Ripotia e Deidre Fanene

Fa’aliliu e Maiava

Ui i le louloua o le tau ae maise le loloto o timuga ananafi, ae le’i taofia ai le agaga fiafia o Leiataua Mulipola ‘Au’apa’au, lea na fa’amanatuina lona 90 tausaga i le Aso Sapati ananafi.

Na soifua Lana Afioga i le Aso 12 o Aperila 1925 peita’i, na tolo mai e nai ona alo le fa’amanatuina o lona Aso Soifua, se’ia fa’atasitasi uma mai i le aiga mo lea fa’amoemoe fa’apitoa. 

O ananafi la, e le’i taofia ai le agaga fa’afetai, le taofia ai fo’i ma le agaga fiafia i sauniga ma fa’atinoga uma sa faia.

Matua leai se afaina o uaga o fa’amanuiaga.

Na fa’ailoa mai e le alo matua o Leiataua, o Mulipola Punaotala ‘Au’apa’au i le Samoa Observer, o se tama alofa tele ma galue malosi.

“O lo matou tama, o se tama e alofa tele i lana fanau fa’apea lona aiga,” o le fa’aaliga lea a Mulipola.

“Pau lava lea o le mea e mana’o ai, ia nonofo fa’atasi lona aiga, tasi le loto ma le agaga i so’o se mea e fai.

“E fa’apena fo’i ia matou lana fanau. O le asō la, o se fa’amanuiaga fo’i mo matou uma, aua ua matou fiafia e fa’amanatu fa’atasi lona Aso Fanau ae maise le tulaga va’aia o le Alofa o le Atua ia te ia.” 

Na fa’ailoa fo’i e Mulipola, e tele fa’afitauli ma lu’itau sa feagai ma lo latou tama. O se tasi o fa’anoanoaga tele, o le taimi na maliu ai le tina o le aiga, o Fiapa’ipa’i Pesaleli i le 1991.

“Ina ua maliu lo’u tina i le 1991, sa faigata tele ia te ia talu ai, e le masani ona valavala pe o-‘ese’ese fo’i soifua, e mafuta fa’atasi i le tele o taimi.

“E alofa le tasi i le isi a o se taimi faigata tele i le matou va’ai, ina ua maliu Fiapa’ipa’i ma sa misia lava e le toea’ina lana uo fa’apelepele.”

E iai le taimi o lona soifua na ‘auina atu ai mo togafitiga. 

 “E iai fo’i le taimi na fa’aletonu ai lona fatu ma ‘ave ai loa i Hawaii e nofo ai i le isi matou uso o iai, ma fai ai ana siaki masani i le falema’i. “Ao lenei lava aso, matou te fa’afetai tele ai i le Alofa o le Atua, Lana puipuiga ae maise le toe fa’afo’isia o lona malosi i lenei taimi.” 

Ua 90 tausaga o le soifua o Leiataua, ua maliu lona faletua, e to’avalu ona alo, 24 fanau-a-fanau ma le to’alima o fanau-a-fanau-a-fanau o lo’o soifua pea.

O le to’atele o latou uma nei, sa ‘auai i le fa’amanatuina o le 90 tausaga o le toea’ina ananafi.