Avanoa le au maua
O le Atua o lo’o tatou tapua’i ai o se Atua Alofa, ma o se Atua Tali mana’o.
O le saunoaga lea a le ali’i o Aneliu Iosua mai le afioaga o Puipa’a.
Na taua e Aneliu Iosua i le Fofoga o Samoa o ia sa faigaluega muamua I le kamupani o Yazaki, lea e le’I leva ona Tapunia.
Na fa’aalia mai e Aneliu Iosua I le Fofoga o Samoa lona agaga fa’agae’etia ona o le avanoa ua ia maua ina I le Matagaluega o Tine’imu I Samoa.
“Ina ua tapunia le kamupani o Yazaki, na lagona le fa’anoanoa ma le le mautonu I se gaioiga e fai aua se isi galuega aua le tausiaina lea o le matou aiga.”
“E fai se tele naua o tusi talosaga na ou talosaga atu ai mo se galuega fou mo a’u ae fa’afetai lava ua tali mai talosaga molia o a’u lea e amata i le vaiaso fou I le matagaluega o Tine’imu i Samoa.”
Na fa’aalia mai foi e lenei ali’i 24 tausaga mai le afioaga o Puipa’a lona misia lea o lana galuega muamua sa iai I le Yazaki.
“Ua misia lava le kamupani o le Yazaki I lenei Vaitau aua pei lava na’o le pau lava lea o le fa’amoemoega sa iai I lena vaitau aua le tausiaina o le aiga.”
“Na ou faigaluega I le Yazaki mo le tolu tausaga soso’o ma ua tele lava ni mea aoga na ou maua mai I le Yazaki ae ua ou fiafia foi mo la’u galuega fou lea o le a ou aga’i atu ai I le vaiaso fou.”
Na fa’asoa mai foi le ali’i o Iosua i le Fofoga o Samoa I mafua’aga o lona naunau e su’e sana galuega fou.
“Ua nofo lava I le fale talu ona tapunia le Yazaki ae ua le toe tutusa foi ma le olaga nei, ua le mafia ona fesoasoani atu aua le tausiga o le aiga ma ua le gafatia ona fa’atau mea o lo’o ou mana’o ai lava ita ia.”
“O le isi lava mafua’aga na matua finau ai lava I se galuega fou ona o le taugata lava o le soifuaga ua iai nei le tatou atunuu aemaise le tau o fa’alavelave I aiga ma pili aoga.”
Na fa’afetaia ai foi e le ali’i ia Iosua le Tama I le Lagi aua le avanoa le au maua ua ia manuia ai I lenei vaitau.
“Ia o le tatalo lava le mea sa fai a’o taumafai e ave tusi talosaga ia lea ua tali mai ia Viia ai pea le Tama I le Lagi I lona tali mana’o ma lona fa’asoa.