Share

Ua fa’amaonia mai nei e Peter Datt le uma ai lea ona tu’uina atu e le Fofoga Fetalai le tupe lea sa nofo aitalafau ai i a te ia e $52,000, ma ua uma fo’i ona soalaupule ona vaega uma.

O le Aso Lua na se’i mavae atu nei sa ta’ua ai e Peter ua savali nei i le lua  tausaga talu ona ia tulituli La’auli Leuatea Polataivao Fosi Schmodt i lenei aitalafu.

O le aso ananafi na logoina mai ai ua ma’ea ona toe teuteu vaega uma lava  i le va o le Fofoga Fetalai ma Peter.
 
“Ua uma ona ou talanoa i le loia a Peter ma ua uma ona fo’ia lea tulaga e pei ona i ai nei.”

O le sauni atu ai o Peter e tu’ua le atunu’u sa ia fa’ailoa mai ai le  uma ai lea o ana pusa onosa’i i le pisinisi lea o lo’o umia e le Fofoga Fetalai ma lona ‘aiga.

O Peter Datt o ia o le Fa’atonu o se tasi o Kamupani tau fela’ua’iga e igoa o le Global Imports and Exports lea o lo’o latou tu’uina mai i totonu o le atunu’u oloa mo le Supamaketi o le Maota o Samoa.
 
“Ua savali nei i le lua tausaga o lenei aitalafu, ae lipi ola lava ma sina sene ua totogiina mai, ua tele taimi na ou tu’u avanoa ai, ma onosa’ia nei vaega uma, ma ua matua’i leai lava se onosa’i o toe i ai i le taimi lenei.”
 
“Sa ou o’o atu i le loia lea na tu’u ai le o’o atu ai o La’auli e totogi ai tupe o lo’o mana’omia ananafi, e leai lava ma se tupe ua totogiina.”

Sa fa’ailoa mai e Peter o ia ua matua’i leai se to’a o lona mafaufau ina ua ia faitau i se tasi o lomiga o le Samoa Observer na fa’aulutala atu ai se saunoaga a La’auli i le ono se’ia ai lea o nofoa o nisi o le Palemene lea o lo’o ‘a’afia i fa’amasinoga.

“O lea ua ia saunoa e fa’asinosino lima ai i isi tagata ae le se’i va’ai ifo ia i a te ia”
 
“O lenā, e tele mea o lo’o ia nofo aitalafau i a te a’u ae o lo’o fa’asinosino lima i isi, ae na te le faia le amiotonu, e matua’i le fetaui lava la’u faitau atu i nei lafoga o lo’o ia fai atu ai i isi tagata ae le’o mafai ona sau e totogi mai le tupe o lo’o nofo aitalafu ai”
 
“O le tele o taimi sa ou fesoasoani ai i a te ia, ma o le tele o taimi ou te vili mai i ai e tatau lava ona ia fafauina se mafua’aga e alo ese mai ai mo le totogiina o le tupe.”

Sa ia ta’ua e tasi ma le afa tausaga sa ia toe tu’uina atu i a La’auli ma na maua loa lana lo’ia i le tolu masina ua mavae o ia la lea sa tu’uina atu ai loa i lana loia le tau’aveina mai ai o lea vaega.
 
“E pau lava lo’u mana’oga o le  totogi mai ai lea o le tupe o lo’o ia nofo aitalafu ai i a te a’u, sa ou manatu o le a ia le faia lea tulaga ona o le tele o taimi na ou fesoasoani ai i a te ia ae o lea ua fiu e tulituli.”
 
“Ua savali nei i le lua tausaga, ma o le aofa’iga o lo’o ia aitalafu ai o se tupe tele lea, ae o lea na o le pelopelo mai.”

O le fa’atalatalanoaga ma La’auli i le telefoni sa ia le mafai ona fa’amaonia mai pe tete’e fo’i i tu’u’a’iga ua faia e Peter, pau lava le tulaga na ia fa’ailoa mai o lo’o i ai nisi o mataupu o lo’o i ai fa’atasi ma tulaga nei e pei ona ta’ua mai, ma e le’i fia fa’ailoa mai sona manatu e fa’atatau i ia tulaga.

Share

Please Register OR Login to comment.


Comment Policy: Please read our comment policy before making a comment. In short, please be respectful of others and do not engage in personal attacks. Otherwise we will revoke your comment privileges.