Lauga - “Ia e mulimuli mai oe ia te au”

By Rev. Petaia Setu 18 November 2018, 12:00AM

(Ioane. 21:22)

O lou iloa ma lou talitonuina o ou tiute ma faiva poo lau galuega foi, o le mea tāūa tele lea. Peitai, ua tele lava foi ina faale lelei ma ua le atoatoa le faatinoga o ia galuega ona ua le mulimuli ma tulimata’i lelei le taiala, a ua galue faatilotilo i autafa.

O lea ua taoto le galuega tele mo Peteru – Ia e fafaga i a’u mamoe (f.15-17). A o le galuega, e mo le au aposetolo uma lava ma tagata uma. E pei o lea ua faailoa e Peteru ia Iesu, e le tatau ona sau le soo lea (f.21). O le tali a Iesu, “ Afai ou te loto ina ia tumau pea o ia seia ou sau, pe se a lea mea ia te oe? Ia e mulimuli mai oe ia te au.”

O Peteru, o tama ia na mua i malae. Na ta’u manino lava iai e Iesu o latou faiva i le amataga (Mataio.4:19). Peitai, e le i saga tonu lava kama matutua i le galuega o loo finagalo ai Iesu. Silasila foi, na maliu loa Iesu, toe foi loa i tua le olaga o Peteru. Ua toe foi i lona upega. I le ua tata’i  uma atu ai ma isi (Ioane. 21:3). O le itu tāūa ia maitau lelei ma manino iai tatou, o le tulituliloaina e Iesu o lana aufaigaluega na ia tofia i lona lava finagalo pule, ma valaauina  e ia mo lana  galuega ua finagalo ia iai. E le i  tiā’ia e Iesu le uso nei. O le alofa moni o le matua fai tama. O le alofa faa-taitai – na te opogi mai, ma faamafanafana, ma toe faamanatu iai, o a’u na valaauina oe (Kal.1:1), ou te faia oe ma fai faiva i tagata (Mat.4:19). O lona uiga, o lea lava e fealua’i Peteru ma le faauuga a le Atua ia te ia, ma le galuega e le mafai ona tavavaeesea, o le alofa faamaoni ma fafaga mamoe a Iesu Keriso (Ioa.21:15-17). O le finagalo moni lea o lo tatou Alii, ma o le ute foi lea o le galuega a le au aposetolo ma tatou uma, ia faaolaina tagata uma.

Tasi lea ‘ai ta’uta’ua o le toe tu o Iesu Keriso, o lona toe faafoi atu o Petru ia te ia (f.19). E ui lava ina felefele solo manatu o lenei soo, a o le valaauina lava, o le valaauina – Ia e mulimuli mai oe ia te a’u. E iai upu mananaia o loo i le matua e tatau ona tatou vaavaai toto’a iai, ma malamalama lelei iai. 

O le oe ma le a’u.

O le finagalo faaalia o Iesu o loo i le lesoni, na o Iesu ia Peteru, Peteru ia Iesu, uma. O le faigofie ia. Ae ala ai ona faafeufeu, ona ua le savali sa’o ia Iesu, ae ua ‘apo le isi itu. E musu i lelei atu ai fua ma le isi. E lima mamau. E ’ū i le alofa o le Atua. E fuā i ona autafa. Ia le manuia atu ai ma lona tuaoi. O le manao o Iesu – o oe:

Le ’oe toilalo; le oe faapaupau; le oe pepelo i le toalua; le oe le alofa i se fanau; le oe faitogafiti leaga ma le oe faufauleaga; le oe fasi avā ma le oe tuinanau i le mau tamā; le oe faomea ma le mau oe talepe fale; le oe lotoleaga ma le taulamalama. Le oe e gaualofa le gutu ae fasioti tagata le loto; e faafia atua ae leai se loto faamagalo; e alofa faapito ma fai kegi i luga o galuega. Le oe o loo fau ma faataunuu ou manao i le ola o isi tagata; le oe faasusususu ma le oe faatagā faavalevalea. Oka, Samoa, ua tumu lo tatou atunuu i le mau oe faapena – lau faauma ane e oe! E tele i aiga; i galuega a le malo, kamupani ma isi faalapotopotoga eseese. A o le 90% o le oe lena – ole ekalesia! O le oe lea ua maua lelei e Iesu, o le oe lea na faavae ai le ekalesia a Iesu Keriso i le lalolagi (Mat.16:18). Fai mai Iesu, Sau oe. Ioe, Samoa, ua tatau ona toe fafau lou oe ma lo’u foi oe e Iesu. O le mea mautinoa, o loo sala pea le fausaga o le oe o loo ola ai ta’ua. Ae a lē liua lou oe, e iu leaga lo ta faamoemoe. E faapena foi i le ekalesia ma le au molimau. A le alu sa’o ia Iesu Keriso e toe tapena mai ai le alofa laveai, o lona uiga e ’ai e oe mamoe a Keriso, ma taapeape ma segisegi ai le lafu, ae mea ane, e le o se lafu a oe, o mamoe a Iesu Keriso. Mulimuli mai oe. O le galuega lea ua tuu ia Peteru (le oe filifilia), o le galuega o le ola tuu atoa. E mautinoa e oti faamaturo ai (oti sauaina ona o Iesu); peitai o le suamalie lena o le oe ua faamaoni le alofa i lona Alii (f.17), o lona oti foi e vivii atu ai i le Alii (f.19).

O le a’u, e tasi lava lona faasinomaga – o le Atua. O Samoa, ua iloa e le lalolagi e faavae i le Atua lea. O lona uiga, pau lava la lea o le ta’iala i le Atua e faalogo ma mulimuli ai Samoa. E ala ona tele faafitauli ma oi le toatele, ona ua tatou o ese ma le Alii e maua ai le saolotoga ma le ola manuia o ō tatou tagata. E foliga mai ua A’u tatou ia Saina, Iapani, Iuni a Europa, ma isi atunuu tetele o le lalolagi. Fai mai Iesu, Mulimuli mai oe ia te A’u. O le A’u lea na tuumavaega ai nai o tatou tuaa mo auga tupulaga uma o Samoa auā ua mautinoa, e maua ai le ola mălie i lalo nei, atoa foi ma le ola atalī. Na sa’o loa Peteru i le A’u na valaauina o ia, e le i mafai e le malosi o Roma poo se isi lava paoa i ona po nei ona talepe le Malo o le Atua ua faatuina i le lalolagi (Mat. 16:15-19).

Ua le masino le mau faalavelave ma mea mataga e tutupu i Samoa e aafia ai foi ma atunuu i fafo i o tatou tagata. O le fesili – O fea Peteru? O fea le auposetolo? O le a le  feau a le ekalesia o fai? O le a faapefea ona saga tonu le malo ma ona tagata i le Atua pe afai o lea tatou te o faasupasupa solo? O le a faapefea ona lelei ni olaga o fanau o loo la’u pea i Tafaigata pe afai na o le afisi ole Tusi Paia ma faamamapo le talalelei ae leai se galuega o faia i ai? Uso e, e le faaolaina le atunuu i le a’u lena e i lou loto. Ua tele le mau a’u. Ua le iloa e tagata poo fea le a’u e faalogo iai. O le toatele ua galulue tautoa’i solo, (fai pea ona o le mea o la e fai mai e fai). Ua ō le mautonu le toatele i le lotu (tau ina faataunuu) – Aisea? Faamolemole, alu ifo i lou OE, ae tuu le A’U i le Atua. O le oe – mulimuli; o le a’u – e muamua (vaai i le matua). O le tatalo a le isi tamaloa e masani ona ou faamanatu atu: ‘Le Atua e, ia fai oe ma Nila, ae fai a’u ma filo’ E le mafai lava ona muamua le filo. O lona lava faasinomaga, o tua o le nila. Poo fea lava e alu iai le nila, e mulimuli ai lava le filo. E leai lava se loto o le filo. Maeu le faaaloalo ma le faaeaea o lenei tagata i le Atua. Le au uso e, ’aua le fia nila. Poo le a lava lou tofiga i lalo o le la, o oe o le filo; mulimuli ia Iesu. Vaai i si o tatou atunuu o le a pa’ū atu i seoli! Fai se galuega. O lau galuega o le faaolaina o agaga, e le o pisinisi.

Soia tou te popona i le faitauina o tupe i aso uma, ae faamasani i le Tusi Paia tou te iloa ai le taunuuga o mea uma. Tatalo i le Atua ia ola Samoa, ae ’aua le tatalo ia tolo lou ’oa.

Ua leva ona tia’i le upega o Peteru. Na fiu i fagota e le la’ola’oa lona vaa. Ae ina ua faafouina le oe e mulimuli ai ia Iesu, ua soo le lalolagi i le manogi o le ola. Le oe na tofi; le oe na valaauina; le oe na foa ai le ekalesia a Iesu Keriso i le lalolagi.

Samoa e, ia manatua, e tasi lava le a’u e faalogo ma mulimuli ai lou oe. Na o le a’u o loo musumusu mai i aso uma – “Ia e mulimuli mai oe ia te A’U”

 

 

Amene

7737063/7783782

E-mail: [email protected]

By Rev. Petaia Setu 18 November 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>