Amata-mea Ta’ita’i o Vaimoso i se fofo mo tupulaga

By Deidre Fanene 30 August 2016, 12:00AM

Ua a’e nei se tofa a’o se fa’autaga a le Afio’aga o le Tama a le Fale, le Usoali’i ma le matua, fa’apea Igoa-matua ma le nu’u o Vaimoso, e faia se fa’atatau mo tupulaga o le afio’aga, lea sa faitioina ai i le leai o se fesoasoani talu ai fa’afitauli sa tutupu mai ai e le’i mamao atu. 

Lea ua toe fafagu ma fa’aolaola le ‘Au a Tama (Boys’ Brigate), e a’oa’oina ai tomai ma agava’a ma fa’atinoga aoga mo tupulaga o le afio’aga, ma ua aofia ai ma latou i totonu o Vaimoso e le faigaluega.

Na fa’aalia e le Susuga a le Tofi, o Fale’afa Matai’a: “E le natia le ‘auai o tupulaga o le nu’u nei i faiga-kegi talu ai nei ma sa to’atele nisi na fesiligia ai, se galuega e matai o le nu’u o fai i lea fa’aletonu. O le aso la le tali o lena fesili.

“Ua tonu i le nu’u nei, o le a toe fa’aolaola le ‘Au a Tama, e mautinoa ai le fa’aaogaina tatau iai o taimi o tupulaga uma o le nu’u e aofia ai ma tamaiti nei sa a’afia i kegi,” o le fa’aaliga lea a Fale’afa.

Na ta’ua fo’i, e le na o tupulaga talavou o le a ‘auai, a ua tatala le avanoa mo latou e le-faigaluega.

“O le mea e tatau ona fai, ia ‘auai uma i le ‘Au a Tama,” o lana saunoaga lea. 

Na fa’aalia, e talitonu ta’ita’i o ekalesia ma matai, o le a tele se fesoasoani o le ‘Au a Tama aua e tele galuega ma fa’atinoga e fai, e tu’u-fa’atasi ai tupulaga uma o le a ‘auai.

“Ina ia mautinoa lava le iai o se mea e fa’aalu ai o latou taimi.

“O le a matou fesoasoani fo’i iai ina ia ‘aua ne’i tutupu mai ai nisi fa’aletonu mulimuli ane.” 

Na ta’ua e Fale’afa, o le ‘Au a Tama na ulua’i amata e le Ekalesia Fa’alapotopotoga Kerisiano Samoa, i le tausaga e 1940.

 “E le’i ‘umi ae lafo atu i le nu’u e fa’aauauina. O le taini nei, ua le o toe avea o se BB a le EFKS, a’o le BB a le nu’u ma ole ‘auala la lena e mautinoa ai, e leai se fa’aletonu e toe tupu mai i tupulaga a le nu’u.”

Sa le-fiafia tele fo’i Patele Mikaele Fonoti o le Ekalesia Katoliko Roma i le Afio’aga, ona o latou sa tutupu mai ai fa’aletonu talu ai nei, ma saunoa ai fo’i, o se avanoa lelei lea e toe afua ai se taeao fou mo latou ia ae maise fo’i le nu’u. 

“Manatua fo’i, o lou soifua, o le meaalofa mai Le Atua ma e ao la ona fa’aaoga lelei,” o lana saunoaga lea. 

“Aisea lava o le a ma’umau ai tupe ma le taimi i nei mea o kegi ae le o e su’e ni galuega e fesoasoani ai i le atina’eina o aiga? 

 “A’o le o e fa’atupu vevesi ma tele ai isi fa’alavelave, na o le faitioina ai e tagata, ta’ita’i o le nu’u ma ekalesia ma tu’ua’ina, po’o a latou mea o fai.

“Ae le o fai atu lava a-mea o e fai na mea. Ua uma na fai atu e o e fa’aaoga tatau le ola ma fai se mea aoga mo lou lumana’i, ae le o le fai o na mea le-aoga na o le ta’uvalea ai o matua ma nu’u. 

 “Ae talosia lenei aso, ua amata se mea fou ma ‘ou te tatalo, ole a avea ai ‘outou uma tagata lelei aua o lea ua tutu-fa’atasi le nu’u nei e fa’amautu le tulaga lena.

“Taumafai la e fa’aaoga lelei le avanoa ua tu’uina atu, e fai ai se mea aoga, e fa’aalu ai ou taimi ma aoga mo ‘Oe i le olaga atoa.”

By Deidre Fanene 30 August 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>