LAUGA - “Ia atoatoa i la le Agaga”

Tusia Rev. Petaia Setu ,

133 Hits

Rev. Petaia Setu

Rev. Petaia Setu

(Kalatia.5:25)

Ua faapea le upu, a se tasi tamā, ‘E le mafai ona tatou iloa se lelei i le mea ua tupu; vaganā ua tatou faia iai se mea i le mea ua tupu’. O le uiga o le manatu, ia sāga’itonu le ta’otoga o se mea ua faaletonu. Ia mafai ona tula’i mai i sona tulaga lelei ni mea ua le lelei. E maifea ona faalelei? O le tali, Fai iai se galuega lelei.

E le mafai ona faaatoatoaina sea lelei vaganā ua tautala ma galue mai le Agaga e lelei. E le mafai foi e le peritome ma galuega o le tulafono ona faasaoloto ma laveaiina se tasi mai le pologa i tuinanauga ma amioga a le lalolagi. O le pogai lea o le auina ifo o le Agaga Paia (Kal.4:6); ina ia tatou saoloto mai amioga leaga uma lava o lenei olaga.

E manaomia le pulega a le Agaga. E moomia le taitaiina a le Agaga. E le o le ola fa’aafa’afa. Fai mai Paulo, Afai ua tatou ola i la le Agaga, ia tatou savavali foi i le Agaga. O le a le mea ta’ua o le Ola i le Agaga? Ae savali faapefea i le Agaga?

O le Agaga Paia, o le Agaga lea na te faatonutonuina ma taitaiina tatou i le ola faapaiaina ma le soifuaga atoatoa i la le Agaga. O le ola i le Agaga, o le ola ua faapaiaina i le tino, i le mafaufau ma le agaga. Pe faapea foi, o le ola i le Agaga, o le amio Atua lava lea. A o le amio Atua, o le loto paia lea ma le amio paia. O uiga ia o amioga i la le Agaga o loo taumafai Paulo e faamanino, ma faatulaga lelei ai le faaletonu o loo fesēsēa’i ai le talitonuga faakerisiano o le Ekalesia nei i Kalatia.

 O Kalatia, ua le eseese ma le natura o le fugafuga. Manatua foi o le fugafuga e lua ona gutu. E faapena la Kalatia. Se i vaai ane la ia te oe pe le o tia’i i Kalatia lou pute! Ua uma ona ioe ia Paulo, ae toe ioe foi i tā’a’iga faa Iutaia.

E sa’o ai le poto o Solomona, “… o gutu o ē amioleaga e faapi’opi’o ia” (Fat.10:31) “… ma le laulaufaiva pepelo, ua se emo o le mata lea” (Fat.12:19) Ioe, e le pine ona faaumatia. E le aoga ona ave lua mea faale tino ma amio faaleagaga (Mat.6:24) Fai mai le taofi o se tasi a’oa’o e lafi ai mai lana solitulafono, ‘A ua tu loa i le negative, negative loa ‘aua le toe suia’.

Samoa, o le uiga o amioga i la leAgaga, o le amio e mamā. E le toe pisia i ni vaivaiga o le lalolagi ma tuinanauga o le loto. Fai mai le aposetolo, Afai ua tatou ola i le Agaga, ia savavali foi i le Agaga. ’Aua le ofu iila ma la’ei mamā i le Aso Sa, a o le loto e gasu atoa i mea mataga.

Uso e, e le o le sisi’i o lima ma tagi i le falesa, ae soona sauā ma faataugā le ola o le atunuu i outou tofiga faale lotu ma pulega faale tagata. Pau lava lea o le amio e le faamagaloina e le Atua, o le faa’ole’ole ma le faaulaula i le Agaga (Mare.3:29).

E faapefea ona tapena o tatou olaga i le atoatoa o loo finagalo ai lo tatou Tamā o i le lagi? E iloa i fea ua tatou laasia se olaga toefuataiina i la le Agaga? Le au uso e, ia outou savavali i la le Agaga, ona le faia lea e outou o le tuinanau o le tino (f.16). E le faigata ona iloa o le lelei ma le leaga. Fai mai Iesu, “O lē ua fanau mai i la le tino, o le tino lea, o lē ua fanau mai foi i la le Agaga, o le agaga lea”.

(Ioane.3:6) “Tou te iloa i latou i o latou fua” (Mat.7:16). O ‘e vaai i ni foliga faapena i lou siosiomaga faale tagata siofua? Ua e faalogo i ni Kalatia faagutugutulua i upu ma uiga faaalia? E le lilo le amio faale tino (f.19). A ua tautino foi i luma e le aposetolo, o e faia amioga faapena, e le fai le malo o le Atua mo latou tofi (f.21). Se a la le uiga o lou kerisiano? Samoa e, e le mafai ona ta’uatoatoaina lo tatou valaauina o ni Kerisiano pe afai tatou te le faatagaina Iesu Keriso e soifua ma pule i o tatou olaga. Ae mafai la faapefea? E manaomia ona tatou savavali i fua o le Agaga.

Ioe, e faigofie ona tauloto ma pese ai i fua o le Agaga. Ae le faigofie ona savali ma tumau ai. A o fua o le Agaga, o mea ia ua sili ona mana’omia e te savali ai i manuia o le Atua ma lana faaolataga. O le alofa, o le olioli, o le filemu, o le onosai, o le mata-alofa, o le agalelei, o le faamaoni, o le agamalū, ma le lē gaoiā, ma uiga lelei uma faapena.

Afai o ōi ma oono nisi ia te oe, ua le ia te oe fua o le Agaga. A o ‘e faamamafa i le amo ma faaopoopo pea le mativa i lou uso a tagata, ua le ia te oe le amio Atua. Afai o loo e fiafia e faaufiufi le mea moni ma ta’usalaina le amiotonu, e le  fai le malo ole Atua mou tofi. Afai o oe le a’a o mea leaga uma ua fano ai nisi ola, e misi atoa oe ma le Agaga Faaola.

E manino lelei ona faailoa e Paulo i le Ekalesia i Kalatia le ituaiga soifuaga o faamanuiaga ma uiga o amioga i la le Agaga e tatau ona aoaoina ai ona tagata. E le o le ta’ita’i faamalosi mai o nuu ese ia faa Iutaia. E le ‘o galuega lelei foi ua faatonuina e le tulafono. A o le alofa tunoa o le Atua e ala i le Keriso faasatauroina ua talia i le loto.

Le loto lava lea ua na faailoaina atu i nisi le amio Atua poo le amio paia. O le loto ua matuā liuliuina e le Agaga Paia, ma ua faaolaina ai nai le agasala. O le Agaga Paia, o le Agaga ole pule, o le malosi, o le mana, ma faamanuiaga. O le Agaga o le poto, ma le mafaufau lelei. O le Agaga o le ola ma lo tatou saolotoga. O le Agaga lea sa tulaga ese ai ma ofoofogia galuega molimau o le aso o le afio ifo o le Agaga Paia i le au soo. Sa faaatoatoaina ai faiva o le aufaigaluega a Keriso ma faaolaina ai agaga pe tolu afe. Ioe, o le mea e iai le Agaga Faaola e iai le saolotoga (2 Kor.3:17).

Le ekalesia e, e faapefea ona faaolaina tagata pe afai e filogia i mana’o o le lalolagi lo tatou ola faale agaga? E maua ni agaga pe afai e sesē mamao i seoli o tatou ala? Ua uma ona faasaolotoina tatou e Keriso. I le, o i tatou uma o ia Keriso, ua faasatauroina e i tatou le tino, ma ona manao, ma ona tuinanau. Ia tutusa le upu ma le tuu. Ia molimau ma faatino le feau. Ia tautala, ma savali ai i le Agaga.

Samoa e, toe vaai ma maitau fua o le Agaga. Ia ola ma savali ai i aso uma o lou olaga. ’Aua le ola faafoliga ma lafi i upu ma tala. E pona’ia loa ma satia la tatou auaunaga o lona uiga ua tatou sesē ese mai le moa o le ala. A ola e aunoa ma le Agaga, e le iloa foi alofa i le isi tagata. E fua mai le tino , o le tino lava ia; e fua mai foi le Agaga, o le Agaga lava ia. Tatou te le maua se saolotoga i tofi ma suafa; a o le atoatoa i la le Agaga. Afai ua tatou ola i la le Agaga, savali ai loa i aso uma lava.

 

Amene

7737063/7783782

© Samoa Observer 2016

Developed by Samoa Observer in Apia