E lua vaega taua lava o soo se a’oga. O le iloa faale mafaufau (theory) ma le iloa faatino (practical). E pei o le taualuga lava lea ma le taunuuga o le olaga faale taumafai, o le faigaluega i mea uma sa a’oga ai. O le faatinoga o le poto sa a’oa’oina ai.

Ua uma le a’oga a Iesu ma ona soo. O le a fo’i Iesu i le lagi, ae aga atu le au soo e su’e ni suli o le malo o le lagi. O le faatonuga, ua ta’ua o le faatonuga silisili: “Ia outou o atu e fai nuu uma lava ma soo….”

E tatau ona malamalama le mea lea – E le mafai ona e faia ma soo se isi tagata pe afai e le o oe o se soo. E le nanea foi se faauuga poo se papatisoga e te faia, pe afai e le i faauuina, e le i papatisoina foi oe. Na o le soo lava na te iloa lelei, ma malamalama i le finagalo o lona matai. O lona uiga, o e ua valaauina faapitoa mo le galuega a Keriso

O le upu, ekalesia, e faavae mai i le upu Eleni o le, “ecclesia,” e faauigaina, o i latou ua valaauina’ (the called out ones). E filifili e Iesu Keriso tagata e ta’ua ai lona suafa (galu.15:14). O le Ekalesia, o i latou ua tuua le lalolagi ae faasaga tonu i le Atua. O i latou ua talia ma le alofa faamaoni Iesu Keriso i o latou olaga, ma tuuina atu i latou i le pule a le talalelei e auauna ai mo le faaolaina o tagata.

O e ua tautino o Iesu Keriso o le Alii ia ma le Faaola; ma ua latou molimauina atu Iesu Keriso i a latou upu ma a latou amio. Soo se faapotopotoga e faavae i le Atua; e totonugalemu ia Iesu; ua fai Keriso ma o latou tumutumuga; ua ta’ua lea o le Ekalesia. O lona uiga o le ekalesia, ua fausia i tagata talitonu ma faatuatua ia Iesu. A o Iesu Keriso, o le Upu ia o le Ekalesia. I le, o tagata uma ua fausia ai le ekalesia, o le tino ia o Keriso.

O le Upu Ola, o le upu lea sa iai lava i le amataga a o le i iai se mea e tasi i le lalolagi. O le Upu lea sa mafolafola ma maioio lelei ai mea taitasi uma o le foafoaga. Sa malamalama ai le pouliuli. Sa i le Atua i le amataga. Na ia faia mea uma lava. Sa ia te ia le ola; o le ola foi, o le malamalama lea o tagata (Ioa.01:01-04).

O le faatonuga mulimuli, ia poo le aotelega lea o le faamoemoe o Iesu ina o le a afio a’e i le lagi, “Ia outou o atu….” O le “o,” e faasino i e ua valaauina poo le au filifilia. [O lea ua tatou agai atu i tiute, ma faiva o le Ekalesia.] O le faauuina o le au filifilia ma le papatisoina o le ekalesia i le Suafa o le Atua le Tama, ma le Atalii, ma le Agaga Sa, o la’ei na o le ō ua ma’ona; ua mafatotoga; ua lava saunia.

O le Fe’au, “Ia fai nuu uma lava ma soo” O lona uiga, ia fai tagata uma ma ata o Keriso. Ia foliga i le Alii le amio ma le ola. Ia faa – ekalesiaina lanu ma gagana uma. Ia faaolaina le lalolagi uma ia Keriso. Le au uso e, ’aua e te faailoga tagata. ’Aua e te alofa faapito. O lau feau, o nuu uma. O lona uiga, o lanu uma; o tagata uma. ’Aua e te tala aiga. E te le i alu atu e su’e ni ou soo, a o soo o Keriso.

Lua, ia faailo lupe o le seuga. “Ia papatiso atu ia te i latou i le suafa o le Tama, ma le Alo, ma le Agaga Paia.“ E tasi lava le pule e fai ai o le pule mai le lagi. Ua le o se igoa foi o se tagata poo se igoa o se lotu e faauu ma papatiso ai. O le suafa lava o le Atua Tolu Tasi. Le Ekalesia e, o tatou o le tino. O le Ulu o Keriso. O lana pule i le lagi ma le lalolagi e mai luga (f.18).

E le i tuuina mai i le tino se pule. Na te le i faatagaina tatou e folafola ni a tatou pule. ’Aua alii! Soia le faalālă o lou igoa, ma ’aua le faaaogaina soo igoa o le au matutua e lalafi ai. Taatia ou faailoga ma ou gafa tau tupu, ae faalogo i le Agaga o le Atua, ma faaaoga na o le suafa o le Tupu o tupu. Pau lea o le mana e faamau faailogaina ai le fanau o le toe fuataiga.

Tolu, “ia a’oa’o atu ia te i latou ia tausi i mea uma sa a’oa’oina ai ouotou.” Tatou te mulimuli lava i le ala ma le faasinomaga mai lo tatou Faiaoga Sili. “Auā e le mafaia e se tasi ona tuu se isi faavae i lē ua uma ona tuuina, o Iesu le Keriso lea”(I Kori.03:11)). O le Malosi lea sa fau ai e Paulo le ekalesia i Korinito, o Iesu Keriso. O le faalogo ma tausi lelei i mea uma ua fofola mai e le Alii e fai ai le galuega, ua sili lava lea i lo le ga’o o mamoe po’a (I Sam.15:22). Auā foi o le Upu Moni lea e maua ai maopoopoga.

O le Upu lea na liutino tagata ina ia maua tagata mo le faaolataga. O le Upu na fasiotia i luga o le laau ma po tolu i le tuugamau, ae na toe tu manumalo, auā sa ia te ia le ola; o le ola foi o le malamalama lea o tagata (Ioa.01:04).

I le, o le ute atoa lea o lenei faatonuga silisili. O le faatonuga mo le au soo, ou te manatu, o le faatonuga foi lea mo le Ekalesia ma tatou uma ua filifilia ma faauuina i le suafa o le Tamā, ma le Atalii, ma le Agaga Paia. Ia malamalama tagata i le feau. Ia soo le ola ma le ola. O mea sa aooga ai outou, ia aooga ai foi latou mai ia te outou. O mea sa fafaga ai outou, ia maoona ai foi latou. Le au uso e, a sa’o le upu, e mau foi le tuu. 

O le Upu, e agamalu; e filemu; e alofa; e onosai. O ona tamaaliiaga, o le faamaoni ma le amiotonu.

Ia manatua lelei, e tasi lava le sini autu na a’oa’oina ai e le Alii lona au soo; ia ola tagata uma i le Upu Ola mai le Atua. “A’oa’o atu… ia tausi i mea uma ua ou fai atu ai….” Pau a ia o mea e ta’u atu ma faailoa i tagata.

Ta’u iai le alofa faamagalo o le Atua. Le alofa faapalepale; le alofa faaola o Le ana i tatou. ’Aua le a’oa’oina tagata i mea valea ma mea sese e oo atu ai i le faafanoga. E le o le tausiga o oe; a o le finagalo o le Atua ma ala tonu i le faaolataga, na fai atu ai Iesu ia te oe. O ala o Keriso e fīta. Ae tonu; e paia; e mamā. O ala e tauleleia; e viia. O lona finagalo ia e sa’oloto, ma ou manuia.

Tatou ua valaauina, ia tautuanā le galuega. E le o se galuega su’e tupe, a o agaga. Ia fai tagata uma ma soo’ E le o le soo – tupe, a o agaga mo Keriso. O le galuega e tuu atoa iai lou ola, ae le o le matamata ai i le lailai o isi ola. O lou ola mo le galuega, ae le o le galuega mo lou ola. Na masaesae ma masofasofa le Faaola i lou lalolagi ina ia tuu mălie lou ola! e le i taofia e Iesu ni lelei. Na tia’i lona ola ma faamativaina o ia ina ia maua tatou uma mo le Atua (God’s riches in Christ expense) Fai mai Paulo, “Auā ua outou iloa le alofa tunoa o lo tatou Alii o Iesu Keriso; sa tamaoaiga ia, a ua faamativaina ona o outou, ina ia tamaoaiga outou i lona mativa.” (I Kori.8:9).

O le toe upu: Ia ō mata’alia; ma ia ō saunia. O le tino o Keriso (Ekalesia), o le tino maosiosia; ua masani ma tiga. ’Aua le ō masalosalo (f.17), a ia talitonu i le ola tatalo. Ō fetāla’i, ae le ’o le ō faalautata’i. ’Aua le ō faalautagitagi, a ia ō gaua’i. E lē galulue fua outou; faauta foi, ou te ia te outou uma lava, e oo lava i le gata’aga o le lalolagi.

Amene

7737063/7783782