|
 E iai taimi e toloi ai a tatou galuega ma le atoatoa faatinoina ai nisi o o tatou tiute ina ua tatou vaai i nisi na muamua, poo se isi e maualuga atu nai lo oe, ia poo le manatu foi i le va fealoa’i. O le lagona foi lea sa faaluafesasi ai Ioane le papatiso.
“O au nei, ou te papatiso atu ia te outou i le vai ina ia salamo; ae peita’i o le mulimuli mai, e silisili o ia ia te au, e le aoga au ona tauave i ona seevae.”
(Mataio. 01:11). Faafeai faaeaea! A o le finagalo o Iesu – Ia fai lau galuega, “…aua e faapea ona tatau ia te i tatou ona faataunuuina o mea tonu uma.”
Na amata le galuega a Ioane i le aga’i atu i lea itu ma lea itu, ma alagaina le saunia ma le tapenaina o tagata uma mo le maliu mai o Iesu. O le galuega o aso uma. Soo se nofoaga, fafo, fale, faoa aai, o le vao – ae to’a lava i le vai o Ioritana.
O le maliu mai o Iesu mai luga i Kalilaia, tau mai o loo fai le papatisoga a Ioane i le Ioritana, na manatu ai Ioane, o lea ua sau le tagata tonu e ana ia le galuega. “E ao ona e papatisoina mai o a’u, a ‘e maliu mai ea oe ia te a’u?” (f. 14)
E taua tele i le Atua le faaaogaina o o tatou tagata. Ua tofu i tatou ma taleni mai le Atua. Ua faaagavaaina foi i tatou e le Atua i ia taleni ma faiva ua faasoa mai ai. O faafitauli o loo tupu pea ia i tatou, ua tatou
- paie ma momoe pea
- faalogologo leo (ua faalogo i tagata ae le o le Atua)
- faatalitali i se faatonuga mai e matutua.
- mama (matamuli) e faailoa Iesu i tagata
- tuu Iesu ae faaali tatou
- faatalitali sei oo i le Aso Sa?
O le a lau galuega?
O ‘e silafia, soo se galuega o loo e galue ai, o loo iai le avanoa e te molimau atu ai i le alofa faaola o Iesu Keriso?
Uso, o loo fia maua oe e le tagata o loo saisaitia i ona mafatiaga!
Vaai foi ia Ioane ma lana galuega, e le i faapu moomoo ona fai. E fai iinei, e fai iina. E fai i lea itu, faasolo atu i lea itu. E le o se galuega moe. E le o le nofo ai a, nofo ai a! E tu ma savali. O le galuega na faailoa ai le faamaoni o le alofa o Ioane i tagata uma. Ia faasaoina tagata mo le Alii. Sa ou faamanatu atu i le
Aso Sa ua mavae, e tasi lava la tatou feau. Ioe, a’o le popolega, e mafai faapefea ona faaolaina le lafu mamoe, pe afai e oti le leoleo mamoe?
Uso, o le faamanatu o lenei Aso Sa – Ia fai lau galuega. E le o le fai –
- tau ina faataunuu
- ina ia maua mai ai sona taui
- ta’uta’ua ai oe – ‘Aua!
Fai lau galuega, ina ia tonu mea uma i le Alii e ana le galuega.
Na taofia e le lotu Egelani i Peretania ona toe lauga John Wesley i soo se falesa o le ekalesia. Ona faaaoga lea e John Wesley lana solofanua pa’epa’e, o lana pulelaa lea, sa lauga solo ai i lea magaala ma lea magaala. Sa faitau afe ma afe tagata sa liliu ma faaolaina ai. Ua faapea le upu a lea auauna ta’uaogaina – O la’u aulotu, o le lalolagi lea (The world is my parish).
O le galuega folafola o le talalelei, e le na o le pulelaa. E taua lou la’a. O le galuega e fai –
- i totonu o lou aiga
- i lau galuega/aoga
- i le maketi, ala tele, paka
- i falema’i, falepuipui, tagata matutua (matua tausi)
- i ala o femalagaiga (pasi, vaa, vaalele, etc.)
O le galuega lena sa fealua’i solo ai Ioane le papatiso. E fai i soo se mea. Ioe, o loo i mea uma lava le Atua. E taua le va fealoa’i. Ae sili atu ona taua le faaaogaina o lou tagata i taleni ma faiva ua avatu e le Atua ia te oe e te vivii ai i le Atua Soifua. ‘Aua tatou te fefefe e fai le galuega a le Atua i le faamaoni ma le mea moni ua finagalo ai le Atua. ‘Aua foi le gugu ina ua maona i tupe ma faaaloaloga! Fai lau galuega – ona e tatau ona faataunuuina o mea tonu uma.
O tatou uma lava, o molimau i tatou o le talalelei. O le fesili – O ‘e malamalama ea i lau galuega? Poo e iloa lau galuega? O mea tonu uma o loo tautalagia e Iesu – o mea lelei ma mama ua alagatatau mo le,
? saolotoga o ona tagata
? manuia o le fanau a le Atua
? galuega faaola i tagata.
E le o lau galuega o le –
- faati’eti’e o avega i ulu o tagata
- saua i le ola o tagata
- faamoemoe e fai e tagata mea uma
- pule malosi i le saolotoga o tagata – LEAI. IA FAIA MEA TONU UMA.
O la le aposetolo, “o le mea o iai le Agaga o le Atua, o iai le saolotoga.” A o lena foi saolotoga – e mama, e tonu, e iai foi le olioli ma le manuia mai lo tatou Alii o Iesu Keriso.
‘Aua le tapunia ou falesa i tagata. ‘Aua foi le tapunia lou alu i tagata. O la tatou galuega moni lea – alofa i tagata – faaola tagata. Fai lau galuega, ma faataunuu mea tonu uma.
Amene. Back
|
