TALA FAASOLOPITO O SAMOA MAI LE AMATAGA - O LE TAGI A MATA’AFA

28 May 2016, 12:00AM

Tapena ma tuufaatasi e Fuimaono Na’oia Fasavalu Touli F. Tupua mo le Samoa Observer mai le Encylopedia of Samoa.

O le aso 16 o Aokuso 1899 na tuuina atu ai e Mataafa se talosaga i Malo Tetele, ma o le faaliliuga lenei o lea tusi. 

E mafai ma sui o o’u tagata, ia ou  te alofa tele i ai, ou te aioi atu i Malo Tetele e tolu o Egelani, Siamani ma le Iunaiate Setete o Amerika ina ia faaaoaoga mai lo’u leo ma talia mai la’u tatalo. E le o toe tele ni o’u tausaga, aua ua ‘ou matua.

E le o toe umi e tuuina atu a’u nei i le tuugamau, ma o le a ‘ou mou atu. Ae peita’i o tagata sa alolofa ia te a’u mo se taimi umi ma o loo alolofa pea ia te a’u, o le a soifua pea pe a ‘ou alu ese.

Sa auauna mai ia te a’u alii totoa, ma sa auauna mai ia te a’u i le malosi atoatoa ma le faamaoni, o tama’ita’i, ona o le alolofa ia te a’u, sa feagai ma mea tiga ma le tau faamata’u, ma o le pisapisao o tamaiti pe a fe’atai ma ta’a’alo sa faafiafiaina ai nuu uma-o le a tumau pea ia uiga pe a ‘ou tuua Samoa.

Ae ona o i latou ua lagona ai lo’u leo ma le tatalo, ina ia talia mai e malo tetele e tolu, e ala i lo latou alofa ma le faapalepale, la’u talosaga. 

Ua faatolu ona filifilia o a’u e avea ma Tupu o Samoa ona o le faitalia ma le filifiliga sa’oloto a vaega to’atele o tagata, e tusa ai ma a matou lava tulafono ma agaifanua. I Faleula i le 1888, i Vaiala i le 1889, ma i Mulinuu i le 1898, na talosaga mai tagata ia te a’u ina ia avea a’u ma o latou Tupu.

Ina ua toe talosaga mai tagata i le taimi mulimuli ina ia avea a’u ma o latou tupu, sa ‘ou manatu e leai se tasi e tete’e i ai pe na te faatupu se masesei, ona e foliga mai ia te a’u ua tasi Samoa..

E le o a’u o se ‘ea ‘ea e pule, talu ai e lima tausaga sa faaaunuua ai a’u mai lo’u atunuu moni, ma sa ‘ou mana’o ou te ola i le filemu na ke to’afimalie i Samoa mo aso o totoe o lo’u ola; ae le gata i lea, e le masani ai i tupu o Samoa ona faapopoleina i mea faigata, faafitauli ma vevesi.

Ae ou te talitonu, e loto tagata ia avea a’u ma o latou tupu, ma ou te manatu, e mafai ona avea a’u ma o latou tupu i se faiga e fiafia ai Samoa atoa, faamalieina ma ia to’afilemu. Ae peitai o nisi o tagata papa’e leaga ua latou ta’ita’iseseina  se vaega o tagata, ma upu ese i mea e le moni ma folafolaga tau faasese. 

Ua faatosina e nei tagata leaga se vaega to’aitiiti o tagata Samoa ina ia latou filifilia se tama e avea ma o latou tupu. Ua latou faamalosia o ia ina ia avea ma tupu ina ia mafai ai ona latou fai ia te ia soo se mea latou te loto i ai, mo a latou lava fuafuaga faapito, ae le mo le manuia o Samoa. 

Ua loa ona fai mai isi tagata ae ou te le’i tuua Jaluit mo Samoa nei, na ‘ou sainia se folafolaga tusitusia o le a ‘ou le toe aia i upufai o Samoa, ma ua faapea mai foi o nei tagata, talu ai ona o lea folafolaga, e le mafai ona toe filifilia a’u e avea ma Tupu o Samoa.

Ae peitai, e le moni lea faamatalaga. E leai sa’u folafolaga out e le toe aia i upufai o Samoa, ma o le tusitusiga na ‘ou sainia, e le o i ai se mea e tasi e tatau ona taofia ai o a’u mai le avea ma Tupu o Samoa ina ua tuumalo Malietoa Laupepa. 

Ou te talitonu fo’i, ma ou te mautinoa lelei, e le o toe tete’e le Malo o Siamani ia te a’u pe a tofia a’e e avea ma Tupu. Ona o lea tulaga, ou te le malamalama pe aisea ua fai ai e nei tagata papa’e fuafuaga leaga ma le faa-tiapolo, ae le’i faatagaina e le Malo o Siamani, e fai se tete’e, lea e le aafia ai Egelani poo Amerika, se’ia vagana ai Siamani.

28 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>