Fa’atonu e le Palemia le faia o se Su’esu’ega

By Lanuola Tusani Tupufia 28 June 2016, 12:00AM

I taualumaga a le Palemene i le aso ananafi, na saunoa ai le Ali’i Palemia, i se fa’aaliga na fa’ate’ia ai le Fono Faitulafono ae maise fo’i le fa’afofoga a le atunu’u, mo le faia lea o se Komisi Su’esu’e, e su’esu’eina ai le fa’atinoga o galuega a Fa’amasino o le Fa’amasinoga o Fanua ma Suafa. 

O lea mana’oga na fofogaina lava e le Ali’i Palemia, i lana saunoaga fa’aMinisita. 

Na ta’ua, o le tofia ai e avea ma Fa’amasino o le Fa’amasinoga o Fanua ma Suafa, ua fa’aaoga e nisi o Fa’amasino, o se “tafaoga” se’ia aulia le 70 tausaga o le soifua. E le’i ta’ua e Tuila’epa, po’o ai tonu e fa’asino iai lava saunoaga.  

Na ta’ua fo’i, o le silasila lelei le Komisi Su’esu’e Fa’aPalemene, pe o fa’atino lelei galuega a Fa’amasino nei, e pei ona tofia ai. 

“E tatau lava ona iai ni vaega e siaki ai ali’i ma tama’ita’i fa’amasino o le Fa’amasinoga o Fanua ma Suafa,” o lana saunoaga lea. “Aua a le-faia e le Fa’amasinoga se fa’atatau i fa’afitauli i totonu o lona lotoifale, e iai la le tiute o le Palemene e fai ai sana poloa’iga, e mo’omia ai le lua-vae-tolu o le lagolago a Sui Faipule o le Maota…” 

Saunoa Tuila’epa, e mafai e le Palemene ona tu’uina atu se talosaga i le Ao Mamalu o le Malo, e ‘ave’ese ai Fa’amasino e le o fa’atinoina ma le fa’amaoni o latou tiute. 

Ona fa’atuina ai loa lea e le Palemia o se lafo, e faia ai se Komiti Fa’apitoa a le Palemene e su’esu’eina galuega a Fa’amasino o le Fa’amasinoga o Fanua ma Suafa ma toe ripoti atu i le Palemene i lana tauaofiaga ia Oketopa. 

“O vaega e tatau ona silasila iai, muamua, o tulafono ma le fa’agasologa o Fa’amasinoga o Fanua ma Suafa,” o lana saunoaga lea.

“Lua, o le silasila toto’a lea i le tofia ma le malu-puipuia o fa’atinoga o galuega a Fa’amasino.

O lea fo’i su’esu’ega, o le a taga’i tu’usa’o ai lava i ‘auala e fautuaina ai le fa’aleleia ma le atina’eina o le Fa’amasinoga o Fanua ma Suafa ma fa’amanino atili ai tulafono ma le fa’agasologa o mata’upu e tu’uina atu i le Fa’amasinoga o Fanua ma Suafa, ina ia fa’aitiitia ai taimi ma’umau o le mamalu o le atunu’u ae maise le tele o galuega a le Fa’amasinoga lea e alu-ma’umau ai tupe a le malo.”

Na fa’ailoa fo’i e Tuila’epa, o lea lava su’esu’ega e tatau ai fo’i ona fa’amanino ai, le tofia o Fa’amasino o Fanua ma Suafa, ina ia faia fa’aKonekarate, ia mafai ai ona toe-fa’atalanoaina Fa’amasino, pe o talafeagai pea ma agava’a e fa’aauau o latou tiute.  

 “’Ou te le tau-fa’ailoaina atu, ae o so’o se falefaigaluega lava, e tatau lava ona iai vaega e siaki ai ina ia mautinoa, o lo’o fa’atinoina o latou tiute.

“O le tulaga lava lena o lo’o faia i Matagaluega ma Fa’alapotopotoga Tuma’oti a le Malo, a mae’a le ta’itolu tausaga, ona toe fa’asalalau lea o konekarate e tagataga’i iai, pe iai se isi e sili atu ona lelei nai lo le pule (o le matagaluega).” 

Na toe fa’amanatu ai fo’i e Tuila’epa, lana saunoaga i le ulua’i fono a le Palemene Lona XIV, na ia ta’ua ai le to’atele o tagata na fa’aalia o latou atugaluga ona o le fa’atinoga o galuega a le Fa’amasinoga o Fanua ma Suafa.

“E le tele na’ua ni faitioga i le Fa’amasinoga o soligatulafono lea e aofia ai le Fa’amasinoga Maualuga ma le Fa’amasinoga Fa’aItumalo. A o le 99 pasene o faitioga, ua fa’aalia ai le le-fiafia o le mamalu o le atunu’u, ona o fa’ai’uga mai le Fa’amasinoga o Fanua ma Suafa.

“O le mea moni, po’o le a lava lo tatou taumafai ia fa’aatoa le 100 pasene o se mea, e le mafai lava ona tatou ‘ausia o le 100 pasene lea talu ai, ona e ola fa’atasi lava le saito ma isi vao leaga.” 

Ae talitonu Tuila’epa, e tatau i le tagata ona taumafai malosi e fa’atino lelei ona tiute, pe afai e talitonu maua’i, o tofiga uma e mai Le Atua. 

 “O se agasala matuia le maua o se vala’auina mai Le e ana tofiga nei ae tatou le-fa’amaoni atoatoa e fa’atino.

Na toe fa’amanino ai loa, o le su’esu’ega lea, e mo le manuia o le mamalu o le atunu’u ae le tatau ai lava ona afaina ai le fa’avae o galuega a le Fa’amasinoga. 

“E tatau i so’o se tasi ona maua o avanoa tutusa e sa’ilia ai le amiotonu ma fa’ai’uga sa’o,” o lana saunoaga lea. 

O lea Komisi Su’esu’e, o le a ta’ita’ifono ai le Faipule mai Vaisigano Numera 1, o Lopao’o Natanielu Mua ma le Sui Ta’ita’ifono, o Nafoitoa Talaimanu Keti. 

O le a ‘auai fo’i i le Komiti lea, Fonotoe Pierre Lauofo, o Ali’imalemanu Alofa Tu’u’au, Fa’aulusau Duffy Stowers, Faumuina Wayne Fong, ‘Ili Setefano, o le Loia Sili, o le Komesina o Sulufa’iga ma le Failautusi o le Fono.

A tu’uina atu loa le ripoti i le Palemene ia Oketopa, ua fuafua e tali atu le Minisita o Fa’amasinoga i su’esu’ega uma, i le masina o Novema ma talanoaina ai i le fonotaga ia Tesema. 

Na fesiligia le Minisita o Fa’amasinoga, o Fa’aolesa Katopau Ainu’u mo sona finagalo, ae saunoa, o le Komisi Su’esu’e lea ua mafua ona laga, ona o nisi o faitioga na fa’ao’o atu i le Ali’i Palemia. “E le’i o’o mai ia te a’u ni faitioga aloa’ia,” o lana fa’aaliga lea. “Ae o lo’o silafia lelei uma e le Ali’i Palemia.”

By Lanuola Tusani Tupufia 28 June 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>