Mana’o le fa’atau-oloa e ta’alo mo le Manu Samoa i se aso
A’o alalaga fiafia le mamalu o le atunu’u sa i le Apia Park i le ulua’i manumalo o le Manu Samoa i lenei tausaga, ae ‘ese lava le mafuaga na o’o atu ai le ali’i la’iititi o Jay i lea Aso To’ona’i.
O le galuega masani lava lea a lea ali’i-talavou e 11 tausaga e fa’atino, aua se seleni mo le tausiga o lona aiga.
“Fai mai lo’u tina ‘ou te sau i’inei i le Apia Park e fa’atau oloa ia e maua ai se tupe mo se matou mea’ai taeao (le Aso Sa),” o le fa’aaliga lea a Jay.
“Sa ‘ou i le taulaga i le aso atoa e tau fa’atau mea-fa’apipi’i ia ae leai se isi e mana’o e fa’atau a’u oloa. Maua loa lo’u ‘auala i totonu o le paka, e matua manaia a. Toe lua a’u la’au ia e totoe e ta’i $2.50 i le mea e tasi.”
Na fa’amatala e Jay – e mai Leone, o ia e a’oga i le Tulagalua a Falefitu.
“E leai se tupe mo matou mea’ai…i le tele o taimi,” o lana fa’amatalaga lea.
“O la’u mea lava lea e fai i aso uma ina ua lima o’u tausaga… ‘Ou te le-alu i le a’oga pe a fai mai lo’u tina po’o lo’u tama ‘ou te nofo…ona ua leai se matou tupe.
“O mea-fa’apipi’i ia na ‘aumai e lo’u tina e fa’atau nei. E tuli-‘ese a’u e isi tagata ae ‘ou te naunau lava e fa’atau ona e leai se tupe mo le matou aiga.”
Na fesiligia po’o fea a ‘aumai ai oloa o lo’o ia fa’atau, ae tali: “’Ou te le mautinoa po’o fea e ‘aumai ai e lo’u tina mea ia. Pau lava la’u mea e fai, o le fa’atau atu a’o le’i po, ia maua ai se tupe e ‘ave i lo’u tina.”
Na ta’ua fo’i e sia tamaititi, o lona tama e kamuta ae le o toe faigaluega ona ua ma’i.
Sa fesili fo’i Jay, po’o a ana galuega e mana’o e fai pe a matua, ae ta’u-sa’o lava e si ali’i i le sui o le Samoa Observer, e mana’o e avea ma tama lakapi.
“E le tele so’u taimi e matamata ai le ta’aloga ona ‘ou te pisi lava i le fa’atauina o a’u oloa nei i tagata matamata i le isi itu lea,” o lana tali lea.
“Ae ‘ou te mana’o e avea ma ‘afa a le Manu Smoa i se aso…e mafai a ona ‘ou faia.”