Malelega fa’amanuia mo le Kerisimasi 2015 Afioga i le Ao Mamalu o le Malo Tui Atua Tupua Tamasese Ta’isi ‘Efi

27 December 2015, 12:00AM

O le Kerisimasi o le fetū faailoilo, e faailoilo mai ai le faamoemoe ma le faaolataga. 

Na tusia e Katinali Neumann ia se solo i lo tatou faanaunau i le sulu faailoilo ma le faaolataga. 

O se sulu agalelei e limata’ita’ina  tatou mai le pouliuli;  e limata’ita’i tatou tainane e pogisa le po, ma ua o tatou taumamao mai lo tatou aiga;  ae tatou te taunuu i fanua pe a o tatou fuafua mālie le laa e tasi.

Fai mai le tusi a Luka  mataupu e 21, fuaiupu e 25, “E i ai fo’i faailoga i le la, ma le masina, ma fetū;  e atuatuvale fo’i ma femēmēa’i nuu i le lalolagi i le ū o le sami ma le sousou...” I le tala o le Kerisimasi, o le fetū lea e ta’ua o le fetū o le Mesia, o le sulu lea na momoli maia le fe’au i le ‘au Makoi. 

O le fetū lea na limata’ita’i le ‘au Makoi iā Keriso i Nasareta. 

Talu ai lo latou faatuatua i le fe’au Faaola a Keriso ma le Atua e āfua mai ai le fe’au, na faimalaga mai ai le ‘au Makoi i le fia selau o maila e mulimuli i le faasinoala a le fetū. 

Na ta’ita’i e le fetū le ‘au Makoi i Peteleema i le mea na latou maua atu ai Iesu i le fale o manu o faata’oto i luga o vao ua mago ma matutū.  Ma o loo tali  fiafia lona fanau mai e ōna mātua ma le lafu manu. 

E maua mai le fanau mai o Keriso le faamanuiaga o aiga, le faala’ei’au o le faamoemoe, ma le faamanaina o le loto maualalo.

I le mau a Samoa, e faailoilo e le masina le a’e o le palolo.  Ona ō lea o ō tatou mātua ua teuteu i ‘ula, pale ma titi ma fatu e faia i laau manogi  ona sami ai lea o le usu fanau i le lagi o le sula:  Fanau mai!  Fanau mai!

E talanoa mai le Atua iā i tatou i fetū, i le masina ma le La. 

Na te faailo mai i lana gagana ma le vavega o le fanau mai o le ola fou, e tasi i tatou i le ‘afu’afu, i le ofaga, i le tafu’e, i le faasinomaga. Ma e, po o i tatou nei e faasino i aiga, nuu, malo, pisinisi, a’oga po o lotu, tatou te mana’omia le sulu agalelei o le Kerisimasi.

E faai’u sa’u upu i le fe’au o le Kerisimasi i lo’u ‘oto mai o upu a le pese lotu a le EFKS:

Pupula mai Iesu e le la

I lo’u nei loto pogisa

Ne’i i ai se ao e tupu mai

Ne’i lilo oe i la’u vaai

Ou te tatalo ia tatou maua le sulu agalelei o le Atua i lenei Kerisimasi, i lona alofa ma lona filemu, ma ia tatou lagonaina le mafanafana ma le matagofie o le tatou nofo fealofani ma le uso a tagata faapea ai ma le tatou si’osi’omaga.

 Ia manuia le Kerisimasi! 

27 December 2015, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>