Lauga - “Ua ta’oto ia te ia le au peau”

27 December 2015, 12:00AM

(Salamo.107:29)

E iloa le tautai matapalapala i aso leaga. Ua masani foi tagata folau ma kapeteni o lea ituaiga tau ma lea ituaiga tau.

O kapeteni ua iloga lo latou agavaa i tau o le siisii ma aso matagi.

E to’a iai le popole o se au malaga. A o la Paulo foi afai ua ‘au ma i tatou le Atua, o ai se faasaga tau mai ia te i tatou? O le vaai lena a le fai salamo i le silisili ese ma le mana faaalia o le Atua i ona galuega uma lava i luga o le sami ma lalo o le sami.

E faaalia i taimi uma; e iai pea foi i aso uma.

I le, a tutupu fesouaiga ma felafoaiina e matagi ma aūma o le vasa, e to’a i le Tautai Sili o tautai; auā e faalogo ia te ia malosi uma faale natura ma mea uma lava ua faia (Mare.4:39). Fai mai le fai Salamo, Ua liua e ia le afā i le malū, ua taoto ia te ia le au peau.

O gagana faa tagata fōlau, e leiloa le taga e fai i le vasa. Ua motu ma le taula. O ni faitau e faamatalaina le matuā leai o se faamoemoe pe a maua e puapuaga ma faigata i luga o le vasa.

E leai se sulufaiga. E gase ai le poto ma le malosi o le tagata. Poo a lava le mau tapenaga e la’u i le vaa, e mole i le vasa. E oo lava i le faatuatua, ua le mau taga (Mata.8:26) O manatu o tagata, o le vasa, o le tuugamau lē elia.

Pe le o lea tatou te vaavaai ai ma le ofo tele i galuega ofoofogia ma le silisili ese faaalia o le Atua i mea uma i aso uma? Ae faapefea lona alofa mutimutivale ma lona agalelei e le vāea ua silisili atu nai lo mea ofoofogia uma ua na faia? Ioe, ua silisili lava le alofa o le Atua. 

Poo ai ea e taumāsina ma le Atua?

O lana lava pule e fetalai ane ai ia faapea ma faapea, ona faapena lava lea. Fai mai le fai Salamo,  Ua taoto ia te ia le āu peau.

Pe mafai e le asiosio ma matagi malolosi ona taofi tafega a le āu? Pe mafai e le malosi o galu ma aūma malolosi ona vavao  le aave o āu o le sami? Leai.

Ua iai lava le to’a e lepa ma taoto ai mea uma ua taena’i e le āu; o mea uma.

Poo ai ea ua sili sona malamalama i le sami ma ona malosiaga nai lo lē na ia faia le sami? O ai ea ua poto ua na iloa ai faavasega ma foia le matautia o natura o le vasa nai lo le māta’isau o Le na ia faia mea uma lava? Samoa, e le faavavau se āu.

E iai lava lona to’a. Ua faapea le tofa mamao a le fai Salamo i le pule silisili ese a le Atua ma lona lava alofa silisili  i luga atu o ana galuega silisili.

O le Salamo nei, o le faamatalaina o le alofa ma le agalelei o le Atua ia te oe ma lou olaga; oe ma lau fanau; oe ma lou aiga; oe ma ou faafitauli; a o e folau mai i le vasa tele o le 2015.

Fai mai le aposetolo o nuu ese, e le o aso uma e sologa lelei. O le taimi ua o.k. o le taimi foi ua masei. Ua faapena i latou o e folau i vaa i le sami. O molimau i latou i galuega mamana ma le silisili ese a le Atua.

Auā ua vaai o latou mata i le matautia ma le ofoofogia o mea uma ua na faia. Aemaise foi o itu aso e fefevale ai ma ua leai se faamoemoe ola o iai.

Ua tuu gaogaoīī ma ua vaai i le faamalumalu mai o le iuga o mea uma. Peitai o loo sisila fofoga o le Atua; ua na faafofoga ma tali mai i lona alofa.

Ua ia te ia le pule laveai ma le mana faaola e taofi ai malosi eseese faale natura ma malosi i’uvale o le lalolagi, ma faato’afilemu ai tafega malolosi o le āu, auā e moni lava, ua le iloa taga e fai i le vasa.

Ua sola manatu; ua oge i mafaufauga; ua mativa i le faatuatua. A o le Atua, ua ia silafia mea uma lava i luga ma lalo o le sami auā o lana galuega ia. O le Atua foi, e tupu pea lava lona alofa mutimutivale ma lona alofa fua. La lea ua goga matagi.

Ua mou ese atu le fili. Ua soloia malosi o le lalolagi. Ua faaumatia Satani ma ana ‘au. Ua gase ma’i. Tulolo faafitauli o le 2015 ma ona luitau, auā ua taoto ia te ia le āu peau. 

Samoa e, faamalo le folau. Faafetai tatalo. Ua e faapalepale i le galuā ma le souā. Manatu i lenei vasa tele sa o tatou tau peau mai ai. Sa oo ia te oe ma a’u  puapuaga ma tiga ogaoga o lenei folauga.

Ua le mau taga i le vasa, ma ua i’u ina aveesea uma lava o lo tatou faamoemoe i le ola. Oka, se tiga! Pagā le faigata! Na tatou tafefea i le malosi o le au.

O le loto ita ma le fia taui ma sui. O le loto leaga  ma faufauga sesē. O le faamaualuga ma le faasausili. O le vaai maulalo ma le faailoga tagata. O le pepelo ma le ola faafoliga. O le ta’ufaamata’u  ma le faatupu vevesi.

O le gaoi ma le fasi tagata. O le taufaavalea ma le fao mea. O le fasi avā ma le fuā. O ā ou faafitauli, o ou mafatiaga, ma loimata o tiga, uso e, o lenei ua tā tuta i Taga. O la Tavita, ua ia aumaia i latou nai o latou tiga (f.28).

E malolosi auma o le sami. A o upu a le atunuu,…e mătua lava i le ōō. E iai afā sa felafoaiina ai oe i le ao ma le po, ae faafetai ua tua i mālama. Auā e mavae atu ao valevale, ae fotua’i mai ao o Samoa.

O ao o le toafilemu ma le maninoa. Ua faaalia ai lana amiotonu ma lona alofa tunoa. 

Malo galulue, malo faatoatoa. Faafetai tatalo. Faafetai i au tapuaiga. Sa tatou faatafea i sasa’e ma sisifo, o matū toga, ae faafetai ua mautinoa le To’a. Ua faamanatu le soifua mai o lo tatou Faaola.

E moni lava, e lutia i Puava, ae mapu lava i Fagalele. Vivii i le Atua Samoa! Vivii i le Atua! Ua le mavae lona alofa ma lona agalelei i lau fanau ma lou aiga; i lou taumafai ma ou faiva. Fai mai lava le ‘au matutua, sa tau mate i le ‘ete le asō!

Ua ā nei? Vivii i le Atua e le aunoa. Auā ua faapea a Tavita, “Ana le seanoa Ieova na ia te i tatou ….”(Sala.124:1) Ana le seanoa Ieova, po ua tatou malelemo faatasi i luitau ma faafitauli o aso uma; i tiga ma faanoanoaga o le olaga. Auā e lelei o ia, e faavavau lava lona alofa.

O ia lava, ua mapu iai o tatou mafatiaga. Auā ua taoto ia te ia le āu peau. 

 Ia manuia le sauni atu i le Tausaga Fou i le pule a le Atua.

 

Amene

7737063/7783782

E-mail: [email protected]

27 December 2015, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>