Ia fa’amalosia faiva alofilima

By Vatapuia Maiava ma Ilia L Likou 27 October 2016, 12:00AM

I le fa’atalatalanoaga ma le tinā i a Fenuimia’i Samuelu o Faleula-Tai ma Lano i Savai’i, na ia fa’ailoa ai le taua o le tule’i o tupulaga teine ma tama’ita’i ina ia iloa ma silafia le lalagaina o le tele o faiva alofilima na masani mai ai i aso ua mavae.

“Ia o le tala moni lava ma le mautinoa ua tau mou atu le fiafia o le tupulaga i le fa’atinoina o le tele o vaega o le aganu’u aemaise lava a i le faiga o nai vaega faigofie nei e pei ona i ai titi fulumoa.

“O le to’atele ua o latou fa’alagolago lava i le fa’atau sa’o mai i le faleoloa, ae o nei vaega uma e pei ona maitauina ai i aso ua alu ia na masani mai ai nai tua’a ua faiilagi le folauga.

“O lea lava fo’i le agaga maualuga o lo’o i ai i le taimi lenei i le to’atele o nai tinā ma tamā matutua o le atunu’u e ao lava ona ave i ai le fa’amuamua.

“Ia o le fesili tonu , o fea e ave ai lena fa’amuamua?

“E vave lava le tali i lo’u iloa , o le ave lea i le una’i o fanau ina ia toe a’oa’o e fa’aolaola mai le tele o vaega nei , aua o le itu mautinoa, afai ae tetele le sau o tu ma aga mai fafo.

“Ia o le fa’aletonu lena o le a o’o i ai a taeao.

O le a sou silafia, o a ni vaega taua e fa’atinoina ina ia mafai ona toe fafagu mai faiva alofilima nei a tama’ita’i lea ua tauau ina mou atu?

“Ia e pei ona ta’ua muamua o le una’i lava, ma e le gata la ina ia una’i fanau teine i le a’oa’oina i vaega nei, ae e tatau fo’i i a’i matou ona o matou iloa lelei le taua o fa’atinoga o lo’o tu’uina atu i fanau.

“Ou te iloa lava e a’u ia o le isi lea mafua’aga ua tele ina tupu ai le tele o fa’fitauli i nai fanau teine, ona ua misi atu i matua le fa’aaogaina tatau o latou taimi i le fa’atinoina o vaega nei.

“Aua fo’i a iloa lalaga le ato, iloa lalaga le pulou, o le kiki fulumoa, o sei ma isi lava galuega lalaga e le gata ina maua ai le tele o tupe maua pe a fa’atauina ae mafai fo’i ona faigofie ai le tele o so’o se vaega e mana’omia le fanau i le aoga.

“Aua o le tele lava o nei aso, ia o vaega lava nei e mana’omia e le fanau mo a latou fa’atinoga aepeitai ua tele ina fa’atau mai faleoloa ma alu ai tupe, ae o tatou lava i le augatātā.

“Ia o le kiki fulumoa latou e faigofie lava e leai ni vaega tele e fa’atinoina, ae a fa’atau ia e maua lava le $30 i le $50.

“O lo’u iloa i ai e ao lava ona a’oa’oina le to’atele o nai fanau ma tupulaga talavou i le lalagaina o le tele o galuega taulima.

By Vatapuia Maiava ma Ilia L Likou 27 October 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>