Fa’asa’o e le Ta’ita’ifono “mafaufauga-sesē”

By Deidre Fanene 27 June 2016, 12:00AM

Moni o fa’afafine o tagata-ola, o sui fo’i o le lalolagi o Samoa, peita’i i le aganu’u lava ia fa’aSamoa, e leai ni fa’afafine i ona magavai-fa’ata’oto’oto ma lotoifale masani.

O le finagalo lea o le Ta’ita’ifono o le Fono a Ekalesia So’ofa’atasi, le Afioga a le Ali’i Tiakono, o Kasiano Le’aupepe, talu ai le fa’aaliga mai le Asosi a Fa’afafine Samoa, ina ia aloa’ia a latou aia-tatau.

I se fa’atalanoaga ma le Samoa Observer i le vaiaso talu ai, na saunoa ai Kasiano, e moni o fa’afafine o isi fo’i tagata-ola na faia e Le Atua Foafoa, e tatau ai lava ona aloa’ia ma fa’aaloalogia, ona o foafoaga a le Silisili’Ese.

Peita’i, na matua te’ena le mau-ta’atele lea fa’apea, o fa’afafine, o se vaega o le aganu’u ma le soifuaga fa’aSamoa. 

 “I aso la, e seāseā e fa’alogoina lea ‘upu o le fa’afafine, aua sa tau-leai ia mea o fa’afafine i o matou taimi,” o lana saunoaga lea. 

“O le mea moni lava lea, e leai ni fa’afafine i le olaga fa’aSamoa. E iai le fono a Ali’i ma Faipule mo matai, e iai fo’i le saofa’iga a ‘aumaga fa’apea tina ma tama’ita’i o le nu’u, ae leai se mea fa’apea i le aganu’u fa’aSamoa mo fa’afafine.

“Ae talu ai ona ua nonofo lava tagata ma fai nei suiga i o latou va’aiga fa’aleTagata, o le mafuaga lea o le iai o nei mau gaosa.” 

Na saunoa fo’i Kasiano, e leai se mea e tete’e ai i fa’afafine, ae o sana fa’amanatu, ona o le anoanoa’i o lu’itau o feagai nei ma Samoa, e afua mai lava ona ua fa’aletonu totonu o aiga, ua oia ai a’oa’oga, o tu ma aga ma talitonuga fa’aleTagata, e tu’u-feula e matua i fanau i o latou lava lotoifale.  

“Pei o la’u fa’amatalaga ua fai atu, o matua lava e aupito taua lo latou sao i le ola tuputupua’e o le tamaititi, aua o latou lava o ulua’i faia’oga mo a latou fanau. 

“E fofoa mea uma mai totonu o le aiga; o le aiga lava le fa’avae o le ola a’oa’oina o se tamaitiiti.

 “A va’ai atu matua i le tuputupu a’e o se tama-tama e foliga o se teine ana aga ma savali fo’i pei o se teine, ua tatau loa ona amata a’oa’i lelei ma fa’amatala iai, o latou tagata moni, aua e le’i faia latou e Le Atua ia avea ma teine.

 “O le fa’afitauli lea i nisi matua, ona ua talie iai i fanau pe a va’ai ituaiga aga la nei ma faiga fa’apea. E manatu latou e malie ae le-iloa, o le ‘ata’ata iai o lo’o una’ia ai ma fa’amalosi atili ai le tamaititi e fai le mea lea e manatu e sa’o. O le mafuaga lena o le fa’aletonu tele ua iai nei aso.” 

Na fa’aopoopo mai fo’i Kasiano, o Samoa i aso nei, ua iai fa’afafine. Ua aloa’ia ma amana’ia e le malo, a lea e avea ai le Ali’i Palemia ma Fa’atama o le Asosi a Fa’afafine. 

“E o’o fo’i la i totonu o ekalesia, ua talia lava latou nei, ona o latou o tagata-soifua na faia e Le Atua,” o lana saunoaga lea. 

 “I le ekalesia la, o lo matou lea talitonuga, e tutusa uma lava tatou, na faia uma tatou e Le Atua.  

“A’o lo’u lava manatu na o a’u, tu’u suiga nei i le tagata ia, e fai ai lava lana filifiliga.

“A o’o loa i fa’afafine, o la latou lena aia, pule latou pe a manana’o e sui mea na avatu e Le Atua ia latou, pe tumau ai pea fa’apena.

“Mo tatou i ekalesia ma ona ta’ita’i, pau lea o le avatu o le fautuaga, tatalo ma fa’amatala ia latou nei, le ‘Upu o lo’o fetalai mai ai Ieova o ‘Au.

“Ana iai lava i ekalesia le malosi e suia mea ua iai nei, e le mafai ona matou fa’atagaina latou nei ae ona o lo’o sisila fofoga o Le Atua, e tutusa uma tatou o tagata-ola ma o Lana Fanau na faia i Lona lava fa’atusa.”  

By Deidre Fanene 27 June 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>