Lauga - Ua mānu tumutumu o mauga

By Rev. Petaia Setu 31 December 2017, 12:00AM

(Kenese 8:5)

O upu a toeaiina, sa taumate I le ‘ete ; a o faitau masani a le atunuu u aso o o le to’a lelei, ua lafoia ataata o Taulelei. O le pese a le fai Salamo, Lo’u agaga e, ia faamanū atu ia Ieova ; o mea uma foi e I totonu ia te a’u ia faamanū atu I lona suafa paia. O le loto faafetai. E faitau e le au matutua faamanuiaga ma le taitaiga alofa a le Atua ; ua mou atu ao valevale , ae fotua’I mai ao o Samoa. O le mau o le tusi nei o Kenese, ua mauiui, ma saga mauiui atu lava le vai ; ua to’a ai le vaai I luga o le mauga o Ararata. Ua mauiui pea ma ua faaititia le vai , seia oo ina mānu tumutumu o mauga.

O ai se tusa ma Ieova le Atua o Aperaamo, Isaako, ma Iakopo? E silisili ese lava Ieova! E matautia Ieova o “au. O lē fetalai ane, ia faapea, ona faapena lava lea. O matagi ma mafui’e, o uila ma faititili, o lologa ma tafega, o galuega ia a lona silisili ese. Fai mai le fai Salamo ; ua liua e ia le afā I le malū, ua taoto ia te ia le au peau. O lana pule e le fuatia e se tagata ; o lona finagalo e a le tu e a le tu lava ; o lana faamasinioga e tonu ia (Salamo 33:5,11 ;107:29) Fai mai le tusitala o le Kenese, Ua manatua e le Atua Noa.

Ua liloia le lalolagi atoa I le vai I aso e selau ma le limagafulu. O loo faaopeapea Noa I luga o le fogatai. Samoa, e manatua oe e le Atua I lona alofa faaola, ae le manatua e Ia au amioga. E tumu le Atua I le alofa, auā o lona lea natura paia (1 Ioane 4:16). Ua I’u le faamasinoga a le Atua I le lalolagi O Noa. O leaga ma faaletonu uma ua goto uma I le vasa loloa. O le sefulugā masina, o le taeao fou lea. E moni, ua lafoia ataata o Taulelei.  Ua ali tumutumu mauga.  Ua mānu le foafoaga fou a le Atua. Ua mavae mea tuai, ua faafouina mea uma I le pale tonu a le Silisili Ese, Aleluia !

Ua malie le finagalo o le Atua. Auā ua soloia ma faaumatia le lalolagi tuai sa tumu ai le fua. O le asō, ua tapena I mea fou. Ua faaagi e le Atua le matagi e faamaui atu ai le vai. Ua na punitia punāvai o le moana ma taofi uaga mai le lagi. E silafia mai e le Atua mea uma ; o manatunatu ma loto o tagata. Ua iai le salamō ; ua iai le mata’u I le Atua. Pe tasi pe lua, e iai le Atua ; e amata e le Atua (Kene. 18:32)

Samoa e, sa tatou faaopeapea I lenei tausaga mai I le tele o faaosoosoga ma faafitauli eseese o le olaga. Na fetafeaiina I tatou I le itū ma lea itū I le malosi o āu o le lalolagi nei. Ua punitia  ele Atua pule uma o le lalolagi, ma malosi eseese o siomia ai I tatou. La lea ua mauiui ma saga mauiui atu lava tafega ma le loloto sa feausi mai ai. Ua moni ā Tavita, ua taoto I le Atua le au peau (Sala. 107:19). O fea le tui o lona oti? O fea le malosi o le tuugamau? A o fea le aasa o ma’I ma puapuaga sa taufaamata’u mai I le tatou folauga?

Ua mānu tumutumu o mauga! Ua tafa ata o le foafoaga fou! Ua ilo atu mālama o le 2018. Aleluia! Ia faamanuia le suafa o le Atua o ‘au. Samoa, o lea ua to’a le tatou sā seia manifi le alititai. Na o le mea e tasi, ua mānu tumutumu o mauga. Ua saviligia tumutumu o mauga. Ua maua e ‘ave o le la. A o la le poto, e mai tumutumu mauga le sau o le ola ; ole saolotoga, o le olioli o manuia. Faafetai o ulua’I āta ia o le faafouga o luga! O tumutumu mauga. Ua mua’I manava atu iai e le Atua le manava ola o le foafoaga fou.

Ua mua I malae mālama o faamanuiaga o le ola fou. Uso e, Samoa, o ‘e vaai atu I tumutumu o mauga, poo e tau malemo pea lava I ou vaivaiga faale tagata?  Poo e iloa ua to’a lo tatou sa, poo lofia pea lava oe I āu o le pogisa?  Ua lilo Utumanu ; ua tuanai atu matagi ma afā ; ua mauiui atu faama’I ma tigā ; ua gē Satani ma ana ‘au ; auā e silisili ese le alofa ma le faamaoni o le Atua. O ai ea se tusa ma Ieova lo tatou Atua, o lē na te faaoso lona la I ē ua amioleaga atoa ma ē ua amiolelei ; ua ia faatoto ifo foi le ua I ē ua amiotonu, atoa ma ē ua amioletonu? (Mataia 6:45). Ioe, e manatua oe e le Atua.

Uso e, e le o tumutumu mauga e mitamita ai ; a o tumutumu o mauga e faatonuina ai. E manatu ai I lou olaga leaga ma lou tagata tuai ia le toe iloa. Ua goto uga I lologa o lenei sefulu ma le lua masina. O tumutumu o mauga o le faasinomaga o le tagata fou. Auā  o le faafanua lea o le alofa o le Atua ma le tapenaina o le faaolataga mo oe. O mea mamā. E manogi I le ola. E tausaafia ; e logoleleia ; e viia. O āta lafoia na Samoa o tumutumu mauga.

Ua uma ona pupuni e le Atua leaga uma ma malosi o le lalolagi sa tauau ina e malemo ma tatou gogoto ai. Ua maui atu le poto o le tagata ma le fitivale o le lalolagi. Ua ilo atu fajua a lalo. Ua tatala e Noa le faamalama o le vaa, se’I e tofo I le ‘ea fou o le ola fou, o le foafoaga fou.

Tu nei loa I luga. Tu ma le loto faatuatuta, ua tapena oe e tu laueleele I laufanua o se olaga faafouina, ua saunia e le Alii lou Atua mo oe. Tu I faamalologa a le Alii I lou tino, lou mafaufau ma lou loto. Tu saoloto ; tu fiafia. Vivii I le Atua o manuia, ua e ola ; ua tatou a’e I fanua. Faauta , ua mānu tumutumu o mauga.

 

Malo folau, Samoa

 

Laa malo I le Tausaga Fou

 

AMENE

By Rev. Petaia Setu 31 December 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>