O le fai faiva o manuia o aiga

By Aruna Lolani 26 March 2017, 12:00AM

O sami a Samoa o se vaaiga matagofie ma o se parataiso fo’i lena mo turisi.

O le manatu fa’aalia lea a Fa’aea Mulipo mai le nu’u o Fasito’o Uta . 

 “A e va’ai fa’alemafaufau i se nofoaga i le sami e lelei mo le faiga faiva, o Samoa lava le nu’u e sili i lena itu. 

O le tele o tama, o le auala lelei a lea e su’e ai se tupe ma o Fa’aea o se tasi lea o taule’ale’a e fiafia e fagota. 

Sa ta’ua e le tama e 44 le matua o lona soifua i le Fofoga Samoa, o ia e fa’amoemoe ai lona aiga i tupe maua mai lona faiva

“Ou te fagota fa’atolu i aso uma i le su’eina o se i’a e fa’atau atu e maua ai se seleni mo le aoga a la’u fanau.

 “Ia o la’u galuega masani a lea aua le tausiga o lo’u aiga,” o lana tala lea.  

O le fai faiva lava e ola ai Fa’aea. 

“E taua tele lenei taleni aua e tele lava le matou tupe maua mai ai i le fa’atauga atu o i’a.

“Pei o le mafua’aga na e matou te talotalo ai a ia lelei le tau aua a matou faiva.

E lagona fo’i le fiafia o Mulipo ma lona loto fa’afetai aua o le vaitaimi lenei o le Fagafulu, e to’atele ai tagata e mana’omia le i’a. 

“O le Fagafulu o se vaitaimi lelei lava lea mo lenei ituaiga pisinisi fai faiva mo matou ia e fa’atau i’a. 

 “Ou te leiloa po’o a mai fa’atauga a le maketi i’a le i Apia ae o matou lava i nu’u tua, e fa’atauaina tele le Fagafulu ma o se taimi taua lea e tele ai se matou tupe maua.  

“Ou te tautino atu, o le fai faiva o se taleni ou te fiafia tele ai ma ou te talitonu e lelei lava mo le su’eina o se tupe mo aiga ma e vave fo’i. 

 “A lelei a fa’atauga o le aso, e $300 matou tupe e maua.  

Sa fa’apea mai fo’i Fa’aea, i lona lava ia manatu, e tele atu ai tupe maua mai faiga faiva na i lo’o totogi o lo’o maua i galuega a isi. 

“Matou te aai ia matou faiva ma e maua ai fo’i a matou tupe.  

“Ou te talitonu a a’u ia e le toe lelei ni totogi a isi tagata o lo’o maua mai a latou galuega ae sili atu ai le fa’atau o i’a e maua mai se faiva, e tele ai sau seleni e maua. 

 “O le matou alagatupe la lea.

“O le mafua’aga fo’i lena o lo’o ou taumafai malosi pea i lenei taleni aua e lelei mo le su’eina o le tupe e tausi ai le aiga. 

“E mo’i a o lenei galuega e tele fo’i ona a’afiaga ae a e iloa a e oe ia fa’aaoga ou mea totino fagota, e leai se fa’afitauli e tupu mai.

By Aruna Lolani 26 March 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>