O se amataga fou

By Ilia L. Likou 29 January 2017, 12:00AM

O le taumafai ai o le tele o aiga i le tau fa’asoasoaina o tupe maua i le taimi lenei , o se tulaga faigata tele.

O le maua ai o le  fa’atalatalanoaga a le Fofoga o Samoa ma le tinā i a Manila Tupa’i o Leulumoega Tuai na ia fa’ailoa ai le le tulaga faigata tele o lo’o i ai totonu o si ona aiga i le tau fa’asoasoaina ai o tupe maua.

 “O a’u e to’avalu si a’u fanau ia ma o lo’o a’o’oga lava uma e o’o mai le taimi lenei.” O le saunoaga lea a le tinā.

 “Ia e pei o le tulaga faigata lava o lo’o i ai si o matou aiga i le taimi lenei o le itu lea tau tupe, aemaise lava i fanau i a’oa’oga.

 “O si o’u to’alua ua na’o ia o lo’o faigaluega i le taimi lenei ona o a’u e tele lava ina nofo i le fale aua lava le tausiaina o fanau.

 “Ia ae le tu’ua ai lava le tulaga e mafai ai ona ou fesoasoani i so’o se vaega ou te iloa ou te mafaia.

Na ia fa’ailoa o le feagai ai ma le tau o le soifuaga ua avea lea ma fa’afitauli i totonu o le aiga.

 “Ia e pei ona silafia ai  o nai tupe itiiti lava olo’o mafai ona ou mauaina mai , e matua’i taumafai lava i le mafai e fa’aauau ai lea tupe i vaiaso uma.

 “Ia ua atili ai le tulaga fo’i lea ona e fai lava sina to’atele fo’i o si a’u fanau olo’o tausi i le taimi lenei.

 “Ia ae le mafai ona tauina ai loa ma nisi o vaega fo’i ia e pei o fa’alavelave i aiga, o le vai ia aemaise le tausiga i aso uma.

 “Ou te iloa ma tatou tau fai molimau ia e ‘ese’ese uma lava aiga na o tatou tutupu mai ae o si o’u aiga e pei o lea le tulaga faigata o lo’o ua feagai ai nei.

O le taimi lenei na ia ta’ua o lo’o ua i ai sina ana tama’i to’aga i tua o le fale o lo’o totoina ai nisi o fuala’au aina, ma o se tasi lea o alagatupe o lo’o fesoasoani le taimi lenei.

“Ia o le taimi lenei o si a’u tama e 17 tausaga le matua o lo’o fesoasoani tele i le kilivaina o vaega nei.

 ‘Ia e mo le silafia ai o si a’u tama lona lua e 15 lona matua olo’o fesoasoani fo’i letaimi lenei, ia ma na nofo mai le aoga i le 15 o ona tausaga.

 “Ia ua nofo lava ia ma  fai mai e na te le mafaia le aoga, e ui lava la o so ma taumafai atu ia ua leai lava.

“O le tele o taimi ia e molimauina ai lava  e lefanau le taumafai ai lea e tau fa’asoa tupe maua mai.

Na ia fa’ailoa o letele lava o taimi e va’ava’ai ma le alofa ona o le le mafai ai lea ona alu lana tama i le aoga.

 “Ia ua fiu lava e una’i ae pei o lana ia tala, e le mana’o ai, ae mana’o e sau e fesoasoani i a te a’u le tele o taimi aemaise o feau i aso uma i lo matou aiga.

“Ia o lea la ua o’o mai ai lava le taimi lenei, ae o lo’u naunautaiga ia mafai ona toe ave i le aoga.

E ui ai la ina faigata le olaga i aso e le mafai ai ona taofia ai le ola talitonu o Manila.

 “Ia o le tele lava o tagata e latou te fa’amasino pe a va’ai i a te oe, ae o a’u ia o le fa’amoemoe lava i le Atua.

“Ou te fa’afetai ai la o le taimi lenei o lo’o ua saunai nei e fai se isi ana pisinisi laititi e pei ona ua i ai le fesoasoani a le Matagaluega a Tina aemaise o le S.B.E.C.

“O le gaosiaina lea o meataulima, ia atonu o le a le taumate le tele ai o se fesoasoani.

 “Ia o le taimi lenei o le a ou sauni e fa’aaoga sina taleni fou mo si o’u aiga aua se tupe maua ia aemaise ai la le toe tu’uina atu o la’u tama i le aoga.

“Fa’afetai ai ona o nei avanoa taua.

By Ilia L. Likou 29 January 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>