Falepuipui le to’alua na fasia se tama-a’oga mai Fiti

31 May 2016, 12:00AM

E to’alua ali’i Samoa talavou o Barry Mafi ma Ashley Wilson ua fa’afalepuipuina nei mo le ta’i 4 tausaga ona o le fasiga o se ali’i-a’oga mai Fiti lea na fa’ata’otolia ai  mo se taimi umi. 

O lea mata’upu sa tu’uina atu i luma o le Fa’amasino Sili, Afioga a Patu Tiava’asu’e Falefatu Sapolu i le Fa’amasinoga Maualuga. 

O lo’o molia fa’atasi Barry ma Ashley ma isi sa fa’ao’olima i le tama-a’oga mai Fiti i le Aso 06 o Fepuari 2016.

O Barry e 18 tausaga, e mai Vaivase-tai a’o Ashley e 19 e mai Taufusi.

I Tolaulauga a Leoleo, na ta’ua ai, o le ali’i-Fiti sa tafafao ma ana uo i le kalapu o le RSA i Apia i le po na tupu ai le fa’alavelave.

Sa i fafo i se taimi na mafua ai ona fe’upua’i ma le to’alua le-a’o’oga lea ma i’u ai ina tu’i e se tasi o le to’alua lea le gutu o le ali’i Fiti.

Na toe fo’i le tama-Fiti i totonu o le kalapu peita’i o se taimi po o le 12 i le po na savali ai ma ana uo i fafo o le a sauni mo aiga, ae osofa’ia loa e Barry ma Ashley ma le latou vaega. Na mafai ona sao ‘ese ma sosola uo a le ali’i-Fiti ae maua ai loa na o si ali’i lea ma fuli ai loa tamaiti-femitai Samoa e fai.

Fa’atoa tu’u lava lea fia-malosi ina ua va’aia ua matua tigaina ma le-mafai ona gaioi, ona taufetuli ‘ese loa lea ma sosola. 

Sa fa’anatinati atu le ali’i Fiti i le falema’i le po lava lea ma ‘auina sa’o ai loa e fa’atino sona ta’otoga na fa’asaoina ai lona soifua.  

I lana fa’ai’uga, na saunoa ai le Fa’amasino Sili, e matua vaivai lava le tulaga tau- a’oa’oga o Ashley Wilson. Na musu lava ma le a’oga fa’atoa tausaga iva ma nofonofo ai loa i le fale, ae na maua lana galuega i le 2013 i le Pulega o Uafu a Samoa. Fa’atoa lua masina, ae le toe faigaluega ona fai mai, e tigaina tele galuega ma nofo ai loa i le latou aiga. 

O Barry Mati, na uma lana a’oga i le Tausaga 10 ina ua tete’a ona matua ma aga’i ai nofo i le uso o lona tina i Vaivase-tai ma fesoasoani ai i galuega o lana poloka i le maketi i Fugalei.

Na fa’ailoa fo’i e le Fa’amasino Sili, e le o le taimi muamua lea ua molia ai nei ali’i i moliaga lava nei o le fa’ao’olima fia-malolosi.

Sa tula’i muamua Ashley Wilson i le fa’amasinoga mo aiga i le 2014 i moliaga lava o le fa’ao’olima ma sa fa’amagalo e leai se sala.

I le 2015, na toe o’o ai fo’i i le tulafono ma toe fo’i iai se isi avanoa. Ia Mati o le 2016, na toe o’o ai fo’i i le fa’amasinoga ona o le fa’aleaga-mea ma sa fa’anofo-va’ava’aia ai mo le 12 masina. 

 “E foliga mai e te le o fa’aaoga lelei avanoa sa tu’u atu ia ‘Oe,” o le saunoaga lea a le Fa’amasino Sili. 

O Barry Mafi, sa tula’i fo’i le fa’amasinoga i le 2015 ona o le gaoi ma sa nofo-va’ava’aia mo le 12 masina.

O Aokuso o le 2015, na molia ai i le gaoi ma sa falepuipui ai mo le lua masina fa’atasi ma le isi tolu masina ona o le le-tausisia o tu’utu’uga fa’anofo-va’ava’aia.

O isi vaega na silasila iai le fa’amasinoga, o le fa’atinoga o le solitulafono ae maise le tulaga tigaina na o’ iai le na a’afia. 

Na silasila toto’a fo’i le Fa’amasino Sili i le ripoti a le falema’i sa tu’uina au - i le aofa’i o manu’aga na afaina ai le na a’afia ona o le ogaoga o osofa’iga sa faia iai e le to’alua lea ua molia nei ma le latou vaega.

E le gata sa tatau ona lava ina ua va’ai atu ua matapogia le na a’afia, ae na tia’i ai lava i le mea sa fasi ai.

Na maua e le fa’amasinoga, sa onana uma le na a’afia ae silisili ai le onana o tamaiti fa’ao’osala peita’i, e le taliaina e le Fa’amasino Sili lea tulaga ona o le ogaoga ma le tuga o manu’aga o si tama-Fiti.

Na fa’amaonia solitulafono a le to’alua lea ma ua fa’asalaina ai e tuli le la ta’i-4 tausaga e ‘ai-ga’o ai i le falepuipui. E to’aesea ai aso sa taofia ai i Tafa’igata.

31 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>