LAUGA - “Faatalitali ma le mautinoa”

Tusia Rev. Petaia Setu ,

263 Hits

Rev. Petaia Setu

Rev. Petaia Setu

(Luka 24:49)

 
Ua uma upu; uma tala. Ua malie le vaai; ua faatele ona faalogo. Ua lasi vavega; ua anoanoa’i  foi faailoga tetele ua fetalia’i ai lagona o le fefe ma le popole, o le te’i ma le ofo, o le meia ma le segia o mauli, i le tolu tausaga sa aooga ai le ausoo ia Iesu. O lona uiga, ua mafa totoga le vasega nei. O le misiona, o outou māmā na (f.48). Molimau i mea uma sa faalogo ma vaai iai. Faailoa ma faatino mea uma sa aooga ma fa’aaupegaina ai. Na o lenei, faatali teisi se’ia  maua e outou le mana mai lugā.

Pau a lea o le malosi e faamoemoe iai mea uma sa a’oga ai, o le mana mai lugā. Ua uma le galuega a Iesu (Ioane19:30). O le Aso Tofi na sei mavae atu nei ole faamanatu i lona Afio A’e i le lagi. O le asō, o le nofo faatali. O le faatali mautinoa. O le faatuatuaga i le Fesoasoani ua uma ona folafolaina mai (Ioane 15:26). O le Fesoasoani ua foaiina ina ia tumau i le au soo ma i tatou uma i aso uma. O le Fesoasoani, o le Agaga Paia lea. O le Agaga o le poto ma le mafaufau; o le Agaga o le faatonuga ma le malosi; o le Agaga o le malamalama ma le mata’u  ia Ieova. (Isa.11:2). O le mana lea mai lugā. E ui ina taumasuasua ma mama i ōa tapenaga a le au uso, a o la Tavita, e ma’umau fua pe a le atiina a’e e Ieova (Sala.127:1).

O lea ua matuā ta’utino ma faamautinoa atili e Iesu i ona soo, o si taimi itiiti lea (10 aso), e faatalitali ai i faamanuiaga ma meaalofa e ala i le mana ma le pule mai lugā a le Agaga Paia. O ’i, o loo taoto ai le mafai e faatino ai le galuega ma le taunuuga o le faamoemoe galue. O i latou uma e maua le Agaga Paia, e matuā fausia ma taitaiina e le mana lea poo le malosi sili mai lugā. O lona uiga, soo se tagata molimau i le faaolataga a Iesu Keriso, poo oe foi ua ta’ukerisianoina, e fai mea faalogo i le pule ma le mana mai lugā. E le taitai lava sou poto ma so tatou iloa e faafoe ai le galuega a le Atua. E le alalai foi ni ou tikerī ma ni o tatou faailoga e faatu ai le Malo o Keriso i lou aiga ma lo tatou atunuu. A o le mana mai lugā. E tupu mai ai le upu moni, ma taitai outou i upu moni uma (Ioa.16:13).

Manaia le autu o le Fono Tele, o le 2017. Faalogo i le Agaga o le Atua. A o ai o i sili? E tasi lava le pogai o le malaga mamao mai ma le potopoto o le ekalesia, o le Atua. O le galuega a le Atua. O le ekalesia a le Atua. Ia le fauina le sa o le ekalesia i mana’o o le lalolagi ma leo o tagata, a o le mana mai lugā ma le taitaiga  a le Agaga. Aleluia! Ua manao Peteru e fau faapitoa se nofoaga o faifeau ia ’ai lelei ma moe lelei ma ola fifilemu ai. O agaga faasalavei ia o loo manu’a ai le galuega a le Alii. Na aumai e le Atua le ao e pupuni ai le vaivai o le auauna. Ona valaau mai lea o le Atua, Faalogo i lo’u Atalii (Luka.9:35). E le o le faalogo ia Mose poo Elia, leai. O lo’u Atalii… ia outou faalogo ia te ia. O manuia na o faiva o le ekalesia a le Atua.

Le ekalesia e, ua leva ona tatou iai i le vaitau o le toe fuataiina o le ola faaleagaga o le ekalesia.  Ae le o mafai ona tupu! Aisea? E le o faauuina la ta faalogo. O loo tatou ’apoina leo o pisinisi ma atiinae faalelalolagi. O loo faumalo manaoga o le tagata i o tatou olaga galulue. Ona nini faatasi loa lea o le faalogo i le Atua, ma le fefe i toeaiina matutua! Fai mai Iesu tou te le mafaia le mea lenā (Mataio 6:24).

Le au uso e, ia lelei lau faalogo. Ma ia faatalitali ma le mautinoa. Auā o ē faatalitali ia Ieova, e fou pea le malosi. Pe taufetuli i le gaoā, e le ila. E suamalie tiga (Isa.40:31). Auā o le mana mai lugā, e tafia ai fitā; e liusuavai ai faigata. O le mana e saoloto ai; e maopoopo ai; e fealofani ai; e manumalo ai, ma faaeaina ai; e fealofani ai; e manumalo ai, ma faaeaina ai. Ia manatua, o lou valaauina e mai le Atua. O le galuega, o le galuega a le Atua. Faalogo i le Agaga o le Atua, ae le o faailoga ma foliga o le lalolagi, auā e ā ia mea e fasioti, ae a le Agaga e faaola (2 Kori.3:6). Fai mai Paulo, O le Alii, o le Agaga ia; o le mea o iai le Agaga o le Alii, o iai le saolotoga. (2Kori.3:17).

Samoa e, e le siligia le faamaoni o le Atua ma ana folafolaga i lou olaga. Na te auina mai le Fesoasoani mo oe i aso uma o lou ola. Faatali ma le mautinoa. Faatali ma le onosai. ’Aua le fiugofie. ’Aua le masalosalo i le alofa o le Atua. O la le aposetolo o nuu ese, e le mafai lava e se isi malosi i le olaga nei poo le atali ona faateaeseina mai i tatou i le alofa o le Atua, o loo ia Keriso Iesu lo tatou Alii. (Rom.8:31-39). O ia lea, ina o le a afio a’e i le lagi, na ia fetalai mai, ou te auina mai ia te outou lē na folafolaina e lo’u Tamā; a ia outou nonofo i le aai o Ierusalema, seia maua e outou le mana mai lugā.

Samoa e, talitonu i le Atua e ana le pule ma le mana uma lava. A ’e faataga le Agaga o le Atua e afio mau i lou loto,  na te pulea lou olaga, e le toe iai se isi ou mana’o. Ua iai i le Agaga o le Atua mea uma mo oe ma lau fanau, ma lou aiga, ma o tatou lumanai. (Isa.44:3). Faaavanoa nei lou loto ma faataga le Agaga o le Atua  na te taitai oe ma faia au faaiuga uma, ona e saoloto lea ma ola fiafia. Auā fai mai le perofeta o Isaia, o i le Agaga o le Atua le poto ma le mafaufau; le faatonuga ma le malosi; le malamalama ma le mata’u ia Ieova (Isa.11:2). Se ā la se isi malosi. Samoa e, faatalitali ma le mautinoa, seia maua e outou le mana mai lugā.

 

 

Amene

 

Rev. Petaia Setu

773-7063 / 778-3782

© Samoa Observer 2016

Developed by Samoa Observer in Apia