Ua taugatā le soifuaga
O lea le finagalo o le tinā i a Salā Seneuefa, 59 le matua o le soifua o Le’auvaa i le fa’atalatalanoaga ma le Fofoga o Samoa i le aso ananafi.
Na afea ananafi le tinā ma ia ta’ua ai o lea le mafua’aga o le i ai o le faletapoleni i lumāfale o le aiga ina ia mafai ai lea ona fa’atau atu nisi o fuala’au aina aua le tausiga o le aiga.
“Ia e pei o lea le tulaga ua i ai le taimi lenei, o lea lava ua matou taumafai mai luma nei ia e fa’atau atu ai koko, o fa’i , esi ma nisi o vaega e pei ona outou silasila mai ai.
“Out te iloa lava e a’u ia o le tele o tagata e pei e matamuli i le fa’atinoina ai o nei vaega, ae i a te a’u ia a leai nai sene o lo’o maua atu luma i’inei.
“Ia e tele se ‘a’afiaga o aiga, aepeitai e moni lava e le tele se tupe e maua mai ai, ae o le itu pito sili o lo’o mafai ona fesoasoani ai so’o se vaega mo le tausia o aiga.
“E tele lava la na la’u mai luma nei vaega nei mai lo matou aiga, ia e feololo lava nai fa’atau latou te afea mai.
“Ia e i a ita lava le faitalia e tu’u ai lalo tau o vaega nei, ina ia aua ne’i fo’i se isi, ia alu lava ma ave se fuala’au i lona lima.
O lona finagalo o le galulue fa’atasi ai o aiga o le a faigofie ai so’o se taumafaiga.
“E pei o lea le agaga ia te a’u, ia mafai ai lea ona fesoasoani le aiga ia ma le tele o vaega o lo’o i ai le taimi lenei e pei o mea fai o le nu’u ekalesia ma le tele lava o le mau mea fai.
“Ia aemaise ai lava le fesoaosoani ai pili o le fanau o lea fo’i la’a amata lenei tausaga, e lelei lava le tago atu le ato ia ae o lo’o i ai sina seleni mo nai fanau.
“E le o se taimi muamua lenei ua matou fa’atinoina muamua ai vaega nei.
“E fa’afetai i le Atua ia o lea lava le agaga i a te a’u ia le tinā e le gata e galulue e galulue ae o matou o le au nofo fale.
“Ia lelei so’o se vaega e mafai ona fa’atinoina.
“Ia ou te iloa, e vave a le fa’atauina o vaega nei, aua e tele lava na la’u e tagata.