O le taua o le faifa’ato’aga mo Alofa

Tusia Aruna Lolani ,

73 Hits

Alofa Aisila mai Fasito’o uta.

Alofa Aisila mai Fasito’o uta.

Na maua le fa’atalatalanoaga a le Fofoga o Samoa ma Alofa Aisila mai Fasito’o ma sa ia taua ai le taua o lana galuega o loo iai nei.

E 23 le matua o lona soifua ma o ia o se faifa’atoaga aua le tausiga o lana aiga. 

E to’alua nai ona uso, o le tasi e faigaluega mo le aiga ao lesi ua fai aiga ma o loo nofo nei o ia i le fale a lona aiga.

O se tasi o le au tupulaga ua ia faaaoga tatauina lona taimi e galue ai luga le laueleele.

“E taua a lava lou maumaga aua le tausiga o lou aiga aemaise foi le faiga o meaai,” o lana tala mai lea i le Fofoga o Samoa.

“O le maumaga a lea e tua ai le tele o taimi i le faiga o meaai, e taua foi aua le vaai mamao mo le lumanai aua foi se lelei o le aiga.

“Ae o lona taua tele a lena o le faiga o a matou meaai.”

Sa taua e Alofa o le tele foi o taimi e o ai ma lona tama e fesoasoani ai o ia i le faiga o ana galuega kamuta.

“O au a ia lea ua mautu lou mafaufau i le faiga o lau galuega lea, manaia le faiga o le faatoaga e maua ai foi lou filemu ia ma o ta saoloto ai a ita i le faiga o a ta galuega.

“E lelei a le faiga o au ia galuega ma o loo aoga foi aua le tausiga o matua.

“O se fautuaga mo le au tupulaga i le vaitaimi nei o lo’o le faaaoga tatau lo latou taimi, tu’u le inu pia ma le fa’avevesi solo ae ia to’aga e fai le maumaga aua le tausiga o le aiga.”

© Samoa Observer 2016

Developed by Samoa Observer in Apia