Ia tinoū
E le maua ma se filemu se tali o sou manaoga.
O lea le talitonuga o le tamā i a Lauone Amosa o Faleū Manono i le aso ananafi.
E to’alua ona alo ma le tinā o le aiga.
“Ia o lo’u atali’i matua ua i’u le tausaga lenei ma o lo’o ua fuafua mo le tausaga fou i le Iunivesite i Papaigalagala.” O le saunoaga lea a Lauone.
“O le itu mautinoa e le mafai ona fa’atino o so’o se vaega tatou te manano i ai pe afai e le mafai ona o tatou tinou i ai.
O le a le uiga o lau saunoaga?
“E mo le silafia o si o matou aiga, e na’o a’u e maua ai le tupe maua ona ou te fagota, mai lava le laiti o si o’u fanau o la’u lea galuega e fai.
“O lo’u manatu maualuga ia i’u ma le manuia o latou olaga, o le a le matitiva i o’o i le lagi, o la’u fanau lava e ave i ai la’u fa’amuamua.
Na ia ta’ua ‘ o le tele o taimi ia e na’o le saka ma le ki ae ave lava tupe mo mea uma aua aoga ale fanau.
“O lea la ua i’u taumafaiga a se tasi o le fanau i le Vasega 13 o le fa’afetai lea i le Atua.
“Aua e leai se isi e tele ni ana tupe, o auala fo’i na sailia ai tupe mo fanau i le aoga, e le faigofie, e taumate le ola ma le oti i le sami i aso uma, ae fa’afetai e Na te Le tu’ulafoaina i tatou.
O a fa’afitauli e feagai ma oe i luga o le sami mai le tele o tausaga?
“O le tau, a ou va’ai atu ua leaga le tau e avea lea ma avega i a te a’u aua ou te leiloa po o fea se isi mea e maua mai se fesoasoani e fafaga ai le aiga ma si a’u fanau i lea aso.
“O le isi tulaga, o le le mafai ai lea ona alu i le sami pe a fa’alogoina le ma’i o le tino, ae le gata i lea o le faigata ai le usu i le taeao e le’i malamalama.
“Ia ma le tau lava ma le la ma timu i aso uma.
Ae na mafaia mea uma i a Lauone ona o le alofa i lana fanau.
“O la’u fanau o le malosi lea na una’ia a’u i le fa’atino ai o a’u galuega.