Taua fa’asaga i sauaga i totonu o aiga
E faifai-malie lava ae mautinoa le matua amana’ia o le finauga fa’asaga i sauaga i totonu o aiga i Samoa nei. O le avea o le Aso 25 o masina ta’ita’i o se “ASO LANU-MOLI”, ua fa’ato’ateleina ai pea tagata Samoa e ‘auai ma lagolagoina lea fa’amoemoe.
A o le a tonu ea lea mea ua ta’ua, o le ASO LANU MOLI?
O le aso lea ua vala’auina ai tagata-Samoa uma e lelei mafaufau, o sui o le malo ma le vaega tuma’oti, ina ia tutu-fa’atasi fa’alausoso’o, e fa’atāuaina ma saga fa’amamafa atili vaega talafeagai uma mo le puipuia ma le fa’amutaina loa o sauaga fa’asaga i tina, o tama’ita’i ma fanau-teine a le atunu’u.
O se avanoa lelei tele lea e fa’alauiloaina ai le tala fa’asaga i Sauaga Fa’asaga i Tama’ita’i ma fa’ailoa ai fo’i le lagolagoina o lea taumafaiga mo e Fa’amutaina o Sauaga Fa’asaga i Tina, tama’ita’i ma fanau-teine.
Na fa’aalia e le Fa’atonu o Polokalame a Malo ‘Aufa’atasi mo Tama’ita’i, o Suisala Mele Maualaivao, o lenei taumafaiga, o se ‘auala lelei tele e fa’alauiloa atili ai lea fa’afitauli.
“O le Aso Lanu Moli, o le fa’alauiloaina lea o le ogaoga tele o lea fa’afitauli, ma tau-fo’ia ai lea fa’ama’i ua sosolo-fa’aAfi i Samoa, le Pasefika ma le lalolagi aoao,” o lana fa’aaliga lea.
“O le fa’aauauina pea lea o talanoaga fa’aTa’ita’i o le atunu’u, ina ia tofu-sao uma mo le suia o mafaufauga o tagata ma suia ai amioga aua se Samoa saogalemu.”
O le isi vaega o lea taumafaiga, lea ua fa’aigoa o le “Fa’atau! La’ei! Fa’ailoa!, o lo’o fuafua mo pisinisi ina ia fa’ailoa a latou oloa lanu-moli ma una’ia tagata e fa’atauina ma le fa’amoemoe ia la’eia ia lavalava i le Aso Lanu Moli, le Aso 25 o Iuni.
O le a tauia fo’i e Tina o Malo ‘Aufa’atasi – e ala i le saunia o fa’alauiloa ma fa’asalalauga fa’atosina mo pisinisi uma e ‘auai i lenei fa’amoemoe ae maise le fa’alauiloaina o le sao o ia pisinisi mo le tafi-‘esea o sauaga fa’asaga i tina, tama’ita’i ma fanau-teine.
E o’o fo’i i tama-lakapi, o lo’o va’aia lo latou lagolagoina o lenei fuafuaga e ala i se faiga-fa’aPa’aga a le Iuni Lakapi a Samoa, ma le Vaega o Tina o Malo ‘Aufa’atasi, lea sa avea ai le ta’aloga a Tonga ma Samoa, o se fa’atosina mo le fa’amutaina o nei sauaga mataga.
Sa la’eia e ‘au uma e lua, fusi-lanu-moli i o latou lima i le taimi o le ta’aloga ae maise fo’i le ‘auai o le Manu Samoa atoa, i se ata-video na fa’aigoa, o le Fa’amutaina o Sauaga fa’asaga i Tina.
“E matua le-talia lava i ta’aloga po’o le matou nei ‘Au-ta’a’alo nei sauaga fai so’o i tina ma tama’ita’i,” o le fa’aaliga lea a le Faia’oga o le Manu Samoa, o Namulau’ulu Alama Ieremia.
“O lo tatou sao lea, tatou o Samoa, o le avea ma fa’ata’ita’iga lelei ma ua ‘auala atu i le ta’aloga o le lakapi se amataga lelei e fa’ama’ite ai se taumafaiga mo lea fa’amoemoe.” A’o le a le taua o le la’eiina o se ‘ofu lanu-moli i le Aso 25, e taofia ai sauaga fa’asaga i tina ma tama’ita’i?
Na ta’ua e Suisala, o lenei fa’amoemoe, o le a fesoasoani tele e fa’alauiloaina ai le taua o lea aso ma avea fo’i o se ulua’i taumafaiga e fo’ia lea fa’afitauli ua matua tele le fa’aletonu ua o’o iai.
“Matou te fa’aaogaina le tele o isi vaega e mafai ona maua,” o lana fa’aaliga lea. “O le isi vaega e aofia ai le fa’atonutonuina lelei o fa’asalalauga ma tusitusiga, o ripoti a tusitala ma vaega fa’asalalau; o le isi e aofia ai le fa’alauiloaina fa’alaua’itele o lenei fa’amoemoe i afio’aga ma alalafaga o le atunu’u.
“A tou silasila la i nisi o lo’o fa’aaogaina la’ei lanu-moli nei ae manatu fa’apea e mafua ona fai ona o Suiga o le Tau, ona le-manuia ai lava lea o nei taumafaiga.
O le fa’amoemoe, ia fa’ailoaina atu i so’o se tasi, ina ia mafai ai ona amata se talanoaga ma fa’atalatalanoaina atili ai lenei mata’upu ua foliga mai, e fa’asa ona talanoaina fa’alaua’itele i luma o tagata, peita’i, e le o le fofo lea e mo’omia. E mo’omia le silafia ma malamalama atili iai.”