O le maua ai o le fa’atalatalanoaga a le Fofoga o Samoa ma Dee Sanele o Fiaga o Aleisa i le aso ananafi na ia fa’ailoa ai nisi o vaega taua o lo’o fa’apea ona ia fesoasoani ai i lona aiga.

“O le itu moni lava ma le mautinoa, ia o lea lava le tulaga o lo’o i ai uta nei i Aleisa, e leai lava se vevesi o i ai, ma ele tele fo’i ni tupulaga feoa’i vale o i ai.

O Dee o lo’o nonofo ma nisi o le aiga i le va’aiga lea o ma’umaga ma lafu manu o nisi o le aiga.

“Ia o le tulaga masani lava o lo’o o matou i ai le taimi lenei, o le taumafai lava ina ia vave ona fa’atino o feau i le taeao ae le’i taitai le aso.

“Aua e pei o le uiga o la’u tala o le la lava e taumafai ia aua ne’i afaina ole soifua maloloina ona o le ‘a’asa o le la.

Na ia ta’ua o le taimi lenei o le taumafai lava e fa’amaoni o a feau ma tiute ua i ai.

“Ia o lea lava le tulaga o lo’o fesoasoani ai aiga, aua o a’u le isi tagata e molimauina le faigata o le soifuaga pe a leai se galuega.

“A misi mai le galuega ae o le itu taua o le mafai lea ona maua o se vaega e fesoasoani ai aiga mo feau taua mai lea aso i lea aso.

O le itu mautinoa o le i ai lea o se alagatupe e mafai ona tausia ai aiga.

“E pei o le auga lava lea o le galulue malosi ai o tatou tagata aua o le tupe e fa’amoemoe ai le tele o vaega.

“O mea’ai lava ia e maua, ia ae fiainu fo’i sina iputi i le isi taimi lenei, o lona uiga e tatau ona fa’atau sina suka e fai ai se ti.

“O lo’u ia iloa i ai, ia mafai ona fa’atino o so’o se vaega e tusa po o le a lava le tulaga e mafai ona o’o i ai.

“Ia ma o le tupe fo’i e mafai ona fesoasoani i a ita e fa’atino ai se mea o loto i ai, ae o lo’o sologa lelei mea uma i lo matou pito nei.