma sesi e fia nofo ai nei.
“O le fiafiaga moni lava o lou aiga ma o le mafua’aga na o lo’o fa’amuamua ai lo’u aiga.
Sa fa’apea mai Silupe o lana talosaga mo le malo, ia fesoasoani mai i le taugata o le soifuaga ua iai nei aemaise lava meaai.
“Ua fiu e toe su’e se faleoloa taufogie ni oloa e maua ai.
“Ou te masalo o le itu fo’i lea o lo’o to’atele lava tagata o lo’o faitio ai.
“Tele a o aiga i Samoa o aiga tau atia’e ma o le mafua’aga lena o lo’o faitioina ai lea mataupu.
“O lea la ou te fia talosagaina ai le malo e fesoasoani mai i le taugata o le soifuaga.
E taumafai pea Silupe e fa’afiafia lona ia tagata tusa lava po’o lea le tele o mea o mafatia ai.
“O lo’o matou nonofo uma ma lo’u tuafafine ma lona to’alua aua e fia maua fo’i e lona to’alua se fesoasoani i le faiga o le fa’ato’aga.
“O na fo’i na e maua mai ai sesi seleni e fai ai isi fuafuaga aua o le totogi a lo’u tuafafine e alu i matou pili o le vai, eletise ma isi mea ole aiga.
E faifaiva foi Silupe i isi taimi aua se alagatupe.
“E tele a na ou faifaiva aua se mea’ai. E lelei a lou oe afu i le tausiga o le aiga.