Ōia le lotoifale o le Malo ona ua amia se tasi o Ta’ita’i-iloga

By Lanuola Tusani Tupufia 28 June 2016, 12:00AM

O se tala fa’anoanoa tele mo le Matagaluega o Pisinisi, Alamanuia ma Leipa,  le maliu fa’afuase’i ai o le Ofisa Sili o Pulega, o Peseta Margaret Malua.

Sa gasegase Peseta i nai aso i luma atu, ae mulimuli ai maliu i le afiafi o le Aso Sa, i lona aiga i Tula’ele.

Na saunoa le Afioga a le Ali’i Minisita mo Fa’alapotopotoga Tetele a le Malo, o le Minisita fo’i mo le Matagaluega o Pisinisi, Alamanuia ma Leipa, o Lautafi Selafi Purcell i lona fa’ate’ia i le tala fa’anoanoa ia Peseta. 

Na ta’ua, sa latou talosia lava lona gasegase, ina ia toe vave malosi. 

“O se ta’ita’i e fiafia tele e galue, e le mana’o e malolo,” o lana saunoaga lea. 

“O Peseta e matua malamalama lelei ma tele lona silafia o lana galuega i le Matagaluega o Pisinisi, Alamanuia ma Leipa ma i le taimi sa ma galulue fa’atasi ai, sa ‘ou fa’alagolago malosi iai mo le fa’aleleia o le Matagaluega ae maise o atina’e mo le atunu’u.” 

Na ta’ua fo’i e le Minisita, o le a misia lava le Ofisa Sili e nisi sa latou galulue fa’atasi ma e momoli atu ai fo’i lana fa’amaisega ma fa’amafanafanaga i le aiga fa’anoanoa.

O Peseta sa galue muamua i le Matagaluega o Pisinisi, Alamanuia ma Leipa a’o le’i se’e atu i le Vaega Fai Pisinisi Laiti, lea fo’i sa avea ai ma Ofisa Sili.

Na toe fo’i mai i le Matagaluega i le tausaga ua mavae, ina ua tofia e avea ma Ofisa SIli o Pulega. O ia fo’i, o le Sui Peresetene o le Fono a le ‘Aufaioloa a Samoa.

By Lanuola Tusani Tupufia 28 June 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>