Toe mafaufau tasi lava…O Wilbur ma Orville Wright, e lē-gata o se ‘auso, a’o la’ua fo’i o se uo mamae ma o se pa’aga-faipisinisi. Sa la fausia fa’atasi le ulua’i va’alele i le lalolagi, le ituaiga e mafai ona fa’atonutonu mo malaga tu’u-mamao. Sa taumafai le ‘auso lea e fa’atalitonu le malo o le Iunaite Setete o Amerika, e mafai e le la va’alele ona lele e taumafai e taofi le taua, peita’i, e le’i talitonu iai lo latou lava malo.

Nonofo loa le ‘auso, ‘ave le la fausaga lea ma le la fuafuaga i le Malo o Peretania, peita’i e le’i talitonu le ‘Atimalala aupito maualuga o le Malo, a mea e iai se a’oga o nei mea o va’alele i taimi o taua. 

O lo la naunau tele, na taumafai ai pea e tauanau lo latou lava malo o Amerika. Ona fai lea iai o le Matagaluega mo Taua, ua leva na tatau ona felelea’i le va’alele lea i galuega masani, a’o le’i faia iai se finagalo o  le malo. Na atili ai le le-fiafia o le ‘auso lea, talu ai, ua leva lava ona felelea’i-solo le la va’alele i galuega fai! O le mea moni, e fa’atolu ona felelei i le aso ae maise fo’i, le fa’aopoopo pea o malaga mamao e lele ai a’o lea lava e leai se tasi e talitonu ia la’ua!

Na fāi-fāi e nusipepa ma vaega fa’asalalau, e o’o fo’i i saienitisi, sa latou le-amana’ia ma fai mai, o le va’alele a le ‘Au-uso lea, o se mea-pepelo e tau-fa’a’ata, e ui ua tolu tausaga talu ona felelea’i!

Ae na fa’apeī la ona fo’ia e le ‘Auso lea, le te’ena so’o o la’ua a’o taumafai e fa’atalitonu tagata popoto ma tagata fa’apitoa ae maise le lalolagi, a-mea o la’ua moni lava na muamua gaosia le ulua’i va’alele i tala fa’asolopito o le lalolagi? E mautinoa lava, o le tasi mafuaga, ona e to’alua la’ua. O isi tagata na galulue ta’ito’atasi, e moni  sa matuā lalata lava iai, ae peita’i, o le tele o vaivaiga ma le mau faitioga, na fa’avaivai ai ma lē taunu’u ai i se manuia.   

Peita’i le ‘auso to’alua lea, sa galulue fa’atasi lava i taimi uma. O lo la fa’amaoni ma le amana’ia e le tasi o le isi, o le malosi’aga tonu lena ma o le fa’ata’ita’iga tonu lava lea o le mea e ta’u o le ‘auso. Sefe e le isi le ola o le isi i le tele o taimi faigata. Pei fo’i ona fetalai Iesu, e leai se isi alofa e sili atu nai lo lenei.  

O taimi lava tatou te maua ai le fa’amalosi’Au, le alofa ae maise le fa’atuatuaga o tatou aiga, o le taimi fo’i lena tatou te si’itia maualuga ai i le soifuaga nei ma taunu’u i le i o’o’oga o lo tatou malosi. Ae ana na o ‘Oe, leai so latou talitonuga ma lē-fa’atuatuaina e lou aiga, e mautinoa lava, e le mafai ona tatou fa’atino o se mea – ae a tutū fa’atasi, tatou te manumalo! Fa’atasi ma le alofa fa’amaoni o Iesu ma Lona malosi, se ā e te le lagolago ai ma fesoasoani i tagata uma o lou aiga, ina ia ‘ausia le tulaga maualuga e mafai ona o’o iai. 

Toe mafaufau tasi lava.                                                                      (Fa’aliliu e Maiava).