Fesoasoani Ekalesia mo tagata lautele
“O le Ekalesia nei e tele lava ina tu’uina atu fesoasoani i ē o lo’o o matou iloa o lo’o ua matu’ai mana’omia lava le fesoasoani,” Epikopo Polataivao Leasi o le Le ‘Au Pa’ia o Aso e Gata Ai i Mulifanua.
Na maua le avanoa o le Fofoga o Samoa e fa’atalatalanoa ai Epikopo Leasi i le sao a le Ekalesia o lo’o galue ai nei i totonu o le afio’aga i Mulifanua mo tagata lotu ma le lautele o le afio’aga.
Na ia fa’ailoa o le taimi lenei, e le’o mafai ona fa’aletonu le silasila toto’a a le Ekalesia i itu uma, ma o lo’o apa’apa pea i ai ma tu’uina atu le fesoasoani mo ona tagata lotu aemaise o so’o se tasi i le afio’aga.
“E mo le silafia ai, ia e tele lava fesoasoani a le Ekalesia o lo’o mafai ona fesoasoani atu ai i le lautele o le afio’aga ma e amata atu lava i le aoga Tulaga Lua o lo matou nu’u,” Epikopo Leasi.
“Na i ai le fesoasoani na tu’uina atu mo kesi a le fanau ma tulaga fa’apenā.
“O le agaga maualuga lava ia galulue fa’atasi Ekalesia uma aua le manuia lautele o so’o se tagata lava i totonu i lenei fo’i vaega o le atunu’u o lo’o o matou galulue ai.
“O le fa’amoemoega laualuga nei o matou o lo’o galulue i so’o se fata fai taulaga i lenei pito ia felagolagoma’i ma fealofani tagata uma.
Na ia ta’ua fo’i o le tele o fesoasoani o lo’o latou tu’uina atu i aiga lima vaivai.
“Ia o le galuega lena, o lo’o matou tu’uina atu ai mea’ai ma nisi o vaega o lo’o latou mana’omia.
“E le fa’apea la ua o matou fa’atinoina nei galuega ina ia ola fa’alagolago ai le tagata i le Ekalesia ae o lo’o matou fesoasoani e fa’atalatalanoa ma ave i ai a’oa’oga mo le atina’eina o a latou aiga.
“O nei a’oa’oga o lo’o mafai ona o matou tu’uina atu e pei ona i ai le amataina o nai fa’ato’aga, o itu tau faigafaiva ma so’o se vaega lava o lo’o matou iloa e tatau ona ofoina atu ai le fesoasoani.
Na saunoa Leasi o le tele lava o taimi e alu ai a latou asiasiga aua lava le tulimata’ia ai o vaega nei ina ia sologa lelei mea uma.
“Ia o le tele lava o asiasiga a le matou Ekalesia e alu lava le Epikopo ia ma se sui o le Aualofa po o le Mafutaga a Tinā.
“O le fo’i ai ia e amata ai loa ona talatalanoa i vaega nei aua le fa’aleleiina o aiga o lo’o fia maua se fesoasoani ma le agaga maualuga, ia manuia tagata uma.