Su’esu’e e leoleo fualaau fa’asaina i le Maketi i Savalalo

27 April 2018, 12:00AM

1. O le aso Lulu 18 o Aperila 2018 pe a ma le itula e 6 i le taeao na ripotia mai ai e le falemai i Motootua se pepe 2 masina ua maliu. 

E faapea se faamatalaga o lenei mataupu o lenei pepe na vaaia e le tina o lona tina ao agai lona tina e faigaluega. I le itula e 3 i le vaveao na siakia ai e lona grandmother ma iloa ai ua sau le palapala i lona isu ma faafuasei ai loa ona ave faatopetope i le falemai ae peitai ane e o o atu ua maliu. O lo o faia nei i ai suesuega a leoleo i le taimi nei.

2. O le aso 20 foi o Aperila na logoina mai ai le ofisa o leoleo e uiga i se taulealea 54 tausaga mai Solosolo o lo o i ai ni ona manuaga tuga ma e faapea sa taumafai se tasi e faaoo i ai le oti pe tusa o lena taimi o le vaveao. 

O se faamatalaga o lenei mataupu e faapea na valaau mai le ua manua i le latou aiga tuaoi pe tusa o le ta o le 3 i le vaveao mo se fesoasoani ma agai atu ai loa i ai nisi o lenei aiga ma iloa ai se tamai naifi o lo o taatia i autafa ane o lona tainamu. O lo o i ai foi ni manuaga i le ua ma le fatafata o le sa valaau mai. Na faatopetope o ia i le falemai i Motootua ma o lo o i se tulaga faaaletonu o ia ona o le ogaoga o ona manuaga. O lo o faaauau nei i ai suesuega a leoleo i le taimi nei i lenei mataupu.

3. Sa fa’atino se galuega a le Matagaluega o Leoleo i le maketi o lo o faatauina ai oloa taulima (flea market) i Savalalo mo le sailia o fualaau faasaina o le mariuana i le aso Faraile 20 o Aperila 2018. 

O lenei galuega na faatinoina ona o le popolega i le toatele o le mamalu o le atunuu i le faatauina ai o lenei fualaau faasaina o le mariuana i lenei maketi ma telē ai se aafiaga mo tupulaga talavou o Samoa. E toavalu i latou na taofia mai ai, ae toaono i latou ua molia nei e leoleo i le umiaina ai o fualaau faasaina ma e tulai uma i le aso 21 o Me 2018 i luma o le faamasinoga e tali atu i ona moliaga. E toe fautuaina ai foi le mamalu o le atunuu o le mariuana o se fualaau e faasaina i lalo o le tulafono.

4.O le aso tofi foi 19 o Aperila na ripotia mai ai e se tasi o le aufaigaluega a le fale faamasino i le ofisa o leoleo e faapea o lo o ia taulimaina se paipa ula sikareti (utensil pipe) e faapea na ia aveesea mai i se tasi o sui resitara o le faamasinoga. Na agai i ai leoleo ma aumaia lenei paipa ma faia ai loa suesuega. Ua molia ai nei e leoleo lenei alii sui resitara i moliaga o le umiaina o lenei paipa ma o loo taofia nei o ia i lalo o le vaavaaiga a leoleo ao faagasolo ai suesuega seia aulia atu le aso 30 o Aperila.

5. o le aso Gafua foi 16 o Aperila na ripotia mai ai i leoleo se mataupu na aafia mai ai ni alii saina se toatolu i le Kavana store i Falelauniu. E faapea se faamatalga o lenei mataupu na i ai se feeseeseaiga na tulai mai i le va o se alii Samoa na agai atu e faatau mai i lenei faleoloa ma nei alii saina ma tulai mai ai loa se vevesi. Na faaaupegaina nei alii saina i ni sapelu i le taimi na taunuu atu ai leoleo ma aumaia loa i latou i le ofisa o leoleo i Faleata. Ua molia ai nei alii saina i le umiaina o aupega matautia ma ua toe tatala i tua e faatali ai lo latou faamasinoga i le aso 15 o Me ma o lo o saini i le ofisa o leoleo i Faleata i aso Faraile uma.

6.O le vaveao foi o le aso tofi 19 o Aperila na ripotia mai ai i le ofisa o leoleo se poloka na faatinoina lea i luga o le auala i Luatuanuu ma tauai ai foi o taavale sa uia lenei auala i lea taimi o le vaveao ma e leo iloa nisi. Na agai i ai leoleo ma iloa ai ua aveesea lenei poloka sa faatinoina ma talosagaina ai le pulega mamalu a alii ma faipule o Luatuanuu mo se fesoasoani i lenei mataupu. O le aso gafua la 23 o Aperila na faapea ona faaooina mai ai ni alii se toalua o lo o masalomia i lenei soligatulafono e le afioaga. O nei taulelea ua fa’apea ona molia ina nei i moliaga o le faapotopotoga amio le pulea (disorderly assembly) ma e tulai i luma o le faamasinoga i le aso 1 o Me 2018 e tali i o laua moliaga. E faafetaia ai e le matagaluega o leoleo le pulega mamalu a Alii ma Faipule o Luatuanuu i lenei mataupu.

7. O le aso Gafua foi 23 o Aperila na faapea ona lokaina mai ai e leoleo se alii 43 tausaga le matua na malaga mai i Alaska, Amerika mo Samoa i le malaevaalele faavaomalo i Faleolo ina ua mauaina ai e taifau sosogi a le vaega o le K9 ni fualaau faasaina o le aisa na aumai ai i totonu o lana atopau. O le mamafa o nei fualaau faasaina pe tusa ma le 26.6kalama ma pe tusa lona tau aofai pe a faatauina i se tinoitupe e ova atu ma le $60,000 tala Samoa. O lenei alii na malaga mai mo se faamoemoe a si o latou aiga i le motu tele i Salafai. Ua molia nei e leoleo lenei alii i moliaga o le umiaina o nei fualaau faasaina ma o lo o taofia pea i lalo o le vaavaaiga a leoleo seia aulia le aso 30 o Aperila. O lo o faaauau pea suesuega a leoleo i le taimi nei.

27 April 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>