O le tautua e sili ona atamai, o le taule’ale’a e toaga i le fale o matai. O le mau lena ma le talitonuga faa Samoa i aso la. O aso foi la anamuā anamuā lava, sa le mafai ona tuua e Iosua lona tiute ma ona faiva faataule’ale’a sa femulimulita’i ma tautua ai i lona matai o Mose; e oo lava i nofoaga ma itu aso e fesilafa’i ai Mose ma le Atua, e le misi ai Iosua. I le tala nei, ua uma le fesilafa’iga a le Atua ma Mose. Ua fo’i atu Mose e logo le nuu; a o Iosua, le atalii o Nuno, o le taule’ale’a, e le i alu ese lava o ia i le fale ie.

O le tōfā a le matai i le fale ie, e le tatau ona tuufua. A o le vaai foi a Iosua, o le ute lea o lana tautua, o le fale o le Atua. O ā ni manogi o i le fale o matai? A o ā ni lelei o i le fale ie? O le falea’oga numera tasi lea o le aganuu anamua, o le fale o matai; a o le olaga faa kerisiano o aso uma, o le fale o le Atua. Fai mai Tavita, o le fale o le Atua, ou te saili ai manuia mo outou. (Sala. 122:1,9) Samoa, poo le a lava le ituaiga fale ua faapaiaina ma ta’ua ai le suafa o le Alii lo tatou Atua, o iinā e saili ai vavega ma faamalologa ma faamanuiaga mo lou ola. Po’o le fale piliki, fale tioata, fale taavale, fale tapoleni, fale laupola, o iai lava le mamalu o le Atua Silisili ese. 

O fale ua faia i lima o tagata, a ua iai le mamalu o le Atua. Ua le fia alu ese Iosua ma le fale ie. Ua lagona e le taule’ale’a ua tumu le fale ie i le mamalu ma le paia o le Atua. Ua i le fale ie le mana e fai ai mea uma. Ua iai le alofa ma le faapalepale o le Atua mo le nuu faalogogatā ma le loto ma’a’a.

Ua ta’oto ai faamanuiaga mo ē saili ma le amio sa’o i le Atua. O Iosua, o le auauna malosi ma le faamaoni a Mose. O lana vaai ma lana faalogo sa faatamaoaigaina ai e le Atua lana tautua. Sa ia te ia le faauuga a le Atua na te iloa ai le tofā poto a le Atua ma lona silisili ese i mea uma. Ua i lona loto foi faamanuiaga a le Atua mo lona nuu.

E le i fefe Iosua i ni faafitauli ma ni faigatā e faasaga mai lana tautua faataule’ale’a. E le i fefe foi pe pala’ai e tautala i le mea moni (Num 14:6-9), auā e masani i le fale o Ieova. E fiafia i le Atua;  e talitonu i le Atua o Isaraelu; e naunau o ia i le Atua lona faaola. O lona lototele, faamaoni, ma le mata’u i le Atua na tofia ai e le Atua e taitai le nuu i faamanuiaga na folafola e le Atua ia Aperaamo, Isaako ma Iakopo. Na o Iosua lava foi ma Kalepo tagata o le nuu o le Atua mai Aikupito na mafai ona o’o ma tulauele’ele i laufanua o Kanana.

O vavega ma faailoga tetele na faia e le Atua ia Mose, sa faapea ona faia e le Atua ia Iosua. O lelei ia ma faamanuiaga Samoa, e maua e le tagata tautua e faamaoni lona loto i le Atua, ma fesaga’i ma faalogo i le Atua i taimi uma.

Manatua le mătua o le lauga a Iesu i luga o le mauga, “Saili muamua le Atua ma lona mālō, ona e maua ai lea o mea uma” (Mat 6:33). Ae ‘anau Tavita, “E tasi le mea ua ou ole atu ai ia Ieova, ia ou nofo i le fale o Ieova i aso uma o lo’u ola” (Sal 27:4) Oka, maumau e, pe ana o lau momo’o lea Samoa! Pe ana mafai ona moe le palemia, le minisita, le faipule, le CEO, taitai o Ekalesia, ma faifeau i le fale tatalo, i le fale o le Atua i se aso se tasi, Oka! E sasa’a uma e le Atua faamanuiaga, o le olioli ma le filemu i si o tatou atunuu.

E le ‘ina a fia nofo pea le atalii a Nuno i le fale faapotopotoga, auā ua iai mea uma; le atoatoa o le Atua. Le tioa naunau le fai Salamo i le fale Ieova, fai mai Tavita, “……ina ia ou iloa ai le matagofie o Ieova, ma ou saili i lona afioaga paia” (Sal 27:4)

Ioe, soo se tautua lava e oge i le agaga mafuta i le Atua, e le sa’oloto lona olaga. Poo le a lava le tele o au mea ma le lelei o au pisinisi, e te oi lava. E te le sa’oloto. Auā foi e le tali lou malosi ma ou tofi i se filemu mo oe. Ona o le fale o Ieova, ou te saili ai le manuia mo oe (Sal.122:9). E le o finau Tavita i se masina po o se tausaga. A o aso uma o lona ola o loo tagi ai i le fia nofo i le fale o Ieova. Ae faauta i le toatele o kerisiano taulagi a Samoa. Uma lea lima tausaga  o le paea’iga, e le mā’ona . e uma le tolu tausaga o le konekarate e le faamalieina.

Uma tausaga faatapulaa, ae toe faalaiti tausaga! Sōlē, sesē le faatafunaga na e nofo ai lou mana’o. E le o fale kalapu ma mea faafiafia o le olaga nei e maua iai lou saolotoga. E le o le tuinanau leaga o le tino ma manaoga i’uvale o le olaga e fofōina ou tigā. E le o le fasi avā ma le sauāina o fanau ma le to’alua e maua ai se leleiga. O la Paulo i lona atalii o Timoteo, ia e faamasani i le amio Atua (1 Tim. 4:7). A o le amio Atua, o le amio lea a le tagata e masani i le fale o le Atua. Le tagata ua ia iloa le matagofie o le Alii ma lona mamalu.

E pupula mai ua iai le paia o le Atua. E tautala mai ua logolelei i le mamalu o le Silisili Ese. Ua ia te ia le faauuga a le Atua e faasoa atu ai male poto ma le alofa i lona toalua, i lana fanau, i lana aufaigaluega,  i lona aiga,  i lana aulotu. Manatua le upu a Iesu, “O lē tumau ia te a’u ma a’u ia te ia, o ia lava e fua tele mai. Afai tou te tumau ia te a’u, a tumau fo’i a’u upu ia te outou, o mea uma lava tou te manana’o  iai, tou te ole atu ai, ona faia lea mo outou” (Ioa. 15:5,7). Ua naunau Iosua e nofo i le fale ie o iai le mamalu o le Atua, auā e mălie ai le mana’o i mea lelei uma.

Samoa e, to’aga i le fale o le Atua. Na uma ona faafesāga’i o Mose ma le Atua faapei o le tagata ona talanoa i lana uō, ona fo’i atu lea o Mose e tautala i le toagalauapi a le nuu, a o Iosua, le atalii o Nuno, o le taule’ale’a, e le i alu ese lava ia i le fale ie. Ona o le fale o Ieova lo tatou Atua, ou te saili ai le manuia mo oe.

Amene

7737063