O la’u tala fo’i

27 December 2015, 12:00AM

1. Matauina i Tala Fou o lea lava ua faalauiloa mai le Faia’oga fou o le Manu Samoa-o ia lea Namulauulu Alama Ieremia e pei ona faalauiloa e le Samoa Observer talu ai nei-ae tete’e mai i ai le Ofisa Sili o Pulega a le Iuni Lakapi a Samoa!

Afai la o le tala lava lea e tasi na lomia e le Samoa Observer ae tete’e mai i ai le Iuni Lakapi-o le fesili la-o le a le pogai e tau nānā ai lea tulaga pe afai o le Iuni Lakapi a Samoa ma o le igoa foi o le ‘Au o le Manu Samoa?

O le a le pogai e tau faanimonimo ai nei mea mai le silafia e le atunuu? O se ‘au a le Iuni Lakapi poo se ‘au a le atunuu?  E o’o lava i nei mea e foliga mai e mumusu nei iloa e le atunuu-ia pe sa i ai foi se isi sa loto i ai ae le o Namulauulu?

O le pogai lea sa avatu ai so matou manatu vaivai-afai la e le’i tofia Namulauulu-e a la pe a tofi ane loa i ai se isi o le Komiti Faatonu e fai ma faia’oga?

Ae ui o lea-ia o lea lava ua tino mai- e leai se mea e tasi na sese e tusa ai ma le faalauiloaina e le Samoa Observer o le tofia aloa’ia o Namulauulu e avea ma Faiaoga o le Manu Samjoa i le vaiaso talu ai! O le a sou taofi? 

2. Matauina pea i po uma o lea vaiaso ma lenei vaiaso le faaalualuō o laau pese a taavale i le valuapō a’o tofafā le atunuu! E le o iloa le pogai o lea faafitauli-pe o le faavalevalea pe o le fia ta’uta’ua e mafua ai-ia pe o le fia faailoa atu i le atunuu o lana taavale lea e sili ona leotele le laau pese!

E leai la se mea o i ai pe ana faapea o fai lava i luma o lo latou lumafale e faalauiloa atu ai lo latou aiga ma le manaia o le laau pese o le latou taavale!

Ae o le aumai lea i luga o ala tetele e fai ai nei faiga-o le matua lē migao lava vae atu  Samoa! Faamata o iloa e nei tagata ua tofu uma lava Samoa ma laau pese faapena?

O le a le mea ua pogai ai lea uiga le migao? E mafai ona fai i totonu o lo latou nuu poo lo latou itumalo? Afai la ua le mafai e le matagaluega e fitoi tonu i ai lenei mataupu ona taofi ia faiga-o le a le pogai? O le a le mea na maumau ai le taimi ma tupe a le atunuu na alu i le tusiga o lea tulafono ae le o faatinoina ai?

Afai o lea ituaiga o amio e ono tutupu mai ai ni faalavelave ma feoti ai nisi-o ai la e mafai ona tuua’ia ona o lea faatamala? O se mea amiotonu le fai fai o le tulafono avatu faataatia ae le faatinoina? Maumau la pe ana mafai e lea matagaluega ona avatu ia laau pese ia e ta i o latou lumafale i le po atoa ona latou iloa ai lea o le mea lea matou te fai atu ai!

E leai se mea faapenei i lalo o le La-o le fai fai o le tulafono-ona nofonofo lea –o mataupu nei e tulai mai faalavelave ma e ono feoti ai nisi!

Afai la ua le mafai e le matagaluega e ona lea tulafono ona fai lo latou tiute-aisea la e le tuu mai ai loa i le atunuu e fai e latou le tonu ina ia mafai ai ona taofi lea faafitauli. O nei tagata faaalualuō ua latou soli vavao a nuu-ae o lea lava e tuu e fai lenei faavalevalea ma le faatautala?

O le tulaga ua aliali mai se’iloga lava e tupu se faalavelave-ona faatoa gaoioi foi lea ae ua leai se aoga ua feoti tagata! O le a la le tonu? Tuu ai pea nei tagata faatautala ma le le mafaufau e fai a latou faiga? 

Afai la o lea-e lelei la ona lava  le atunuu e faia se togafiti mo lenei le mafaufau o avetaavale talavou ma le femitai i luga o ala tetele? O le a sou taofi?

27 December 2015, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>