Galue malosi mo lona āiga
Sa ta’ua e Oli Mua’au mai Falefa i le Fofoga o Samoa; o ia o lo’o galue nei aua le tausiga o lona aiga.
E 19 le matua o lona soifua ma o lo’o avea nei o ia ma se tasi o fa’amāma fanua mo se aiga i Falelauniu.
“O la’u galuega muamua lava lea,” o lana tala mai lea.
“Ma o lo’o lelei lava mea uma. Ou te sau a i le pasi i taeao uma aua le faiga o le galuega.”
Sa ta’ua e Oli i le Fofoga o Samoa; o ia sa a’oga i le kolisi a Anoama’a ma ina ua i’u lana a’oga; sa ia amatalia ai loa ona su’e galuega aua e leai sesi o le aiga o faigaluega i le taimi nei.
“O lo’u tama ua maliu; na maliu i le amataga o le tausaga nei. E to’alua isi o’u uso sa faigaluega ae ua le toe faigaluega la ma o la ua fai le galuega tausi i le tina o le aiga.
“Na ou mana’o a a’u ia ou te faigaluega aua foi le tausiga o le aiga.
“O lea ua ma’ea le a’oga ia ma o se la’asaga foi lea o le a agai atu ai. O le amataga lea o se olaga fou.
Na maua atu e le Fofoga o Samoa Oli o fai lana galuega fa’amama i le fanua i le aso ananafi.
“O a’u a ou te laitiiti ai le fanauga ma o lea lava ua ou galuega ma fa’amuamua le tausiga o le aiga.
“Ma ou te fautuaina fo’i le to’atele o le au tupulaga ma nisi o fanau; ia fa’amuamua ma tausi lelei o tatou aiga aua e leai sesi e laitiiti ai pea.
“Pau a na o le miti lea e iai; o le tausi fa’amaoni i si o’u tina aemaise foi le aiga atoa.”