Riotia e Pai Mulitalo Ale

Fa’aliliu e Maiava 

Ua tu’umalo Lilomaiava Fou Taioalo, le sa avea ma Komesina o Leoleo talu ai, ma ua tu’ua ai le Aiga atoa i le agaga fa’avauvau tele.

Na tu’umalo Lilomaiava i le itula e lua i le vaveao o le Aso Lulu, a’o ‘auina atu i le Maota Gasegase i Mato’otua.

Na fa’amaonia e Joe Taioalo, le alo o Lilomaiava – o se ali’i-leoleo fo’i, le maliu ai o lona tua’a. 

“E le mafai ona talanoa atu lo’u tina i le taimi nei,” o lana fa’aaliga lea.

“Pau le tala e mafai ona ta’u atu, e moni ua uma le ola o lo’u tama.” 

Na ta’ua fo’i e Joe, o lo’o i le falemaliu le tino-maliu o Lilomaiava e fa’atali ai se aso e faia ai ona sauniga mulimuli ma lagomau ai loa.

E tu’umalo nei Lilomaiava, a’o soifua lona faletua o Suititi Taioalo ma o la alo e to’asefulu ma fanau-a-fanau.

Na fa’amutaina le ‘au’aunaga a Lilomaiava i le Matagaluega o Leoleo i le 2014, ina ua fautuaina e se Komisi Su’esu’e le fa’amutaina o lana tautua.

E tu’umalo nei le sa avea muamua ma Komesina o Leoleo, ae o lo’o fa’atali se fa’ai’uga o lana talosaga na tu’uina atu i le Fa’amasinoga, e fa’asaga i le Loia Sili, le Komesina o Sulufa’iga ma isi o le Komisi Su’esu’e, e tusa o le fa’amutaina o lana tautua. O lo’o fa’atali se fa’ai’uga o lea mata’upu.