Former Reverend writes to respond to critics

28 March 2017, 12:00AM

A former Reverend of Congregational Christian Church of Samoa, Opapo Soana’i Oeti, has responded to his critics in relation to the stigmata saga. He issued the following letter in the Samoan language to address questions raised in opinion pieces and letters to the editor published by the Samoa Observer. The letters questioned their trip to Rome with his daughter, Toa Patrick. It also raised a lot of questions about the legitimacy of Toa’s claims to the stigmata and so forth.

In the following letter, Mr. Oeti denied having spent any taxpayers money on their trip to Rome. He also addresses his deteriorating relationship with the Chairman of the Congregational Christian Church of Samoa, Reverend Elder Tautiaga Senara. He blames him for everything that has happened – including the division within the village and the church. The letter in Samoan is published below:

 

Faamatalaga Faamalamalama i le Mataupu ia Opapo Soanai ma Toaipuapuaga

Talu mai lava Mati i le tausaga 2016 ile mataupu ua taua i luga, o lea ua atoa lelei le tausaga e lei iai lava sau faamatalaga ua tuuina atu e tusa o faitioga ma upu taufaifai ma tala taufaaleaga o loo faia e nisi tagata e faatatau ia maua ma le fanau aemaise lava ia Toaipuapuaga ma le mataupu ile Stigmata. 

O lea le oo sau faamatalaga ile faagasologa o le mataupu i le Stigmata ona o lea ua i lalo o le faamalumaluga a le Ekalesia Katoliko le faaauauina o suesuega i lea mataupu e le oo iai se silafia o le toatele aua e le faalagolago ile poto o le tagata e faamatalaina ai mea lilo tau ile Atua ae faamoemoe ile atamai o le Atua na te faailoaina ia mea lilo, e pei ona uluai tupu ma ii le itulagi i Amerika i Saute (South America) ae manu ae i se tamai atunuu o Samoa e leiloa e le toatele o le lalolagi poo fea e i ai lea motu. 

O mataupu taua nei e fia faamalamalama ona ua tele tusitusiga a le Samoa Observer o loo ave leagaina ai maua ma le fanau faapea tuuaiga ile Palemia ma le malo. 

 

1. O tuuaiga e faapea ua maumau tupe o lafoga a le atunuu ua faaaogaina i la matou Malaga. E tatau ona muai saili le moni ae lei faasalalauina ni mataupu maaaleale faapea aua e aafia i le tulafono o le taufaaleaga ile taitai o le Malo aemaise o maua ma o ma aiga. E faailoa atu mo le silafia e le atunuu ma le lalolagi e leai ma se sene o lafoga a tagatanuu o Samoa o matou faaaogaina, o le $10,000.00 o le siaki tupe o le meaalofa a le Palemia ma le faletua male fanau i le faatuatua i lenei feau na amata ai le fesoasoani, faatasi ma nisi o ofo mai Kamupani ma faalapotopotoga na ofo mai le agalelei, faatasi ma le Ekalesia i Siufaga i Falelatai aemaise o ma aiga ma lou toalua ia Luisa. 

O le mafuaaga lena na pa’ū ai le faiga taulaga a la matou Ekalesia ona o le ofoina atu o nisi o tupe e fai taulaga ai mo lenei feau ua latou talitonu iai o faaaliga mai le Alii. E leai foi se sene a le Toeaina o le Pulega poo le Ekalesia Aoao o nofo aitalafu ai lo matou aiga ona matou te le masani i ni auala sese e faaaoga ai le afu o tagata.

A fia silafia le moni o lenei faamatalaga ona fesootai lea ile Palemia e tuuina ane suafa o e na fesoasoani i lenei feau, faapea foi le Ofisa Malaga o le Global Travel o loo silafia e le Pule le totogiina o Pasese. E lata i le $10,000.00 le pasese o le toe foi mai e faamoemoe e faamaea i le vaiaso fou ona totogi ile Global Travel, o maua ma o ma aiga ma la matou Ekalesia o loo faatinoina ina ua faaleaogaina le pasese o le foi mai ina ua umi taimi e moomia ai i Roma ona o lenei mataupu. E le afaina pe faamativaina ai maua ma o ma aiga ma le Ekalesia i Siufaga ma nisi o agalelei ae sau aso e malamalama ai le mea moni. 

O le isi fesoasoani tele ia matou mo le silafia e le atunuu, o le Afioga ia Papalii John ma Margi, o le Konesula o Samoa i Roma, o alo faasino ia Dr Karafelli ma Alauni aua o nisi o aiga milionea i Roma, o lena aiga o loo matou nonofo aitalafu ai i le agalelei aua o latou sa gafa ma le totogiina o nofoaga sa nonofo ai o le tausiga i soo se mea, aemaise o nai Patele ma Taupousa i Roma.

E faailoa atu foi i nisi o faitio faapea e lei tau maia se pepe e fanau i Roma, e le o mea uma e faasaga i lenei mataupu e faailoa atu, ae e faamoemoe o lea maua lou avanoa e tusia ai se tusi ona outou silafia lea o mea uma seia oo i le faaiuga ua aveese ai ou tofi faifeau ona o lenei mataupu ma faatusa o Iesu ma Maria. Ae mo le aufaitio o loo iai le feau mai le Alii na tusia i le aso 28 Setema 2016 ma faaliliuina e le kolisi i Malua, o se vaega o lena feau e faapea “Go to Rome and wait to respond to the Vatican, leave on the month I gave specifically to allow another soul to a given womb”. 

Silafia e le Alii o lea avea le Malaga i Roma o lea fanau mai ai se tagata fou e fai ma lagi soifua e faapine ai lenei feau i le lumanai aemaise o lea faamauina ai le uluai Stigmata ile South America ma o le igoa o le pepe tamaitai na fanau i le o Agnese Defericca Margitalia, soifua maloloina aua ana o se mea mai se tiapolo, semanu e le ola lea meaalofa mai le Alii Toetu o Iesu. 

 

2. O nisi o tuuaiga ile Samoa Observer o le aso 19 Mati ma le aso 22 o Mati 2017 e faapea o le mafuaaga o nei mea uma o maua ma lou afafine ia Toaipuapuaga lea o le vevesi ma oo ina faatea ai nisi o faaaloaloga o Siufaga ma Matautu. 

Ou te manao e faailoa le mea moni leaga e ave leagaina ai lou igoa ma o maua aiga. O lenei mataupu e afua mai nei vevesi lea ua malepe ai lotoifale o le Ekalesia i Siufaga ma Matautu, afaina ai le Pulega ma le Matagaluega a Aana aemaise o le fevaevaeai o le Aiga Tauaana, aemaise le galuega lelei sa taumafai iai le Afioga ia Anae Pita o le Taitaifono o Matautu, Fofoga o le EFKS i Matautu ma o le Faaaloaloga o le nuu, e le o au ae o le toeaina ia Tautiaga Senara aua ua avea lona tetee i nei faaaliga a le Alii ua la taumafai ai e talai le feau sese e faaoloataua loto lelei o tagata. 

Silafia e le Atua na uma ona faataga mai au i le po o le Aso Sa o le Lotu Tamaiti ma ou faailoa iai e uma le aso 18 o Tesema ona ou toe foi mai lea. Na muamua lava saunoa le faletua aua e pei o ia e taitai i le Pulega ae le o le Toeaina, fai mai lana saunoaga ao matou iai ma lou toalua o Luisa, o Toa ma lona toalua o Patrick “Ia e lelei foi pea outou o atonu e o mai ua tea ese ai na mea”, aua o le po na matou o a ii le 10pm na toe faailoa mai ai le palealii o Iesu i le muaulu o Toa maligi mai le toto, saunoa mai le toeaina ia Senara, “ia e tatau ona e alu ona o loo iai i tusitusiga o faaaliga na faaliliuina o le aso 28 Aukuso 2016 “Your father will join you and your husband to the trip as he will be needed”, na ia faamanuia mai ma saunoa mai e lelei lo outou o pe maua mai ai foi se mea aoga”

Ou te lei mafaufau o se mailei lea saunoaga aua o lana pule na faatagaina ai au oute alu ae faateia au i lou foi mai ua faasalalau e lona faletua ia Otila o au ua leai ni o’u tofi faifeau. 

Ma o le mafuaaga lena o nei vevesi ma oo atu ai nisi o tusitusiga i Tama o le Ekalesia mo se fesoasoani faapea foi ona oo le kopi o lenei tusi i le Afioga ia Anae Pita o le Taitaifono o le nuu i Matautu o ia foi o le Fofoga o le Ekalesia. 

Ma o fautuaga a Anae Pita ua mafua ai ona tafa le finagalo o le Ekalesia EFKS i le avea o le Aulotu a Siufaga ma Ekalesia Tutoatasi e pei o le Aulotu a Livi i Samatau lea foi na aveese i le taimi o le Toeaina ia Senara ao lea lava e faifeau Livi i lana Aulotu ma soifua fiafia ai tagata lotu ona o le alolofa ile faifeau ma le faletua. O le alofa foi o le Aulotu i Siufaga i le tofa loloto a Anae Pita na le liliu ai e fai Ekalesia i Amerika Samoa, faatasi ma le alofa i toeaiina o le Ekalesia aua o Senara lava le pogai o nei mea. 

O le tofa atamai foi ma le tatalo mai a Anae Pita ia te au i le ma feiloaiga ma faapea mai, ua oo atu Senara ma tatalo atu ina ia le suesueina seisi mataupu lea na faanunumi ma le toeaina ma molimau iai le faletua ia Otila e pei ona tagi ma tau i lona tina, ma o loo lava molimau e ave ai le mataupu i le Faamasinoga e sailia le amiotonu a le Atua ae ua faigata le ava fatafata ma le tama ia Anae Pita, aua o le tatalo a Senara i le faaaloaloga ia Anae, afai o lea suesueina lenei mataupu lona uiga o lea tatala le feagaiga, ae saunoa iai Anae o le mea tatau aua e le faia agasalaina le galuega a le Atua.

Masalo o le alofa o le Taitaifono ia Anae Pita ona o le upu o le taitaifono a; le EFKS, ae ana fai le mea sa’o ma le amiotonu a le Atua semanu ailoga e toe faasaga tau mai le nuu i le mataupu lenei. 

E le na o le pau lenei o aafiaga o le toeaina i mea e le tatau ona faia e se faifeau, ae o loo iai isi mea ogaoga na ia faia ae lei maliu lona faletua muamua, lea lava na faaleo e lona atalii o Tautiaga Junior i le molimau i le toe sauniga o Oli i le Malumalu i Matautu.

O le oo mai o le nuu o Siufaga ma faailoa mai le Afioga Tutasi e aveese ai au ma le EFKS, atonu ua faaseseina le faaaloaloga ia Taefu Lemu ona o fautuaga a se tasi o Aoao Fesoasoani o lona aiga, o le Siufaga e nofo i Apia, aua o le aso Tofi lena na molimauina ai o talanoa ma le faaaloaloga ae aso Toonai o mai le nuu e tau faatea au.

O le Faaaloaloga ia Taefu Lemu o se tasi o tama tautua lelei foi ile EFKS ae ona o e na o usu i si toeaina lea ua avea ma faala leaga i le ma mafutaga ae tatalo i le Atua ina ia malamalama lona finagalo. Ma e ui ile oona o upu o lena aso ae sa ou lototele e aua le faalumaina le EFKS na mafua ai ona ou teena ma ou le alu ese ma o nisi ia o upu na ou faailoa ile Taitaifono o Siufaga ma le nuu “E sese i Sini la outou mataupu ona e le aiaina e le nuu le aveesea o au, e lei filifilia au ese nuu aua o le nuu e aofia ai le Mamona, Katoliko ma le EFKS, e le o se faamaualuga la ae le faapena le faavae o le EFKS sei vagana ua agasala le faifeau i ni amio leaga e fai i fanau teine o le nuu ona tu mai lea o le tootoo, pe ana o se mea fapena e le tau afio mai se nuu, ou te tulai lava au ma alu ese aua e le faia le galuega ma lima agasala leaga e le tauaso le Atua i le Lagi. 

Faafetai e ui ina fesopoai upu ma tala ae talia e le nuu ma tulai, e le o le faamaualuga o le faifeau ae oute musu e alu le tala ua tuli e Siufaga le faifeau e aunoa ma se mafuaaga leaga e faatupu mala i le nuu i le lumanai, ae o lea ua aumai le faaiuga, ua fiu nai toeaiina e talosaga e aumai ou tofi ae tumau lava le manao o Senara e aveese ou tofi. Ma ua ou fiafia e sauni e alu ese e ui i loimata o le alofa o le Aulotu ae ua faailoa iai o lea i luga o Senara ma lona faletua le faamasinoga amiotonu a le Atua ae oute tulai ese ina ia maua le filemu e le nuu ma le Falefitu o le Aiga Tauaana. 

Ou te tautino atu i lenei tusi, afai o le tulaga lea e pulea toatasi e Senara i lona tofi Taitaifono le Ekalesia EFKS, e leai sou faamoemoe oute toe fia foi ile galuega faa Faifeau aua ua aumai mafuaaga o le aveesea o ou tofi, leai ma se mea sao o iai nao pepelo, pepelo lava ua ave i Toeaina o le Ekalesia, ae maumau e pe ana maua sou avanoa i luma o Toeaina, ao lenei o se Faamasinoga e faia, leai se leo ae aumai le faasalaga, o le faasalaga o le fasioti tagata, le amanaia le ifoga i le Aso Sa a matou ma le Aulotu, talia e Senara le ietoga o le Pulou o le Ola ae le talia tagata na pulolou ma ifo ae leai se agasala ae ona o le faaeaea ile Tofi Taitaifono. 

O le a ou foi i le aiga ma le mautinoa o le mataupu ia Toa, ma faatusa o Iesu ma Maria ua sauaina ai maua ma le amanaia ai e EFKS le 23 tausaga o la ma tautua e leai se leo. 

O le faanoanoaga tele e leai se faavae ua ou solia poo se iugafono tumau a Tama o le Ekalesia ae ua amo lou faasalaga mamafa, ae o loo faataga ona soli e Tautiaga Senara o le Taitaifono le faavae ma iugafono Tumau ae leai se sala. Ia silasila ane tama o le Ekalesia, ua lata ile 2 tausaga o le faifeau Samatau, pau lea o le Faifeau i Samoa o loo faataga e le Taitaifono e Faifeau i Samatau ae faigaluega ma lona faletua ile vaiaso atoa i le la kamupani o le Diamond Head, lona uiga na o le Aso Toonai ma le Aso Sa e iloa ai i le Aulotu, faamasino ane e le Ekalesia le 23 tausaga o ma galulue ile Ekalesia ae faatoa toesea lea i se tulaga faapea ona o le faatagaga a le Toeaina ae foi mai ua leai ni tofi faifeau. Lea foi o loo iai le faifeau Vailuutai na ia fasia le Aoao Malua, ae leai se faaiuga a tama o le Ekalesia i lea mea ma isi mea e tele o lea faaauau ona faailoa atu i le lumanai. 

O lau toe upu, talu ai ona ua taofia e Senara se avanoa ou te oo atu ai i luma o outou Tama o le Ekalesia, ou te fai ma sui o maua ma le toalua ma le fanau, faamaualalo atu ai pe afai ua tauvalea le Ekalesia a le Alii ona o maua, ae ua ma talia ma usitaia le faaiuga, poo le maea o le Aso Maliu ma le Toetu ona ma foi mai lea i o ma aiga ma le faamoemoe o le a faasino mai le Alii se isi galuega ma maua, ae faafetai tele lo outou alofa faatama ona sa maua le ala lo outou finagalo e faafoi mai ou tofi ae ua le mafai le Tama Toeaina sa ou auauna iai mo le 23 tausaga ae tuu ia i le Faamasino Sili, ae faamanuia le Atua i lau Afioga i le Taitaifono o Toeaina ma le Laulau, faamanuia i tama o le Ekalesia, famanuia foi ile Taitaifono o le Ekalesia ma lona faletua, faafetai i lo loua alolofa mo maua i nei tausaga e tele sa tatou mafuta ai. 

Soifua:

 

Opapo Soanai ma Luisa 

Tagata Lotu EFKS sauaina. 


28 March 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>