Mana’omia e Samoa se fa’amamā avega
O le mafatiaga o lo’o ua i ai nei le atunu’u ua matua’i taugata lava le soifuaga.
O lea le finagalo o le tamā o Va’a Foloi, 57 le matua o le soifua o Neiafu i Savai’i.
“O a’u e masani lava ona faitau atu i la outou pepa pe a maua lava a se taimi, ma o se fa’anoanoaga tele lava lea ia te a’u lava i le tele o le pologa o lo’o ua feagai ma le to’atele o nai o tatou tagata.”
“Ia e le ese o le la pito, ese i’inei.
Na ia fa’ailoa o lo’o to’atele o tagata aemaise o aiga i Samoa ua le gafatia le ola lelei i aso uma.”
“Ia o lo’o ua tatou maitauina lava, o la aso e pei sa maua le eleni le $1.5 ia o le taimi lenei ua $4 ma sene le eleni lelei lava mo le taumafataga i le aiga.”
“E leai se aiga i totonu o le atunu’u o le a ola mai lava i le ti laumoli ma le saka mai le amataga o le tausaga se’ia o’o i lona fa’aiuga.”
“E mana’omia sina mea lelei, ia a va’ava’ai atu fo’i i le tau o le moa ma le mamoe, ia ua sili ai lava le moe e fia’ai i le taugata o vaega nei i le atunu’u.”
O le isi ona atugaluga o lo’o ua i ai le taimi lenei, o le leai oni galuega mo le to’atele o le atunu’u.
“Ia o lena a o tatou va’ava’ai i ai, ua tele galuega ae o le fa’alavelave i le taimi lenei ua tupe mea uma.”
“O lona uiga o la’u fa’amatalaga a leai se tupe ia e leiloa pe a fa’afefea na fai.”
“Ia e sa’o e o e galulue i le ‘ele’ele , e le fa’apea na o le alu atu lava togi le fatu kukama i luga ele’ele ola mai, leai e tatau lava i le malo ona fa’atupe vaega nei.”
“Afai fo’i o lo’o i ai ni polokalame mo le atina’e ina o pisinisi ma fa’atoaga, ia tailo i ai, ai lava na’o sina vaega lava o le atunu’u ae le’o mafai ona aofia ai le to’atele o nai o tatou tagata.”
“O lo’u ia iloa i ai, ia si’itia e le malo avanoa faigaluega ma se’i titilo i totogi.”
Na ia ta’ua e le’o taitai ona tutusa le maualuga o le tau o le soifuaga ma totogi o lo’o maua e le to’atele.
“O le itu mautinoa lava lea, ma o se itu e ao ona toe silasila toto’a i ai le malo i le taimi lenei ona ua matua’i mana’omia e Samoa se fa’amamā avega.”