Lauga - “O le foafoaga fou”

By Rev. Petaia Setu 28 January 2018, 12:00AM

(Esekielu.36:26-27)

O se laau ua tuu i lalo, e iai lava lona tatupu. E toe oso lona moemoe. O mea ia sa le i manatu iai le tafeaga a Isaraelu. Fā’i lava a le nuu o le i’uga lea, o Papelonia lona tuugamau. O lona lea faavavau! I le, ua gase le faatuatua; ua leai se faamoemoe. Ua le i faalogo i latou i le perofeta o Ieremia (Iere.29:10).

Ua latou le iloa ai, o le Atua o ō latou tamā, o le Atua foafoa. Na te sōlofa ma toe fausia; na te faate’a ma toe ‘amia; na te fasioti ma toe faaola, e pei ona faamanatu pea e Ieremia. O le Atua lava ia o le foafoaga fou.

O le olaga tuai, o le olaga ma’omo’omo ma masofasofa; malepelepe ma le faalealofa. Le olaga lena sa faataugaina tatou i ia tausaga ua mavae. Le olaga faamaualuga ma le faafiapoto; faasausili ma le ola faaloloto. Pule sauā ma le fai faamalosi; faitogafiti leaga ma le ola lē popoi. Na toasā ai le finagalo o le Atua ma afua ai ona faatigaina ma faaaunu’ua. O ai la na te fofōina o’u manu’a? 

Lea ua tautala Esekielu i le feau mai le Atua. Ua faailo galuega o le alofa tunoa. O le foafoaga fou. Ou te avatu foi ia te outou le loto fou, ma ou tuu i totonu ia te outou le agaga fou; ou te aveesea le loto maaa ai i outou tino, ma ou avatu ia te outou le loto aano. O le faafouga lea o loo anau ai Paulo i le ekalesia i Roma. ’Aua foi tou te amio faatasi ma lenei lalolagi, ae peitai ia liliuina o outou loto i le toefuataiina (Rom.12:2).

Ua uma ona folafola e le Atua lona toe faia o se suiga lelei mo lona nuu. O le toe fafauina o se olaga fou i tagata o le tafeaga. Na te matuā faaumatia le tagata tuai i le faamamāina ma le fufuluina ese o uiga matagā, amioga leaga ma agasala uma (f.25). Ua fai ma faailoga o le toto o Keriso le vai manino ua faamamāina ai le nuu, e ala i le sausauina i loto ma manatunatuga o tagata taitoatasi uma, e aveese ai nanamu o le agasala. O loto ia o lou olaga tuai ua le o toe manaomia e le Atua.

O leaga uma sa pulea ai lou olaga e le tiapolo ma faapagotaina ai oe e Satani, ua faaumatia i le mana o le alofa tunoa. Le alofa tunoa lea ua sausauina e le Agaga i lou agaga, ina ia faamamāina atoatoa oe mai manatu sesē  o fevaevaea’iga, ma ta’aa’iga faavalevalea o le olaga.

O lea ua fou le tausaga Samoa. Ua faailoa mai e le Atua na te tuu i totonu ia te oe le agaga fou. Le agaga e mata’u ai i le Atua ma alofa atu ai i le Atua. Le agaga e te filifili ai i le ola ma le manuia, ae le o le oti ma le malaia. Le agaga fou e te alofa ai i lou toalua ma lau fanau; e te inoino ai i le lalolagi ma ona tuinanau. E te faalogo ai i le Atua ma lana valaau, galue ma auauna ai ma le faamaoni ma le alofa i soo se feau. 

O le loto maaa, o le loto ua saofa’i lelei ai le tiapolo ma ana togafiti leaga. E leai foi sona avanoa i le faaolataga. Afai la o faapea sou loto i le amataga o lenei tausaga, talofa e, e oti atoa lau malaga. E faivavale uma au fuafuaga. Sau i lalo. Fai mai se tasi faifeau, e mălili lava. Ioe, ua le o se ata lena na fau ai oe e le Atua i le amataga.

E inosia e le Atua le faamaualuga ma le loto maaa. Fai mai le folafolaga a le Atua, “ou te aveesea le loto maaa ai o outou tino, ma ou avatu ia te outou  le loto aano.” E suia e le Atua le loto malō i le loto e filemu; e agamalu. Silasila la oe i le galuega tele ua toe fai atoa e le Atua i lona nuu. Asea? E le a’e le tafeaga i loto o na tausaga.

E le toe aumaia i lenei tausaga ni ou leaga. O le loto aano, o le loto o loo iai le ola. E mamā, e sa’oloto, e fiafia, e alofa, faamaoni, ma faamanuiaina e le Atua. Ua toe faafouina atoatoa le tagata e tapena ai mo le malaga i lona faamasinomaga i Ierusalema. 

Se a lou loto? Faigofie pe faigata, maualuga pe maulalo, lelei pe leaga? O le loto e faamasinoina ai oe. O le loto na faapogai ai le faataamilomilo umi o Isaraelu i le fasefulu tausaga i le vao. Na faoa ai le tofi o Saulo le uluai tupu o Isaraelu. Na vaeluaina ai le nuu o le Atua. Na faatafea ai i le fitu sefulu tausaga i Papelonia.

Pe le o lou loto foi lea na faasatauroina ai Iesu? O le pogai lea o le toe fafau e le Atua o nisi galuega lelei ma nisi mea fou i o tatou olaga.

Aveese le loto oti lena o ia te oe, ae tuu iai le loto aano; le loto aano, e ola pea. Mae’a galuega mamana o le foafoaga fou a le Atua i lou olaga, ona finagalo loa lea o le Atua e tuu lona lava Agaga i totonu ia te oe, e foeuli ma pulea lou olaga i lenei tausaga.

Samoa e, tuu le avanoa i le Atua na te toe foafoaina lou olaga, ona e savali lea ma le fiafia i ana tulafono. Ona e ava lea ma tausi mamalu i ana faamasinoga. Mulimuli ane, e te sa’a i ma’o malie ma sapi i faamanuiaga e le uma mai le alofa tunoa o le Atua. O lenei, ia fai ta’ua ma foafoaga fou a le Atua i lenei tausaga fou.

 

Amene

 

7737063/7783782

By Rev. Petaia Setu 28 January 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>