Te’ena e le Minisita le taugata o lona Ofisa

By Lanuola Tusani Tupufia 27 August 2016, 12:00AM

E matua te’ena e le Minisita o Tupe, o Sili ‘Epa Tuioti ni tu’ua’iga fa’apea, e silia i le ‘afa-miliona tala tupe a le ‘aufailafoga a le atunu’u, o lo’o fa’aalu i le fausia o lona ofisa fou. 

I se talanoaga ma sui o le Samoa Observer, na saunoa ai Sili, o lea fa’atoa nofoia lona ofisa fou i le fogafale-ono i le Maota o le Faletupe Tutotonu o Samoa. 

Sa ia te’ena fo’i tu’ua’iga fa’apea e silia i le afa-miliona tala, le tupe na faia ai le ofisa-taugata o le Minisita o Tupe talu ai, o Faumuina Tiatia Liuga, lea o lo’o i le fogafale-lua o le Plaza a le NPF.

 “E matua sese lava na fa’amatalaga,” o le saunoaga lea a Sili.

“O se ofisa masani lava e aofia ai ma se potu-fono fa’apea le avanoa mo le failautusi. O le ofisa lea, o se vaega o le fa’afouga fogafale-ona a le pito i luga o le Faletupe Tutotonu.

Sa fesiligia fo’i pe fia se tau o le fa’afouga o lona ofisa fou, ae saunoa le Minisita, e sili pe a fesili i le Kovana o le Faletupe, o latou sa gafa ma le galuega lea. 

Ae na ta’ua, talu mai ona avea ma Minisita, sa galuega mai lava i se tama’i-ofisa le-tumau.

O le fiafia o Sili i lona ofisa fou, na saunoa ai, o le tasi lea o mafuaga o le leai o sana failautusi, ona e le o se ofisa tumau sa iai, e fai si la’iititi.

Sa fa’ailoa mai fo’i, e talafeagai le iai o le potu fono ma fetaui lelei mo fonotaga a le Minisita ma le Komiti o Tauofoga, lea e Ta’ita’ifono ai. 

“E sili ia matou le iai o le potu lea nai lo le tau sa’ili o se potu e fono ai i le Vaega o Tupe.

“Lea la ua iai nei lo’u ofisa mautu, o le isi la lu’i tele mo a’u nei, o le sa’ilia lea o se failautusi. 

Na ta’ua, o ia lava e faia ana su’esu’ega ma sa’iliga ma o le leai o se failautusi, o se fa’afitauli tele lea mo ia. 

I le tali mai i se tusi-imeli a le Weekend Samoan, e le’i matua manino mai le Kovana o Maiava Atalina Enari, pe fia se tau o le galuega lea. 

Ae na fa’ailoa mai lava, “e to’afa isi vaega o lo’o nofoia lo matou fale nei, e aofia ai le Matagaluega o Tupe, le Ofisa o le Sulufa’iga, le Matagaluega Sa’ilitupe a le Malo, o le Faletupe o le Lalolagi ma le Ofisa o le Faletupe a Asia ma le Intertrust.” 

Na ta’ua e Maiava, o le fale lea o le Faletupe Tutotonu, ua silia i le 20 tausaga.

E tatau la ona silafia, ua leva le fale ma ua tatau tele vaega e toe fia fa’aleleia pei ona va’aia i le taimi nei, o lo’o fa’aauau pea ona suia o le tele o vaega ma toe fa’alelei, o lana fa’aaliga lea. 

“E le o fa’apito la i le Ofisa o le Minisita galuega o lo’o fa’agasolo,” o lana fa’aaliga lea. 

Na fa’aopoopo mai fo’i le tama’ita’i Kovana, o lo’o tumu atoa potu i le fogafale-ono ma e lua potu-fono o lo’o fa’aaoga e isi vaega.

“E le na o le pau la lea o le galuega o lo’o faia i le taimi nei,” o saunoaga ia a Maiava.

“Lea ua fa’asolo atu i le Fogafale-fitu le fa’aleleia o ofisa o le Faletupe o le Lalolagi ma le Faletupe o Asia.

“E iai le fuafuaga e toe sui le lifi ona ua fai si leva o le lifi o iai nei ma ua tele fo’i ina fa’aletonu i isi taimi.”

By Lanuola Tusani Tupufia 27 August 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>