LAUGA - E tua le po i le ao

By Rev. Petaia Setu 26 March 2017, 12:00AM

I. “Faalogo i le Atua ma fai le amiotonu a le Atua”

(Mataio.23:2-3)


O le gagana faa- a’oga nofotumau – ‘Fai le mea lea makou ke fai aku ai, ae ’aua le faia le mea lea makou ke faia’ E pei ua oo mai i nei ona aso ua fai pea ma mătua a nisi o le au matutua.

E ese le lalolagi o loo tautala atu iai, ese le paneta o loo ola ai. E ata faapenā uiga ma amioga a le au tusiupu ma le au faresaio ua maua e Iesu. A o le fautuaga mai le Alii, usitai, tausi pea i tulafono ua aoaoina ai outou, ae ia ’alo ese mai le agasala o loo latou faia. Ia faalogo pea i le Atua, ma faia Lana Amiotonu.

O tusiupu ma le au faresaio, o le au tausi tulafono ma le au fai tonu ia o le nuu. O faifeau ma le au fai tōfā o le lotu Iutaia. O kama makukua ia! O taitai. Fai mai Iesu, Ua tietie kama ia i le nofoa o Mose. Ua ia i latou le pule (power) e faasaoloto ai e tusa ma tu o le lotu ma aga faa Iutaia. E mapo lotu. E mata tulafono. Ae le malamalama i le lotu (i le Atua). E le tausi tulafono.

E masau tele le vaai mamao, ae nenefu le vaai ifo i ’i! E gutu poto i le tulafono, ae gutu oso le faalogo. E taulagi le suafa o Ieova ma le tulafono a Mose, ae matautia le pepelo ma le tau faa’ole’ole. Ua silafia lelei e Iesu o latou tagata lilo. O tagata e ola faafoliga. E foliga mai e lelei, ae tutupu ai masei. Fai mai Iesu, ’Aua tou te faaa’oa’o i a latou amio! Aisea? Ae mea ane, o taitai ia o le lotu?

O taitai o le nuu? O le vaega lea e faia upu ma tonu? O latou ia fai mai Solomona e afua mai ai manuia o nuu! E sa’o? Samoa, e le i silafia e Solomona, e iai a tatou tusiupu; e faamatua foi a tatou faresaio! E faavae i le Atua, ae le fia faalogo i le Atua.

E fĕ’avea’i faailoga o le satauro o Keriso i le tagāvai, ae le tonu amioga o loo fai. Ua vāvāō le atunuu i le pulega o lana Manu Samoa. Ua gugulu le lalolagi i le Iuni Lakapi a Samoa. O le pulega? O le au fai upu ma le au fai tonu!

O taitai! O le ala lea o le tigā o le finagalo o Iesu i tusiupu ma faresaio, ona o taitai. Silasila outou e le o se galuega māmā le galuega a le au tusiupu ma tiute faa faresaio. E ui ina mamafa, ae le i faa-amuia iai Iesu!

E atu valu ona lafo iai e Iesu le “Oi talofa, Oi talofa,…! O lona uiga, e leai sona taunuuga lelei. O le mea manino lea. E leai se saolotoga, leai se fiafia. Aisea? Ua le faalogo i le Atua. Ua le faia le amiotonu a le Atua. Ua faamaualuga i le faaeaea! Ua faaaogā sesē le pule (power). Le au uso e, e le o le nofoa o Mose e faaolaina ai oe, a o le nofoa e faamasinoina ai oe.

Vevesi le isi aulotu ua mana’o le faresaio i se lua sefulu afe tālā e alu ai lana faamalologa. Ae fesulufa’i solo nai aiga matitiva i saoga mea ma tusaga tai fia e tali ai le mana’o o taitai o le lotu ma pulega faafaresaio i le lua vaiaso talu ai.

Le ekalesia e, e le tauilo lou afutoto. E te manumalo lava oe i lou loto. Ioe, lototele, loto fiafia, loto mălie. Onosai i mea uma ua aoaoina ma faatonuina ai oe. Ae ’aua lava ne’i  e faata’ita’i i o latou olaga. ’Aua e te faaa’oa’o i ā latou amio. Faalogo oe i le Atua, ma tumau ai i le Atua. Auā e ā outou le faa Amuia, ae a matou le Oi talofa!

O le amiotonu, o le isi lea natura paia o le Atua. O le uiga mamā o le Atua e le pona. O le faamaoni e le punitia. E sa’o e iloga. E tauleleia. E amomua i le faatuatua. O le tamaliiaga o le Atua ua tala e saili atu ai le tagata i lona manuia i le lagi. E tiu ai le tagata e mata’u i le Atua.

O le anaana i le tulafono a Ieova, o le mea lelei lea ma le tatau, auā o lana amiotonu lea. O le ’alo’alo mamao ma amioga leaga ma uiga sesē o le au tusiupu ma le au faresaio, o le amiotonu lena a le Atua. Samoa pele e, e leai so tatou ua atoatoa.

Tatou te fia maua le ola mălie; le ola sa’oloto, ma se olaga fiafia. Tatou te le maua sea olaga pe afai tatou te le faalogo i le Atua. Fai mai Samuelu ia Saulo, “ E sili le faalogo ia Ieova i lo le taulaga” (I Sam.15:22). E fou gatā foi le faalogo pe afai tatou te le iloa le Atua.

Ua faapea le upu a Ieremia i le nuu, “Ia outou iloa Ieova….” (Iere.31:34) O la Paulo ia Timoteo, “aua ua ou iloa o ia ua ou faatuatua iai” (II Tim.1:12). Ae faapefea la ona iloa le Atua pe afai e gūgū lau amiotonu? Faafetai ua faagaganaina e le Atua le kapeteni o le Manu Samoa. Aua e tuai lava, ae fāi mai.

O upu a le perofeta o Isaia, “E le pouliuli pea le nuu” (Isa.9:1). A o upu a toeaiina o le atunuu, ‘E le po pea Malaē’ A o la Iesu, “A le alalaga tama ia, e fe’ei mai maa” (Luk.19:40) O tatou o tagata valaauina.

O tagata molimau i le amiotonu a le Atua. O tagata tautatala. Tautatala i mea lelei. Tautala i mea moni. Tautala sa’o. ’Aua le gūgū. ’Aua le alofa faavalea. ’Aua le palaai. A tainane faafefe e le toe filifilia i le Manu Samoa ona ā lea? E faaolaina ai oe?

E sao ai lou toalua ma lau fanau i le lagi? ’Aua le popole i le te’a ma le galuega po’o le pa’ū o tofi. Ae popole i lou faaolaina ma le ‘Oi talaofa’ ina ne’i oo atu ia te oe.

O le faamanatu. E le lima taitaina oe i ni upu faa nofotumau. E le manuia foi se atunuu i se pulega faa kalapu poo se pulega faa pātī. E le taupulea faale aiga se ekalesia poo se faalapotopotoga. Ō  ‘ese mai le ‘Oi talofa,’ ae saili i le ‘Amuia’

Faalogo i le Atua, ma fai lana amiotonu. Auā e mavae le po, ae sau le ao.

 

Amene

 

7737063/7783782

 


By Rev. Petaia Setu 26 March 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>