Taugata le soifuaga i Samoa

By Vatapuia Maiava ma Sarafina Sanerivi 26 September 2016, 12:00AM

“Ua matuā faigata lava le olaga i totonu o Samoa.”

O le manatu na o le ta’ule’ale’a ia Petaia Opetaia, e 26 tausaga mai le afioaga o Aleisa. 

Na ta’ua e Petaia, o Samoa o se atunu’u filemū ma matagofie, ae peitai, ua fai lava se faigata o le olaga i le vaitau lenei. 

“E manaia lava Samoa i le nofo.

“E sili mamao atu lava nai lo’o isi atunu’u. Ae pei na’o lepau lava lena o le fa’afitauli, ua fai lava si taugata o le soifuaga i lenei vaitau. 

“Ua le gafatia tagata ona fa’atau le tele o oloa ona o le taugata tele. Ua taugata le soifuaga ae to’atele aiga e le’o lava le fa’asoa. 

“O le isi fa’afitauli o le tele o lo’o ou vaai ai i totonu o Samoa, o le tele lea o le au faipisinisi mai Saina.” Na ta’ua e Petaia, o le tele o fa’alavelave fa’asamoa ua utiuti ai le fa’asoa a isi aiga. 

“E le’i fa’apena i aso la. Sa māmā a le avega a tagata Samoa, auā sa fai lava i le mea na mafai a aiga. Ae o le taimi nei, ua faigata lava ona o le tele o saogāmea ma mea e fai, e alu ai tupe a aiga. 

“Ae peita’i o le aganu’u lava lea a Samoa sa masani mai ai i aso ua mavae.” Peita’i na fa’ailoa mai e Petaia, e ui lava ina faigata ma taugata le soifuaga o Samoa o lo’o iai, e le’o fapea lava ua iai se Samoa ua uma se soifua i le fia ai ma le fia inu. 

“O le mea lena e sili ai Samoa i isi atunu’u ona o le tamaoaiga i o tatou laufanua. E saoloto lava tagata ma to’afilemu le olaga o tagata. 

“E moi e iai fa’afitatuli, ae o mea foi o lo’o tutupu i isi atunu’u. A’o le tulaga lea i le matitiva o Samoa, ou te le lagolagoina lea tulaga. 

“E mafua la’u fa’amatalaga ona e leai lava se Samoa ua uma se soifua ona o le fia ai. O lo’o tele meaalofa a le Atua i lau’eleele o Samoa. 

“E maua fua mai meaai mai le laueleele ma le sami. E a la ona mativa le tagata ma oi ona o le paiē ma le fa’apalapala.  “O lo’o iai lava fanua na fa’amanuia ai le Atua mo Samoa e galulue ai ma saili ai manuia o tagata.”

By Vatapuia Maiava ma Sarafina Sanerivi 26 September 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>