O LE FANAU MAI O LE TAMAITIITI SAMOA

By Fuimaono Na’oia Faasavalu Touli F. Tupua 28 April 2016, 12:00AM

Mai le moega ma le faasolo atu ina matua-o le molimau ola- e matua uiga ese le manaia o latou olaga. O le pogai ona o le maoa’e o le alofa faale-aiga i soo se taimi e fanau mai ai se tagata fou, e saga faamalosia ai pea le aiga.

E matua potopoto uma i ai le aiga i lona fanau mai. O le talitonuga o Samoa-‘o le toatele o tamaitai, o le tele foi lea o faamoemoega lelei mo se aiga, o le a sili ai ona malosi le aiga i taimi o le to’afilemu poo le taimi o taua.

O le mea lea, fai mai tagata su’esu’e-“o totonu o ia motu lanu lau’ava ma le mafanafana o Samoa, aemaise ai o vaega to’agaogao, o le popolega lea e maua ai isi atunuu, e le o maua i ia atumotu.

O le toatele lava o tamaiti e fetaufetulia’i solo e leai ni o latou lavalava poo e le lavalavā, ma o tagata matutua- e na o titi lauti  lava i o latou sulugatiti e lavalava ai.

E lelei o latou fale ma mea’ai e tausi ai ona o le lafulemu o latou fanua e maua ai mea uma tau  mea’ai-o  i’a mai le sami ma le tele o manu vaefa latou te tausia, ia e le uma ona latou faaaogaina.

E ui lava ina umi le taimi e faasusu ai tamaiti i o latou tina, ae o le masani lava- a mavae le lua poo le sili atu tausaga le matua, ona matua fafaga loa lea i le tele o mea’ai lelei eseese, e pei o le sua o le tolo, puligi masoā ma fa’i pula, ia e masani ona mama muamua ia malū lelei e i latou e tausia tamaiti.

O mea uma e fai e le tamaitiiti e matua faafiafiaina ai le aiga-ma o le pogai lea latou te faamanatu ai i tausaga ta’itasi uma o le tuputupu a’e o le tamaititi ma ni sauniga faamanatu fou. Fai mai Misi Tana-“A tupu le tamaititi ma malosi ma ua mafai ona nofo i luga, ona faamanatu foi lea o le nofo a le tamaitiiti.

O le sauniga faamanatu lona tolu pe a totolo le tamaitiiti; o lona fa o sauniga faa-manatu pe a tu le tamaitiiti. Ae o le sauniga faamanatu tele lona lima -pe a amata ona savali le tamaitiiti.

Ona soso’o ai lea ma le pepese ma sisiva o le aiga i le po; ae a siva ai ma pese le tamaitiiti ma e le mā, ona olioli lea o matua ona o le tulaga ua na ‘ausia.

Fai mai Misi Tana-na te manatua lava se aso uiga ese sa i ai i se nuu e latalata i  le Afioaga o Apia, ona o se la faiga-uo ma le alii o lea nuu. Na maua lona avanoa na te matua matauina lelei ai le soifuaga o lea aiga.

Fai mai ina ua mae’a le taumafataga o le afiafi ma ua latou nofonofo lelei i luga o fala i totonu o se maota tele ma malolo mai le tele o galuega ma le anoano o sauniga faamanatu e lē manuia o le aso, ma ina ua uma ona tutu afi o faleo’o uma, e i ai lava se tamaitiiti laititi e igoa ia Sepo- sa masani ona vaaia i lea nofoaga, ae o lona itiiti tele na iloa ai e le’i atoatoa ona lelei lana savali.

E masani lava ona alu ane lea tamaitiiti nofo faasaga mai ia te a’u; e fatai lelei lava ona vae e tusa ai ma le aganuu, ma e ui lava ina sa toē tagata uma sa matou mafuta ai, ae le’i popole lava i ai lea tamaitiiti.

Ae ina ua valaau atu le ‘aumatutua ia Sepo e tu i luga e siva ma pese mo a’u-sa latou ta’ai se fala papa ma usu se pese ma ua avane fasi laau ua ta ai le fala, ona tu loa lea i luga o lea ‘alu’alutoto, e mimiti ona vae ae telē le ulu-pese ma siva; e uiga ese lana siva ona o le poto e siva ma sa ‘ou matua fiafia ai lava.

O ana taga na fai -sa kopi uma mai le ‘aumatutua -ma o le taimi lava lea na ‘ou avatu ai ni lole mo ia. O le mea na tupu, na se’i e Sepo le taga lole atoa ma tamo’e atu tu’u i lona tina lea ua matua fiafia lava i le mea na fai e lana tama.

O le fiafia o lea tina, e mafai ona faamaonia e le tala mai Savaii -lea na faatolotolo ai e Maupenei lana tama tama i le taeao po ma tau sulu -ona o le telē o lona ulu.O lea na faitio ai i lona tama, ona o le toē o ona uso -pe a tolotolo si ana tama ma tau sulu -ona o le telē o lona ulu.Ma o ia  tala uma- o loo matua manino mai ai le tuuina atu atoatoa o loto o matua Samoa ia latou fanau.

By Fuimaono Na’oia Faasavalu Touli F. Tupua 28 April 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>