O lea le finagalo o Fau Niko, 54 le matua o le soifua i le Fofoga o Samoa i le aso ananafi.

I le tulaga tau i le tau o le soifuaga, o le a sou silafia?

“Ia o lo’u iloa i ai ua tutusa lelei lava Savai’i ma Upolu.

“Fai mai e taugata i’inei ae o lo’u iloa i ai e tutusa lelei lava ma Upolu le tele o tau o oloa.

“E talitonu lava a’u e pei lava ona va’ava’ai i ai, ia e ala ona fai mai e  taugata, ona o le le gaioi o le tagata i ai, ua le fua le minoi i le mea  o lo’o i ai le soifuaga i le taimi lenei.

“A ta’u le mativa i Samoa e le fa’atusatusaina i le mativa i fafo ailoga o i ai se Samoa e nofonofo solo i le auala ua leai se aiga e nofo ai, ae o Samoa o lo’o sa’oloto le nofo , o le tausami ma le fo’ai a le Atua i aso uma.

 “Ua amata na mou atu le aganu’u ma le fa’aaloalo ua i ai nei, ua saosaoa le sau  o suiga , ia o lea ua fou i nei vaitau.

“E  pei o le mea lena e pei ua sui tele ai le atunu’u , i le fa’atusatusaga i la aso ua te’a, ia ou te molimau lava ita ,e faigofie le olaga.

“I le va fealoa’i i le tama i lona tuafafine, o mea sa i ai anamua e fu’e le sua a le tamaita’i aua o le feagaiga a le tama lona tuafafine.

O lona talitonuga e fa’avae lea i le tele o suiga o lo’o ua i ai nei aemaise o ‘a’afiaga o le saosaoa o le poto ma le atamai i vaega fa’atekonolosi o lo’o ia talitonu ua tele ina ua ‘a’afia ai tu ma agaifanua i le taimi lenei.

“O le mativa tonu lava lea  o lo’o ua mautinoa  nei i Samoa, ua amata na mou atu  tu ma aga ona o le malosi mai o le tekonolosi mai fafo.

“O le tele o tu  ma agaifanua sa soifua ma ola ane ai o tatou tagata, ia ua tauau ina mou atu lona fa’atinoina.

“ O le tautua a le tuagane i lona tuafafine ia e pei lava ona silafia ia e  tautua  tuāvae le tuagane i lona tuafafine.

“ O se tasi o tu ma aga sa masani mai ai aepeitai ua le toe to’atele o fa’atinoina lea tulaga.

“Ia ua o’o i le itu tau i le fa’aaloalo i totonu o aiga Samoa ia ua faigata lava i nei aso.

 “ O la fo’i aso , e muamua le sua o le faifeau, matai ia soso’o ai ma le tama’ita’i (tuafafine) ia o vaega nei ua mativa atu ai le atunu’u.

“E tatau lava i o tatou tagata ona taumafai e toe aumai tu ma aga nei a mou atu.