Mamao mai le nofoaga o maua ai le suavai
O le tele lava o tulaga ua oo ai le faasea o tagata sa fai ni a latou faatalatalanoaga ma le Fofoga o Samoa e faatatau ile vai.
O nisi o mafuaaga faapea o le le totogiina o pili, ao isi e faapea e le atu i o latou maota poo nuu le tosoina o le vai ole malo.
O Asosa Tineiafi mai Nofoalii ma Siusega o se tasi o loo manaomia se fesoasoani ile suavai.
“O matou e mamao mai a ma le aai le matou fale,” o lana tala lea ile Fofoga o Samoa.
“O le aai la lea e ola mai ai le vai ae o na foi na e gata mai ai le tosoina o le vai a le malo.
“Ia o le matou aiga a ia e faamoemoe lava ile vai mai le timu ile tele o taimi.”
Sa taua e Asosa o le latou aiga e iai le latou tane vai ae peitai e tele a ona sefe le vai lena mo mea taua e pei ole faiga o meaai ma vaiinu.
“O le matou tane vai sa maua mai le Koluse mumu.
“E sefe a mo meaai ma vaiinu.”
O Asosa e toavalu le fanau ma e toatolu latou o loo faigaluega i atunuu mamao.
E fesoasoani foi lana fanau ia te ia ma e fai lava ma lafo mai tupe aua mea e fai i totonu o aiga.
O lana ulumatua e 22 le matua o le soifua ma o loo faigaluega nei i Niu Sila.
O se fiafiaga tele lea ia te ia aua o loo galulue lelei lana fanau.
E faapena foi la ile tama aua o loo avea o ia ma sikulati aua foi sina seleni e faasoa mo le aiga i vaiaso uma.
“O loo lelei a mea uma ae pau a na o le faafitauli o le leai o se suavai mautu.”