To’atolu na maliliu i le aso e tasi

30 December 2015, 12:00AM

Ripotia e PaiMulitalo Ale

Fa’aliliu e Maiava

 

O se fa’alavelave na tupu i Mulinu’u i le Aso To’ona’i ua mavae le Kerisimasi, na maliliu ai nisi se to’atolu.

Ui i le tele o mau fa’amatalaga le-mautinoa ua salalau, ae na fa’amaonia mai ananafi e le Ofisa mo le Va-i-fafo a le Matagaluega o Leoleo, o Maotaoali’i Kaioneta Kitiona i latou ua maliliu.

E aofia ai: 

• Se tina e 32 tausaga

• Se ali’i e 30 tausaga, ma se

• Tamaititi fitu tausaga

 

Semanu e to’afa i se tamaititi lima-tausaga e afaina, pe ana le vavave gaioiga lavea’i a se Ali’i Leoleo lotoa na ia lavea’ia si tamaititi la’ititi.

“Na matua malosi lava le tatafe o le au i le taimi lea ua sua le tai, na le-mafai ai e nai tamaiti ona tatali le malosi o le tafe,” o le fa’aaliga lea a Maotaoali’i.

Na tupu le fa’alavelave lea pe tusa o le ‘afa-ole-lima i le afiafi (5.30pm) o le Aso 26 o Tesema 20115. E to’afa ali’i leoleo sa ‘auai i le galuega lavea’i lea ma na ‘auina uma atu i latou ia ma taofia ai i le falema’i i lea lava afiafi. O lo’o fa’asolosolo manuia i latou uma i le taimi nei.

O le Leoleo o Alesana Ieremia na muamua taunu’u i Mulinu’u, ona ia fa’afeso’ota’i lea o le Vaega o Fui Mu fa’apea le Ofisa o Leoleo mo se fesoasoani peita’i, e le’i mana’o Alesana e fa’atalitali ‘umi se’ia taunu’u atu.

Na fa’afetaia e Maotaoali’i le mata’alia ae maise le lotoa o le Ali’i Leoleo, na mafai ai ona lavea’ia le tamaititi lona lua.

O le taimi nei, ua ‘aumai ai fo’i se isi lapata’iga i matua, ina ia matua fa’aeteete pe a ‘ave fanau laiti i le sami po’o vaitafe fo’i mo ta’elega.

Na ta’ua fo’i e le Ali’I Leoleo, a o’o ina fa’aletonu le tau, e tatau i matua ona taofi tamaiti mai ta’elega i le sami. E le gata i lea, o le fa’alavelave lea i Mulinu’u, o se fa’amanatu lea o le vave ona suia o tulaga ma va’aiga o le tau i lea aso ma lea aso. 

O le Aso Gafua na fa’ailoa mai ai i le Samoa Observer e Paul Amerika – le tama o le tamaititi ua maliu – e le mafai lava i le taimi nei ona ‘ave’esea o lona mafaufau mai le mea na tupu.

Ae na o’o lava i le Maota Gasegase o lo’o ta’oto ai le Leoleo o Alesana, e fa’ao’o iai lana fa’afetai mo le fa’asaoina o le ola o lona atali’i laititi, e ui ua maliu le tama matua.  Na ta’ua e le tama lea, o le Leoleo o Ieremia sa tiute-fealua’i ae tau atu ai i le fa’alavelave lea. Na nofo vili le Vaega mo Fa’alavelave Fa’afuase’i peita’i na tuai ane ma lē-fa’atali i ai se’ia taunu’u ane, ae fa’asasa’o loa ma ‘a’au televave atu e fai le galuega fesoasoani.

I le Ofisa o Leoleo ananafi, na fa’afetaia ai e isi leoleo le lotoa o le Ali’i Leoleo o Ieremia ae maise lana galuega lavea’i sa fai.

Na fa’aalia e Amerika, e to’alua lana fanau-tama latou te nonofo fa’atasi i Vaitele. Peita’i, na mana’o atu lo la tina ia latou tafafao i le Aso Faraile. Ona alu lea momoli iai, ma o le taimi mulimuli fo’i lea na va’ai-tino ai i lana fanau uma.

 “Fa’atoa ‘ou iloa lava le mea ua tupu i le taeao o le Aso Sa, ina ua ‘ou alu e asi ‘ou matua i Nofoali’i,” o le taumafai mai lea a Amerika ma loimata.

“O le mea ‘ou te fa’anoanoa tele ai, ona e iloa lelei e le aiga o lo’u to’alua-maumua lea, le mea ‘ou te nofo ai ae maise fo’i la’u telefoni, ae matua leai ma se popole e fa’ailoa mai le mea ua tupu.” 

Na ta’ua e Amerika, e matua faigata tele ona ia fa’agalo lenei mea ua tupu. 

30 December 2015, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>